Misako 23 - Nouveau Testament en Kilega

Paolo Eli ku Ngatu.

¹ Nu Paolo, galolile babo bakazi ba luango, atendile bune, Mibuto zane, nne nili na kalenganio kasoga ku Kalaga aba nu ku busi bubuno.

² Nu wozo sankoga munene izina liage Anania akakizizie babo babezaga bemine buigi nage buno, bamuli­bule ku busundo.

³ Tondo Paolo amubuide bune, Kalaga akuli­bule nu uwe kitutu kia bongibua na makese, uwe wikala kunsungia ku mulembe, nu uwe wagila mulembe ukukakizia nilibulue?

⁴ Nubo bansania bemanaga buigi nage bamutendile bune, Kubuni walinga sankoga munene wa Kalaga?

⁵ Nu Paolo atendile bune, Mibuto zane, nsiamenyaga buno eli sankoga munene: kubuno buasanzilue bune, Ntutende muangati wa bantu bobe bubi.

⁶ Tondo Paolo gamenyine buno, bamozi babezaga Basadoke, nu bango baFalese, alalukile neiyuki inene ku babo bakazi ba luango bune, Mibuto zane, nunne nili muFalese, muana wa baFalese, ku musagu wa kilemanizio nu iyukilo lia bakuzi unkusungizibua.

⁷ Nu gasilile kutenda bubo, baFalese nu Basadoke, basakile; musanganano unsania walekanukile ku bubo.

⁸ Kubuno Basadoke bakutendaga buno, takuli iyukilo, aba mugenzi, aba muuza; tondo baFalese betabiziziebio binsania.

⁹ Kuabeide kazege kanene; nu bamozi ba basanzi ba baFalese bazanzukile, nu batendile bune, Tatukumona ku katati ku wono muntu: tondo embe muuza uwamutenda, aba mugenzi uwatenda nage.

¹⁰ N u gabeide lubanza lunene, nu wozo mukota munene wa bita, akule boba, akengede buno bakuata Paolo, akakizizie bakoloboyo bagele nu babagulusulewe, nu nti benda nage mu numba nnene za mukota.

¹¹ Mu kindi kikio Mukota avule buigi nage, amubuide bune, Paolo, kokomezia mutima, kubuno anga bubo, buwalongekile musagu wane ku Yelusalema, ubugulongeka lingo muno mu Lomo.

Bekukalila Paolo Luango Luakumuita.

¹² Gabede mu nindunindu, baYuda bakalile luango, nu balu­mbide bune, Tatualie aba tatuanue ndi tatuita Paolo,

¹³ Nu babo balumbinanizie bubo babezaga bantu batinga makumi manazi.

¹⁴ Nu bendile ku basankoga banene nu ku bakulu, nu batendile bune, Tuasila kulumbila bubibu, buno tatuasonde ku kenandi tatuita Paolo.

¹⁵ Umpanga inyue nu bakazi ba luango bulazi wozo mukota munene wa bita buno amukase tanga we buno mu­kutunda kumenya milondo zage busoga: nuisue, tuasasie kumuita, gabe kumuli.

¹⁶ Tondo muigoa wa Paolo ongule ku luango luabo, engide ku numba nnene za mukota kuabezaga Paolo nu amusambalide.

¹⁷ Nu Paolo amanine mukota umozi amubuide bune, Ikia wono musikila kua mukota munene wa bita; kubuno eli neiyuki limozi liakutunda kumutenda.

¹⁸ Endile nage kuabezaga mukota munene wa bita nu amutendile bune, Paolo wozo mukandua, amanine nu ambuide buno, nivue na wono musikila kuno kuguli kubuno eli neiyuki limozi liakutunda kukutenda.

¹⁹ Nuwe mukota munene wa bita amukatile geikoko, nu eibisile nage, amu­buzizie bune, Musagu mukizi ukutunda kuntenda?

²⁰ Nu amu­buide bune, BaYuda bakala luango lua ku kusega Paolo lubi ninduni­ndu, buno umugezie bekutunda kumubuzia nu kumenyinina milondo zage busoga.

²¹ Uwe ntuitabizie; kubuno beli bantu batinga makumi manazi bekulindila nu bakala luango buno, tabalie aba tabanue ndi tabeita Paolo, nubo bese kayikayika, bekulindila idagano liobe.

²² Nu wozo mukota munene wa bita atendile wozo musikila bune, Enda, nu amukakizizie bune, Ntubule ungo muntu buno watenda bubo.

Basinga Paolo ku Feliki.

²³ Nu amanine bakota babili ba bakoloboyo, ababuide bune, Kano kaluma bikazi bakoloboyo nkama ibili kayikayika mu nkungu isatu za kindi, bende ku Kaisalia, nu bekuenda gantata ga mpunda makumi mutuba kamo, nu bango nkama ibili beli na masumo:

²⁴ nu ababuide babike nyama kayikayika nu kubakamia Paolo gazo kumueka kua muangati Feliki:

²⁵ Nu asanzile mukanda lukita luluno:

²⁶ Kolodia Lusia ku Feliki muangati musoga nunse, samba.

²⁷ Wono muntu akatilue na baYuda nu batundagile kumuita, nu navule na kibombo kia bakoloboyo buno nimonie, ganungule buno eli muLoma.

²⁸ Nu natundile kumenya bubekumusongela, na­mubikile ku bakazi ba luango:

²⁹ namenyine buno, bamusongede ku mbuzio za mulembe wabo, tondo takuli buanakuila aba buanaka­ndilua.

³⁰ Nu ganamenyine buno bakalila wono muntu luango, ubunasasia kumusinga kuguli, nu nakakizizie babo bamusongelaga buno, batende bunsania kuguli.

³¹ Umpanga bakoloboyo, batolile Paolo, nu bendile nage anga buakakizizie, bamuekile mu kindi nu bendile nage ku Antipati.

³² Tondo mu nindunindu basigile babo, babakamaga gantata ga mpunda, buno bende nage, nu basubizie ku numba nnene za mukota:

³³ nu babo gababasile ku Kaisalia, bakasile wozo mua­ngati mukanda, nu bamulolesezie Paolo.

³⁴ Nuwe gasilile kusoma wozo mukanda, ababuzizie bune, Muntu wono eli wa kuni? nu gamenyine buno eli muntu wa ku Kilikia,

³⁵ atendile bune, Nonguilile buwatende, gabe babo bakusongede bavua: nu aka­kizizie buno abikue mu numba za lusungio za mukota Helode.