Misako 2 - Nouveau Testament en Kilega

Kuvua kua Muuza wasililila.

¹ Nu gakukile busi bua Pentekoste, bansania babezaga gamozi mu kiziki kimozi.

² Nu kitangala besi iyuki liatukile muigulu anga lumpumpu lukupupa na magala, nu luizazizie numba insania zibekalaga muzo.

³ Nu ndami zamonekile kubeli zedonganizie, anga ndami za keiya zaguluminine gantata ga muntu na muntu kubeli.

⁴ Beyalile bansania na Muuza Wasililila, nu balingile kutenda kuingo mitendezi, anga buabakasile Muuza buno batende.

⁵ Ku Yelusalema kuabezaga baYuda, bantu beisanana, ba mu bilongo binsania bia ga kisi.

⁶ Umpanga gonguilue kuiyuki lilino, musanganano wakundamene, bangamine, kubuno na muntu na muntu nagongule kubekutenda nawe nawe mu wage mutendezi wenyene.

⁷ Baganineganine nu bansania bangamine, batendile buabo buabo bune, Unguililazi, babano bansania bekutenda ndi tabeli ba Galela?

⁸ Buno bubuno, isue tungua muntu na muntu mu mutendezi weitu gutuabutilue nago?

⁹ WaPaliza, nu waMeda, nu waElamita, nubo bakuikalaga mu Mesepatamia, mu Yudaya, nu Kapadokia, Ponto nu Asia,

¹⁰ nu Falugia, nu Pamufuligia, Ezipeto nu ndenge za Libia buigi na Kulene, bageni batukaga ku Lomo, baYuda nu bagalukile,

¹¹ baKulote, nu baAlaba, tungua beku­tenda mu mitendezi zeitu milimo minene za Kalaga.

¹² Nu bansania bangamine, nu tabamenyine bubatenda, batendile buabo buabo bune, Buisulilua bukizi bua bubuno?

¹³ Bango basekile, batendile bune, Bakatua na maku meituba.

Petelo Ekubula Bantu bua Yesu Mukuluzi Wabo.

¹⁴ Tondo Petelo, emanukile na babo ikumi nu umozi, alalukile neiyuki bune, Bamulume ba Yudaya nu bansania ba kuikalaga mu Yelusalema, menyazi bubuno, nu unguililazi bunkutenda.

¹⁵ Kubuno babano tabakatua na maku, anga bumukukengela; kubuno zili nkungu isatu za busi;

¹⁶ tondo bubuno, ububo buatendagua na mulengania Yoele bune,

¹⁷ Bukaba mu bindi bia kuzinda, ubuatenda Kalaga, Nkakubula Muuza wane ku bantu bansania: Nu bana beinyu, bamukazi nu bamulume bakalengania, Nu basikila beinyu bakamona ku tulolesio, Nu bakungu beinyu bakakesia na ndozi:

¹⁸ Ububo mu busi bubo nkakubulila bakambi bane bamulume nu bakikulu Muuza wane, nu bakalengania.

¹⁹ Nu nkalolesia maganogano muigulu, Nu tulolesio mu kisi; Mikila, nu keiya, nu mukungu wa muki:

²⁰ Kisongo kia busi kikagaluka kapilo, Nu muezi ukaba mikila, Gakaba busi bua Mukota tabuika, Buli busi bunene buamaganogano:

²¹ Nu bukaba buno, unsania ukasegaga muizina lia Mukota nti akonibua.

²² Bamulume balsalele, unguililazi bubuno: Yesu wa Nazaleta, wono walolesizibue kumuli na Kalaga ku migeleko mingi, nu ma­ganogano, nu tulolesio tuakitile Kalaga ku maboko mage kumuli, anga bumuizi nuinyue;

²³ wono, agabuidue ku luango luakalilue nu luamenyinue wakalazi na Kalaga, muamutakile, nu muamuitile ku maboko ma bantu beteli na mulembe;

²⁴ nuwe, Kalaga amu­yukizie, nu akanduide lubaba lua lukuo: kubuno tabuakulungene asigale nalo.

²⁵ Kubuno Davidi atendile musagu wa Mukota bune, Namonine ku Mukota bindi binsania; Kubuno eli ku kuboko kuane kuaseidume, buno nsitengetenge:

²⁶ Ku bubuno mutima wane watananizibue, nu lulami luane luabogilebogile; Nu lingo mubili wane wikale mu kilemanizio:

²⁷ Kubuno ntukansiga nnenyene mu Kiziki kia Bakuzi, Aba ntukaziga Wasililila wobe abole.

²⁸ Wanigisia nzila za kalamo; Ukanizazia na mbogimbogi kuobe.

²⁹ Mibuto zane, nsigazi tanga nimuatulile, musagu wa Tateiste Davidi, buno akule, nu ayikilue, nu nsinda zage zili kueitu aba nu lelo.

³⁰ Umpanga ku kuba eli mulengania wa bulili, nu eizi buno, Ka­laga alumbide kilumbilo buno, kutukila ku kikanga kiage, akasakika umozi, buno eikale mu kisumbi kia bukota buage;

³¹ amonine ku bubuno wakalazi, atendile kuiyukilo lia Klisto, buno ntasigede mu kiziki kia Bakuzi, aba mubili wage tawabolile,

³² Wono Yesu, Kalaga amuyukizie, nu isue bansania tuli balongeki balio.

³³ Nu asakikilue aba ku kuboko kua Kalaga kuaseidume, nu kukasua idagano lia Muuza Wasililila kulsi, akubuide wono, umukumonako kano kaluma nu kugungua.

³⁴ Kubuno Davidi ntabakamine ku meigulu: tondo we wenyene atendile bune, Mukota abuide Mukota wane bune, Ikala ku kuboko kuane kuaseidume.

³⁵ Aba nu gawangate beiti bobe.

³⁶ Kikanga na kikanga kia Isalele, kimenye bulili buno, Kalaga abikile wono Yesu umuatakile, kuba Mukota nu Klisto.

Bagalukizie Mitima Zabo.

³⁷ Gabongule ku bubo bakutukile mitima, nu babuide Petelo nu bango basingua bune, Mibuto zeitu, buni butukita?

³⁸ Nu Petelo ababuide bune, Iyaniazi nu mubatizibue muntu na muntu muizina lia Yesu Klisto kutikibua misako za buagi bueinyu; nuinyue mu­akasue lukaso lua Muuza Wasililila.

³⁹ Kubuno kumuli kuli idagano, nu ku bana beinyu, nubo bansania beli bulazi, nu bansania bakamanua na Mukota Kalaga weitu buno bamuvuile.

⁴⁰ Nu abalongekede nu mango moki meingi, nu abanine, nu atendile bune, Iyoniazi ku kibuti kikino kiabanani.

⁴¹ Nu babo beitabizizie idagi liage babatizizibue: nu batalikidue mu busi bubo bantu bakuka tununu tusatu.

⁴² Babezaga bekuyanga meigisia ma basingua nu bagomanizie, nu kubungula kampampa, nu kusega.

Buakitaga Bakatizia.

⁴³ Na muntu na muntu nawakule boba: nu maganogano meingi nu tulolesio tuakitilue na basingua.

⁴⁴ Nu bansania bakatizizie babezaga gamozi, nu babezaga bekubegania biabo binsania;

⁴⁵ bakunzizie bikulo nu binsania biabo, nu bansania babegene anga buiyaninaga muntu na muntu.

⁴⁶ Nu busi na busi bekokomezizie mu masego gamozi mu numba nnene za kukumbamina, nu kubungula kampampa ku numba na numba, balile idia liabo na mbogimbogi, nu na mutima umozi,

⁴⁷ nu baganunaga Kalaga, nu kutananizia bantu bansania. Nu Mukota abatalikide busi na busi ku babo bonibagua.