Misako 19 - Nouveau Testament en Kilega

Paolo Eli ku Efeso nu Beigisibua ba Yoana Bakatizia Yesu.

¹ Gabezaga Apolo mu Kolinto, Paolo atingile ku kisi kia kuntata abasile ku Efeso, amoneneko na beigisibua bamozi:

² nu ababuzia bune, Ndi muakasilue Muuza Wasililila gamuakati­zizie? Nu bamubuide bune, Kilo, tatuongule buno Muuza Wasililila eliko.

³ Nu ababuzizie bune, Muabatizizibue ku bubatizio bukizi? Nu bamubuide bune, Bubatizio bua Yoana.

⁴ Nu Paolo ababuide bune, Yoana abatizizie bubatizio bua kuiyania, kubuno atendile bantu buno, bakatizie wozo ukavua kumbusa kuage, u Yesu.

⁵ Nubo gabongule ku bubo, babatizizibue muizina lia Mukota Yesu.

⁶ Nu gasilile Paolo kubabika maboko geitoe, Muuza Wasililila abavuilide, nu balingile kutenda ku mitendezi, nu kulengania.

⁷ Nu babezaga bakuka bamulume ikumi nu babili.

⁸ Nu eingide mu numba za musanganano, nu atendile na magala mu miezi isatu, nu abanine nu kubaluta mu musagu wa bukota bua Kalaga.

⁹ Tondo bango babezaga na mitima mibibu nu taba­katizizie, nu balingaga zezo Nzila za Kalaga ku musanganano, nu atukile, nu alekanukizie babo beigisibua, nu abeigisizie busi na busi mu kigilo kia Tulano.

¹⁰ Nu akitile bubo ku miaka ibili; nu bansania beikalaga mu Asia bongule kuidagi lia Mukota, baYuda nu baBilongo gamozi.

Paolo Ekukita bua Maganogano.

¹¹ Nu Kalaga akitile migeleko mingi ku maboko ma Paolo:

¹² bubo batolede basambi nsulu nu tube tua nsulu tuitubagia kuto, nu nsambo zonine nu basumbu babi batukile mubeli.

¹³ Nu bantu bamozi ba baYuda, babezaga bagila, nu nako nako kubendaga, bagelekile kutekula izina lia Mukota Yesu ku babo babezaga na basumbu babi, nu batendaga bune, Tukukulumbilizia muizina lia Yesu, wozo ukutekulua na Paolo,

¹⁴ Nubo babo bakitaga bubo babezaga bana mutuba kamo ba muntu umozi muYuda, izina liage Sekua, nuwe abezaga sankoga munene.

¹⁵ Nu wozo musumbu mubi ababuide bune, Yesu nimuizi, nu Paolo nimuizi; tondo inyue muli banazi?

¹⁶ Nu wozo wabezaga na musumbu mubi amubakamine, nu abasolobokede bubeli babili, nu abakindile, nu babasile mu zezo numba lubilo, nu bavule bese mundulu nu na biulu.

¹⁷ Nu musagu wono wamenyinue na ba Yuda nu baBilongo, babezaga ku Efeso; nu bansania babeide na boba bunene, nu izina lia Mukota Yesu liaganuinue.

¹⁸ Nu beingi bakatizizie bavule, kuigonga nu kulolesia misako zabo.

¹⁹ Nu beingi ba ku babo babezaga bagila bakungikile mikanda zabo, nu bavule nazo ku bantu bansania, nu bazigisizie; gabaganzile bukunza buazo bamonine buno buli tununu makumi matano tua feza.

²⁰ Bubo idagi lia Mukota litide nu liakindile nunse na magala.

Paolo Ekutunda Kuenda ku Loma.

²¹ Nu kusila kua bubo, Paolo akengede buno, atinge ku Make­donia nu ku Akaya, bubo nti enda lino ku Yelusalema, atendile bune, Kungua nabasa kuko, buantunganana kubasa ku Lomo.

²² Nu gasingile bantu babili kuenda ku Makedonia, ku babo bamukambilaga, Timoteo nu Elasito, we wenyene asigede bindi bimozi ku Asia.

Bantu ba Efeso Bekusakia Paolo.

²³ Ku nkungu zezo kuabeide miango minene ku kitondo kia Nzila za Kalaga.

²⁴ Kubuno kuabezaga muntu umozi, izina liage Demetelio, abezaga mutumbi wa feza, we akitaga tuamasio tua feza tua Diana, amonene bango batumbi mutali muingi,

²⁵ akunda­manizie bango, bakitaga mulimo anga wono, nu abatendile bune, Bamulume, muizi buno mu mulimo wono bugumi bueitu bukusila.

²⁶ Nu lingo mukungua nu mukumona buno, ta gano kankanka ku Efeso, tondo nu mu kisi kia Asia kinsania, wono Paolo alubikania bantu beingi abagalukia, nu atendile bune, Bibio bikukitua na maboko ta tulaga:

²⁷ nu ta milimo zeitu tugu kankanka uzabengua, tondo nu numba za kukumbamina mukikulu munene Diana zabe­ngue, nu buangato bua wono ukukumbaminagua ku kisi kinsania kia Asia, nu kisi kinsania kikumukumbamina.

²⁸ Nu gabongule kububo, bobansania bongilue, nu balalukile bune, Diana wa baEfeso umunene!

²⁹ Nu muino unsania walubikene: nu beitumine lubilo ku numba za meiya na mutima umozi, bakatile Gayo nu Alisitako, babo ba ku Makedonia bendaga na Paolo.

³⁰ Nu Paolo atundaga kuingila munkatini mua bantu, tondo beigisibua taba­zigile buno eingile.

³¹ Nu bantu bamozi bakulu ba Asia babezaga beida bage, bamusingide musagu buno ntende ku numba za meiya.

³² Umpanga bamozi balalukaga buno, nu bango bobungo: kubuno musanganano walubikene nunse; nu beingi tabamenyinine buba­kundamana.

³³ Nu batolile Alesandelo munkatini mua musa­nganano, nu baYuda bamusindikile lisa na bantu. Nu Alesandelo atengezie kuboko, kubuno atundaga kutenda ku bantu.

³⁴ Tondo gabamenyinine buno eli muYuda, bansania balalukile anga nkungu ibili, batendile bune, Diana wa baEfeso umunene!

³⁵ Nu wozo wabezaga musanzi wa mu muino wozo, abotezie musanganano, atendile bune, Inyue bamulume baEfeso, nazi muntu uteizi buno muino wa Efeso ugukulangaga numba za kukumbamina za Diana munene, nu nkisi zeno zakolokile kuigulu kutuka ku lukenikeni Yupita.

³⁶ Kubuno bubuno tabunakanibua, ikalazi kibibi, tamu­nayangilila bubuno.

³⁷ Kubuno muavule na bamulume babano tabeibile bia mu numba za kukumbamina, aba tabalingile kalaga keitu ka mukikulu.

³⁸ Umpanga ndi Demetelio nu batumbi beli nage, ndi beli na mulondo na muntu, nti nusu za milondo zili, nu ngatu beliko: kasi basongelane.

³⁹ Tondo ndi mualonda ingo milondo, kasi nti zikalondolelua ku ungo musanganano wa lusungio.

⁴⁰ Kubuno tuli na boba kusongelua ku wono mulondo wa lelo, kubuno taguli na kabamba: tatunamenya kusambala mulondo wono unsania.

⁴¹ Nu gasilile kutenda bubo abalanganizie musa­nganano unsania.