Misako 20 - Nouveau Testament en Kilega

Paolo Ekuenda ku Makedonia nu ku Bageleka.

¹ Nu gasilile mulubu, Paolo amanine beigisibua nu abanine, alagene nabo, nu atukile, nu endile ku Makedonia.

² Nu atingile mu zezo ndenge, nu anine beingi, nu abasile ku Geleka.

³ Nu eikeide kuko miezi isatu, nu baYuda bamukalide luango luakumukata, atundaga kuenda na buato ku Sulia, nu akengede kusubia mu nzila za Makedonia.

⁴ Bantu bendaga nabo ku Asia, babezaga Sopato wa ku Beloya, muana wa Pulo; nu Alisitako nu Sekundo bantu ba Tesalonike; nu Gayo wa Delebe, nu Timoteo: nu Tukiko nu Tulopimo ba ku Asia.

⁵ Tondo babo bantu ba­tutangile, nu batulindide ku Telua.

Paolo Ese ku Telua.

⁶ Nu isue beinyene tuendile ku kitatenge kutukila ku Filipo kusila kua bindi bia tumpampa tutagaga; tuabasile ku Telua ku bindi bitano, nu tuikede kuko bindi mutuba kamo.

⁷ Nu ku busi bua kulinga buizinga, tuakundamene buno tubu­ngule tumpampa, nu Paolo abasambalide nu atundaga kuenda busi buibili mu nindunindu; tondo atendile bitondo biage bingi aba nu munkatini mua kindi.

⁸ Nu bubo busio bua kuigulu kutuabezaga tuakundamana muabezaga tusuku tuingi tuagulumina.

⁹ Mua­bezaga musikila umozi eikalide geitengu lia numba izina liage Eutuko, nu azenzede na tulo, nu gabeide Paolo alengelelua na kuigisia, nuwe alengeledue na tulo akolokile gansi kutukila ku nkiko zisatu kuigulu, nu bamuzanzuide akua.

¹⁰ Nu Paolo agelile, aguide gantatawe, amukatile na maboko mage ababuide bune, Tamunakita kazege; kubuno ekikili na kalamo.

¹¹ Nu abakamine lingo kuigulu, nu abunguide tumpampa, nu alile, nu asambeide lingo nabo nkungu ndazi aba nu gakeide busi, nu endile.

¹² Nu bavule na musikila eli na kalamo, nu babibile nunse.

Paolo Ekuenda ku Mileto.

¹³ Tondo isue, tualingile kuenda na buato aba ku Aso, tuatu­ndaga kusekela Paolo: kubuno ubuatulagile, atundaga kuenda na magulu.

¹⁴ Nu atusangile ku Aso, tuamusekede, nu tuavule ku Mitulene.

¹⁵ Nu gatuatukile gago na buato, tuabasile buigi na Kio; nu ku kindi kia bibili tuabasile ku Samo; tuikede ku Tuligulio, nu ku kindi kia bisatu tuabasile ku Mileto.

¹⁶ Kubuno Paolo akengelaga kutinga ku Efeso na buato, kubuno anavua kuizizia mu Asia; kubuno alemaninaga kusasia, buno abase ku Yelusalema ku busi bua Pentekoste ndi buakulungana.

Paolo Ekulaga Bakulu ba ku Efeso.

¹⁷ Kutukila ku Mileto asingile muntu ku Efeso, buno amane bakulu ba ekelezia.

¹⁸ Nu gababasile kueli ababuide bune, Inyue benyene muizi, kutukila busi butangi bunabasile muno ku Asia, lukita lukizi lunabezaga nalo kueinyu bindi binsania,

¹⁹ na­kitilaga Mukota mu kuibotia kunsania, nu nakulila, nu malindiko manalindikilue ku kabamba ka misona za baYuda;

²⁰ nu nsiakule boba bua kumusambalila bunsania bunamukasia, tondo namuigisizie kuabezaga bantu bansania, nu ku numba na numba,

²¹ nalo­ngekelaga baYuda nu baGeleka kuiyania ku Kalaga, nu kuba na bukatizio ku Mukota weitu Yesu Klisto.

²² Unguililazi, kano kaluma nkuenda ku Yelusalema kunasindikua na mutima, nsizi bunamoneko kuko:

²³ tondo nizi buno Muuza Wasililila eku­ndongekela ku muino na muino, nu ekumbula buno bikando nu mbabazio zikundindila kuko.

²⁴ Tondo nsikukengela buno ka­lamo kane keli kena, nu takeli na bukunza kundi kutinga kuzi­ndilizia lugendo luane, nu mulimo unakasilue na Mukota Yesu, nu takatinga kusambala musagu musoga wa mponga za Kalaga.

²⁵ Kano kaluma, unguililazi, nizi buno, inyue bansania banabezaga nabo nu kusambala musagu wa bukota, tamukamonako lingo.

²⁶ Kubuno nkumulongekela mu busi bua lelo buno, nenga kubuno nsili na kabamba ku mikila za bantu bansania.

²⁷ Kubuno nsiakutilue na kumusambalila kusombola kunsania kua Kalaga.

²⁸ Idangazi, nu langazi kikio kibombo kinsania, Muuza Wasililila amubikidekio, buno mube balangi bakio, nu kulisia ekelezia lia Mukota liakunzile na mikila zage.

²⁹ Nizi buno, ganabe nenda kuane kuli ngozi nkali zikavua munkatini mueinyu zikabala­ngania kibombo;

³⁰ nu kumuli kukaba bakabula bantu buteligo, kuluta beigisibua buno babayange.

³¹ Ku bubuno kesiazi ntende, nu mukengele nsiamenkile kumuana miaka esatu kukengelezia muntu na muntu mu kindi nu mu musi ku kulila.

³² Kano kaluma nkumusiga mu maboko ma Kalaga, nu mu idagi lia mponga zage, linavuama kumukuzia, nu kumukasa bupieni na basuagibua bansania.

³³ Nsiatonezie muntu feza, aba olo, aba nsulu zage.

³⁴ Inyue muizi buno maboko mamano makitile buneiyaninaga, nu ku bansania banabezaga nabo.

³⁵ Ku bubuno bunsania namulo­lesia kisusania kia kukokomezia mulimo, buatunganana kukasia batamba, nu kukengela malagi ma Mukota Yesu atendile we wenyene bune, Kukasana kukubogiabogia ku kukasua.

³⁶ Nu gasilile kutenda bubo, akomine mazu gansi nu asegile na bansania.

³⁷ Nu bansania balilile bubibu, nu bakumbatide Paolo, nu bamulagile,

³⁸ babede na kabebe kuiyuki liatendile bune, Tamukamonako lingo. Nu bamuelekezizie ku buato.