Misako 21 - Nouveau Testament en Kilega

Paolo Eli ku Tulo.

¹ Nu gabeide tuasila kulekanuka nabo tuendile na buato, tuendile mu nzila zemana nu tuabasile ku Kosa, nu gakeide busi tuabasile ku Loda, nu kutuka kuko tuabasile ku Patala:

² nu tuamonine ku buato bukuenda ku Foiniki, tuingide mubo, nu buatuekile.

³ Nu gatuamonine ku Kupulio, tuakisigile ku seikazi, nu tuatingile ku Sulia, nu tuemanine ku Tula; kubuno batikizie mizigo zabezaga mu buato kuko.

⁴ Nu gatuamonine ku beigisibua kuko, tuikeide nabo bindi mutuba kamo: nubo babuide Paolo mu Muuza buno, ntende ku Yelusalema.

⁵ Nu gatuazindilizizie bindi bietu tuatukile nu tuendile; nu bantu bansania nu bakikulu babo nu bana babo, bendile batuelekezia kuisula lia muino: gatuabasile geisokelo, tuakomine mazu nu tuasegile, nu tualagene nabo;

⁶ nu tuingide mu buato, tondo bo basubizie kuabo.

Paolo Eli mu Nzila za ku Yelusalema.

⁷ Nu gatuasilile lugendo lueitu kutukila ku Tula, tuabasile ku Tolomai; nu tuasekede mibuto zeitu, nu tuatingizie nabo kindi kimozi,

⁸ Nu munindunindu tuatukile ku Kaisalia: tuingide mu numba za Filipo, musambazi wa musagu musoga, abezaga umozi wa ku babo mutuba kamo, nu tuikede kuage.

⁹ Wozo muntu abezaga na bakinga bage banazi betemenya wamulume, babezaga bekulengania.

¹⁰ Nu gatuizizizie kuko kuabasile mulengania umozi izina liage Agabo atukaga ku Yudaya,

¹¹ nu atuvuilide, nu asongezie mukoma wa Paolo, eikandile wenyene ku magulu nu ku maboko, atendile bune, Muuza Wasililila abula bune, Ububo buakite baYuda mu Yelusalema nyene wono mukoma nubo ba­mugabule ku maboko ma bantu baBilongo.

¹² Nu gatuongule kububo, isue nu bantu beiya gago tuamusegile buno ntanenda ku Yelusalema.

¹³ Nu Paolo abuide bune, Buni bumukulila nu kuntambia mutima? Kubuno nili kayikayika ta ku kukandua tugu kankanka, tondo kukua ku Yelusalema ku kabamba keizina lia Mukota Yesu.

¹⁴ Nu gatazigile kungua butuatendaga, tuikeide kibibi, tuatendile bune, Kusombola kua Mukota kukitue.

Paolo Eli ku Yelusalema.

¹⁵ Nu gatingile bindi bibio tuakanine mizigo zeitu nu tuabaka­mine ku Yelusalema.

¹⁶ Nu beigisibua bamozi batukaga ku Kaisalia, tuendile nabo bavule na Munasona, muntu wa ku Kupulio, abezaga muigisibua mutangi, buno tuikale kuage.

¹⁷ Nu gatuabasile ku Yelusalema, babo mibuto zeitu batusekeide na mbogimbogi.

¹⁸ Nu gakeide busi Paolo eingide neisue kua Yakobo; nu bakulu bansania babezaga kuko.

¹⁹ Nu gasilile kubasekela, abasambalide bunsania buakitile Kalaga ku baBilongo mu kusambala kuage.

²⁰ Nubo, gabongule ku bubo, baganuine Kalaga; nu batendile bune, Mubuto weitu, ukumona ku baYuda tununu tuingi bakatizia; nubo bansania beli na kitule ku mulembe;

²¹ nubo bongule ku musagu wobe buno, ukuigisia baYuda bansania babalangeine mu baBilongo buno, babenge Mose, wababulile buno tabamonesie lingo bana babo, aba tabayange lingo nkita zabo.

²² Su, buno buli buni? lebelebe bongule buno wabasa.

²³ Kano kaluma kita bubuno butukukubula: Tuli na bantu banazi balumbide buno babegue mumpugu;

²⁴ tola babano, wiyengie nabo, balige buno babegue mumpugu; nu bantu bansania bamenye buno zezo misagu zibonguagile kuzo kuguli buno zili za buza; tondo uwenyene ukukita busoga, nu ukuanza mulembe,

²⁵ Tondo ku bantu baBilongo bakatizizie, tuabasanzide nu tuabakakizizie buno ba­bembuke binsania biabikua ku nkisi, nu mikila, nu nyama zakamua, nu butazi.

²⁶ Nu gakeide busi Paolo atolile babo bamulume, eiyengezie nabo, nu eingide mu numba za kukumbamina kuzi­ndilizia bindi bia kuengibua, aba nu kisansa kikasue ku kabamba ka muntu na muntu wa ku babo.

BaYuda Bakata Paolo mu Numba za Kukumbamina.

²⁷ Gabede bibio bindi mutuba kamo bise buigi na kusila, baYuda ba mu Asia, gabamumonineko mu numba za kukumbamina, balubi­kanizie musanganano unsania wa bantu, nu bamukatile,

²⁸ balalu­kile bubibu bune, Balsalele tukasiazi: Wono muntu ukuigisagia bantu bansania kunsania, buno basombe kikanga kietu, nu mulembe wa Mose, nu kiziki kikino; nu lingo avule na baGeleka mu numba za kukumbamina, nu babigia kiziki kikino kiasuagibua.

²⁹ Kubuno bamumonineko mu muino na Tulopimo muEfeso, bakengelaga buno, Paolo, amuingizie mu numba za kukumbamina.

³⁰ Nu muino unsania wangamine, nu bantu bansania bakundamene lubilo; nu babo bakatile Paolo, nu bamubulutile nu kumutikia mu numba za kukumbamina; nu mu zezo nkungu nibi insania zigedue.

³¹ Nu gabalondaga kumuita, musagu wabasile kuabezaga mukota wa bita, buno Yelusalema unsania alubikana.

³² Nu atolile bakoloboyo nu bakota ba bakoloboyo, nu abasile kubabezaga lubilo: nubo gabamonine ku wozo mukota wa bita nu bakoloboyo, balekede kulibula Paolo.

³³ Gabasile mukota wa bita, amukatile, nu aka­kizizie buno, akandue na makoki mabili ma biuma; nu abuzizie bune, Nazi wono, nu kikizi kiakita?

³⁴ Nu bamozi mu musa­nganano balalukile buno, nu bango bobungo; nu gatamenyinine kibakita kibakitilaga kazege, akakizizie buno bende nage ku numba nnene za mukota.

³⁵ Nu gabasile ga kindo, ekilue na bakoloboyo ku kabamba ka magala ma musanganano;

³⁶ kubuno musanganano wamuyangile kumbusa nu bavuaga batenda bune, Endazi na wozo muntu.

³⁷ Nu gabeide Paolo nteingizibua mu numba nnene za mukota, abuzizie wozo mukota bune, Ndi ninatenda kuguli? Amubuide bune, Ndi wizi kiGeleka?

³⁸ buno ndi ta uwe uwozo muEzipeto wakitaga miango mu bindi bibino? nu wendile na bantu bakuka tununu tunazi mu kalula nubo bamanagua Beiti?

³⁹ Tondo Paolo atendile bune, Nne nili muYuda, muntu wa Taliso wa Kilikia, wozo muino tamukeke: nkukusega buangato buno, nitende na babano bantu.

⁴⁰ Nu gamukasile buangato bua kutenda, Paolo, emene ga kindo, nu abatengezezie kuboko nu gabeikeide kibibi, abatendede mu mutendezi wa kiEbelo.