Misako 17 - Nouveau Testament en Kilega

Paolo nu Sila Bekulinga Mulimo ku Tesalonike.

¹ Umpanga batingile ku Amfipoli nu ku Apolonia, nu ba­basile ku Tesalonike, nu kuabezaga numba za musanganano wa ba Yuda:

² nu Paolo eingide, anga buagomizie kukita, nu ku bindi bisatu bia sabato, asambede nabo mu masanzo,

³ asambede, nu alongekile buno buatananine Klisto kubabazibua, nu kuyuka ku bakuzi; nu wono Yesu, unkumusambalila musagu wage, u Klisto.

⁴ Nu bamozi bakatizizie, nu bagomezie na Paolo nu Sila; nu baGeleka beingi nu bakulu beingi.

⁵ Tondo baYuda, beingi babeide na lugi, beitolide bantu babi ba nkita mbi nunse, nu ba­kulumanizie musanganano, nu bakitile kazege mu muino unsania; nu bakindukile ku numba za Yasono, kubuno batundile kubuluta Paolo nu Sila ku bantu.

⁶ Tondo gabatabasangilemo babulutile Yasono nu mibuto zage ku bakota ba mu muino, balalukile bune, Bantu babano bagalukia kisi bavua gano;

⁷ nu Yasono abasekede: nubo bansania basigile milembe za Kaisa, bekutenda buno, kuli ungo Mukota ukumanua Yesu.

⁸ Nu musanganano nu bakota ba mu muino, gabongule ku bubuno bongilue.

⁹ Nu gabatolile muima ku Yasono nu bango, babamenkede.

Paolo nu Sila Beli ku Beloya.

¹⁰ Kazanga kongo mibuto zabo basingile Paolo nu Sila munkatini mua kindi ku Beloya; nubo gababasile kuko beingide mu numba za musanganano wa baYuda.

¹¹ Bantu babano babezaga basoga kutinga baTesalonike, kubuno basekeide idagi neiyilili mu mutima, nu busi na busi balolaga mu masanzo, buno ndi bubuno buligo.

¹² Ku bubuno bantu beingi kubeli bakatizizie; nu bakikulu ba baGeleka bekuanzua nu bamulume beingi.

¹³ Tondo gongule baYuda ba ku Tesalonike ku misagu, buno Paolo ekusambala idagi lia Kalaga ku Beloya, bendile kuko kubalangania musanganano.

¹⁴ Nu kazanga kongo mibuto zage basingile Paolo kuenda ku kitatenge: tondo Sila nu Timoteo basigede gago.

¹⁵ Tondo babo belekazagia Paolo bendile nage aba ku Atena: gabongule ku kuka­kizia kua Paolo kuasingile ku Sila nu Timoteo buno basasie kuvua, bendile.

Paolo Eli ku Atena.

¹⁶ Umpanga Paolo gabalindide ku Atena, mutima wage winine nunse gamonine ku lukita luiyala wozo muino na nkisi ningi.

¹⁷ Umpanga akanizanizie na baYuda nubo banzaga Kalaga mu numba za musanganano, banzile Kalaga, nu mu isoko bindi binsania na babo bakulumene nage.

¹⁸ Nu batundi ba menge bamozi baEpukulilo nu baStoiko, bakulumene nage. Nu bamozi batendile bune, Muntu wono eizi buingi, buni buakutunda kutenda? bango batendile bune, Akumoneka anga musambazi wa misagu za tungo tulaga tututeizi: kubuno abezaga ekubasambalila musagu wa Yesu nu iyukilo.

¹⁹ Nu bamukatile, bendile nage aba ku Aleopago, batendile bune, Ndi tunavuama kumenya meigisia mamano mango makusambalua meli buni?

²⁰ Kubuno walusia bungo buteizi: tukutunda ku­menya buisulilua bua bubuno.

²¹ (Kubuno baAtena nu bageni babezaga kuko, tababezaga na bungo, umpanga kusambala aba kungua kuingo misagu.)

Paolo Ekusambalila baAtena Musagu wa Yesu.

²² Nu Paolo emene mu Aleopago nu atendile bune, Inyue bamulume baAtena, mu bunsania nkumona buno, muli na mpala ningi.

²³ Kubuno ganatingile namonine ku bibio bimukuku­mbamina, nu namonine ku kiziki kia kayulo kiasanzua buno, KU KALAGA UMUTAKUMENYA. Umpanga wozou mukukumbamina nu tamukumumenya, uwozo unkumusambalila musagu wage.

²⁴ Ka­laga wozo wabikile kisi nu igulu, nu binsania bilimo, kubuno eli Mukota wa muigulu nu kisi, ntaneikala mu numba zakitilue na maboko ma bantu;

²⁵ aba ntakukitilagua na maboko ma bantu, anga buno ekuiyaninaga kampa, kubuno wenyene ukukasaga ba­nsania kalamo, nu muuza, nu binsania;

²⁶ nuwe mu muntu umozi akitile kilongo na kilongo kia bantu, buno beikale ga kisi kinsania, nu asilile kubika nkiko zakakizizie kutuka wakalazi, nu miaga za biziki biabo;

²⁷ buno balonde Kalaga, nu kubabata babata buno embe banamumonako, nuwe nteli bulazi ku na muntu na muntu mutuli:

²⁸ kubuno mueli tukulama, nu tukutabanga, nu tuli na kalamo keitu; anga buasanzile basanzi beitu bune, Kubuno isue bansania tuli kikanga kiage.

²⁹ Umpanga ndi tuli kikanga kia Kalaga, ta busoga kumukengela buno, Kalaga eli anga olo, aba feza, aba ikozi liabazilue na menge ma makengelo ma bantu.

³⁰ Nkungu zezo za bukongolo Kalaga ntazilolaga; tondo kano kaluma akakizia bantu bansania ku biziki binsania beiyanie:

³¹ kubuno abikile busi buakasungia kisi mu kuisanana, ku muntu wabikile ku mulimo wono; nu akasile bantu bukatizio, kubuno amuyukizie mu bakuzi.

³² U mpanga gabongule ku musagu wiyukilo lia bakuzi, bamozi basekile; nu bango batendile bune, Tuakunguilile lingo ku wono musagu.

³³ Bubo Paolo abasile nu abasigile.

³⁴ Tondo bantu bamozi bamuyangile, nu bakatizizie, munkatini muabo muabezaga wozo Dionusio wa Aleopago, nu mukikulu umozi izina liage Damali, nu na bango bantu.