Misako 18 - Nouveau Testament en Kilega

Paolo Eli ku Kolinto,

¹ Kusila kua bubo Paolo atukile ku Atena, nu endile ku Kolinto.

² Nu amonine ku muYuda umozi izina liage Akuila, abutidue ku Ponto, nuwe atukilaga ku kisi kia Itali na mukikulu wage Pilisikila, kubuno Kalaudio akakizizie baYuda bansania kutuka ku Lomo: nu Paolo abendede;

³ nu kubuno mulimo wabo wa kuluka wabezaga wasusania, eikeide nabo, nu bakitile mulimo gamozi, kubuno babezaga baluki ba numba za nsulu.

⁴ Nu eigisizie mu numba za musanganano busi na busi bua sabato, nu agelekile kugalukia baYuda nu baGeleka.

⁵ Tondo gabasile Sila nu Timoteo batukaga ku Makedonia, nu Paolo alindizie mutima, nu alongekede baYuda bune, Yesu u Klisto.

⁶ Nu gabamuendezie miango nu kulinga Kalaga, atituide nsulu zage nu abatendile bune, Mikila zeinyu zibe gantata ga matoe meinyu; kubuno nne nenga; kutukila kano kaluma nkuenda ku baBilongo.

⁷ Nu atukile kuko, nu eingide mu numba za muntu umozi, izina liage Tito Yoseto, akumbaminaga Kalaga, numba zage zabezaga zalandikana na numba za musanganano.

⁸ Nu Kulisipo, abezaga muangati wa numba za musanganano, akatizizie Mukota nu ba numba zage bansania; nu baKolinto beingi gabongule ba­katizizie, nu babatizizibue.

⁹ Nu Mukota atendile na Paolo mu kindi ku kalolesio bune, Ntunakua boba, tondo tendaga tugu, nu ntuikale kibibi:

¹⁰ kubuno nili nobe, nu takuli muntu wakulibule aba kukuita: kubuno nili na bantu beingi mu wono muino.

¹¹ Nu eikede kuko muaka nu miezi mutuba kubeli, nu abeigisizie idagi lia Kalaga.

¹² Tondo gabezaga Galio mukota wa Akaya, baYuda bakatile Paolo bavule nage ku kisumbi kia lusungio,

¹³ bamutendile bune, Muntu wono asila kuigisia bantu bayange Kalaga buteli mulembe.

¹⁴ Tondo Paolo atundaga kutenda, Galio atendile baYuda bune, Gabunabede mibi aba buagi, songo ninamunguilide inyue baYuda;

¹⁵ tondo ndi buli mbuzio za moki nu meina nu mulembe weinyu, kasi longekazibo inyue benyene; kubuno nsili ngatu za bubuno.

¹⁶ Nu abeimbizie buno batuke buigi na kisumbi kia lusungio.

¹⁷ Nu bansania bakatile wozo Sosetene, muangati wa numba za musanganano, nu bamulibuide gansi buigi na kisumbi kia lusungio, nu wozo Galio ntangile bubo.

Paolo Atuka ku Kolinto,

¹⁸ Nu Paolo, eizizizie kuko, alagene na mibuto zage, nu endile na buato ku Sulia; nu Pisikila nu Akuila bendile nage; nu gasilile kuibega mumpugu kuko ku Kenekelea; kubuno alumbide buno akite bubo.

¹⁹ Nu gababasile ku Efeso, nu abasigile kuko: nuwe wenyene eingide mu numba za musanganano, nu eigisizie baYuda.

²⁰ Nu gabatundaga buno eizizie nabo, tondo we ntazigile;

²¹ tondo alagene nabo bune, Nasubie lingo kumuli ndi Kalaga atunda, atukile na buato ku Efeso.

²² Gabasile ku Kaisalia, abakamine ku Yelusalema, asekede baekelezia, nu agelile ku Antiokia.

²³ Nu geizizizie kuko, atukile nu atingile mu kisi kia Galatia, nu ku Fulugia na muino na muino, kulindia beigisibua.

Apolo Eli ku Efeso.

²⁴ Nu muYuda umozi izina liage Apolo, abutidue ku Alesandelia, muntu wabezaga na luatu avule ku Efeso; nuwe abezaga mubibu mu masanzo nunse.

²⁵ Wozo muntu eigisizibue nzila za Mukota; nu kubuno abezaga neiyilili, alingile kutenda nu kuigisia nunse musagu wa Yesu, abezaga eizi tugu bubatizio bua Yoana;

²⁶ nu alingile kutenda mu numba za musanganano na luatu. Tondo gongule Pilisikila nu Akuila bendile nage ku numba zabo, bamusa­mbalide nzila za bulili za Kalaga.

²⁷ Nuwe atundaga kusoka kitatenge buno ende ku Akaya, mibuto zage bamukakizizie, nu basanzile mukanda kuabezaga bango beigisibua buno nti bamuse­kela: nu gabasile, akasizie babo bakatizizie mu mponga;

²⁸ kubuno akindile baYuda, nu bantu bansania nti bekumona, abalolesagia mu masanzo buno, Yesu u Klisto.