Misako 13 - Nouveau Testament en Kilega

Muuza Wasililila Ekumana Balanaba nu Saolo.

¹ Mu ekelezia lia Antiokia muabezaga balengania nu basozi u babano, Balanaba, nu Simiona wamanagua Nige, nu Lukio mu Kulene, nu Manaene muida wa mukota Helode, nu Saolo,

² nubo gabakambide Mukota nu tabaliaga Muuza Wasililila atendile bune, Mbikilazi Balanaba nu Saolo ku mulimo wozo gunabamanine kugo.

³ Bubo, gabasegile nu kutalia bababikile maboko geitoe nu babasingile buno bende.

Saolo nu Balanaba Bekuenda ku Kusambala.

⁴ Nubo, basingilue na Muuza Wasililila, bendile ku Sulukia; nu kutuka kuko bendile na buato ku Kupulio.

⁵ Nu gababezaga ku Salameni, basambede musagu wa Kalaga mu numba za misanga­nano za baYuda: nu Yoana abakitilaga.

⁶ Nu gabasilile kutinga mu biziki binsania bia kisanga aba nu ku Pafo, bamonine ku muntu umozi mugila, mulengania wa buza, muYuda, izina liage, Bala­Yesu;

⁷ wabezaga gamozi na muangati Segio-Paolo, muntu wa menge. We uwamanine Balanaba nu Saolo buno bavue kueli, atundile kungua kuidagi lia Kalaga.

⁸ Tondo Elemasi, wozo mugila (kubuno bubo ubukuisulua izina liage), endile miango nabo, atundaga kugalukia wozo muangati buno asige bukatizio.

⁹ Tondo Saolo, nuwe lingo eli Paolo, eiyeide na Muuza Wasililila, amulolile kisozi,

¹⁰ atendile bune, Uwe wiyala na menge mansania ma bubi, muana wa Liabo, u Satana, musombi wa kuisanana kunsania, ndi ntualekele nunse kugalukia nzila zisa za Mukota Yesu?

¹¹ Kano ka­luma, kuboko kua Mukota kuli kuguli, nu wabe kiuku, ntuamone ku kisongo kia busi bindi bimozi; kazanga kongo muizi wamubaside nu kapilo; nu atimbiletimbile, nu alondile muntu wa kumukata ku kuboko nu kumusondelezia.

¹² Nuwe muangati, gamonine ku bubo buakitua, akatizizie, angamine na meigisia ma Mukota Yesu.

Paolo Ekubula Bantu Idagi lia Kalaga mu Numba za Musanganano wa ku Antiokia, nu wa ku Pisidia.

¹³ Umpanga Paolo nu banyage batukile ku Pafo na buato nu babasile ku Pelega mu Pampulia; nu Yoana abasigile, nu asubizie ku Yelusalema.

¹⁴ Tondo babo, gabatukile ku Pelega, bendile ku Antiokia wa Pisidia; beingide mu numba za musanganano busi bua sabato, nu beikeide gansi.

¹⁵ Nu gasilile kusomua mulembe nu mikanda za balengania, nu bangati ba numba za musanganano babasingide muntu, batendile bune, Mibuto zeitu, ndi mukuana babano bantu, nti muatenda.

¹⁶ Nu Paolo emanukile, abatenge­zezie kuboko, atendile bune, Bamulume balsalele, nu inyue baku­anzaga Kalaga, unguililazi:

¹⁷ Kalaga wa bantu babano balsalele asombuede batateisue, nu asakikile bantu babezaga bageni mu kisi kia Ezipeto, nu ku kuboko kua magala abasondelezizie buno batuke kuko.

¹⁸ Nu abalisizie miaka makumi manazi mu kalula.

¹⁹ Nu gasilile kuita bilongo mutuba kamo bia kisi kia Kanana, abakasile kisi kiabo buno kibe bupieni buabo miaka nkama inazi nu makumi matano:

²⁰ nu kusila kua bubo abakasile ngatu aba nu kuika ku mulengania Samuele.

²¹ Nu basegile buno babe na mukota: nu Kalaga abakasile Saolo muana wa Kishi, muntu wa kilongo kia Benzamini, ku miaka zakuka makumi manazi.

²² Nu gamuti­kizie, asakikile Davidi buno abe mukota wabo; nu bubo amulo­ngekede nu atendile bune, Namona ku Davidi muana wa Yese, wamulume wantananizia, ukakita kusombola kuane kunsania.

²³ Kalaga asombuede kikanga kia wamulume wono asakikide balsalele Monia, uwono Yesu, anga bualagile;

²⁴ gabezaga Yoana ekusa­mbala musagu ku bantu bansania halsalele wa kubatizia kua kui­yania nti ntevua.

²⁵ Nu gabezaga Yoana esasililizia mulimo wage, atendile bune, Mukukengela buno nili nazi? Nsili wozo. Tondo unguililazi, kumbusa kuane kuavue umozi, nunne nsinatananina kukandula bisalapata bia magulu mage.

²⁶ Mibuto zane, bana ba kikanga kia Abalahama, nuinyue bekuanzaga Kalaga, musagu wa lonio luluno wasingilue kutuli.

²⁷ Bekuikalaga mu Yelusalema nu bangati babo, kubuno tabamenyine wono aba moki ma balengania mekusomagua busi na busi bua sabato, bamazindilizizie mu kumu­sungia.

²⁸ N u tabamonine ku bumozi buanakuila, tondo basegile Pilato buno, amuite.

²⁹ Nu gabasilile kuzindilizia bunsania buasanzidue, bamugezizie ku muti, nu bamubikile mu nsinda.

³⁰ Tondo Kalaga amuyukizie ku bakuzi:

³¹ nu amonekileko bindi bingi na babo bavuaga nage kutukila ku Galela aba nu ku Yelusale­ma, beli kano kaluma balongeki bage ku bantu.

³² Nuisue tu­amuvuila na musagu musoga weidagano lialagilue ku batateisue,

³³ Kalaga azindilizie ku bana beitu idagi lilino, gayukizie Yesu ku bakuzi; anga buasanzilue mu luimbo lueibili bune, Uli muana wane, nakubutile lelo.

³⁴ Nu kubuno amuyukizie ku bakuzi, nu ntasubie lingo buno abole, atendile bubuno bune, Nakukase mbo­gimbogi za Davidi.

³⁵ Kubuno atendile mu lungo luimbo, Ntukasiga Wasililila wobe buno abole.

³⁶ Kubuno Davidi gasilile kukitila kibuti kiage mu kusombola kua Kalaga, akule nu abikilue gamozi na beisi, nu abolile:

³⁷ tondo wozo wayukizibue na Kalaga ntabolile.

³⁸ Umpanga mibuto zane, menyazi buno, ku muntu wono mukusambalilua isigililo lia misako za buagi bueinyu:

³⁹ nu mu wono na muntu na muntu unsania wamukatizia nti abingibua mu misako insania, tamunabingibua ku zezo ku mulembe wa Mose.

⁴⁰ Umpanga, idangazi buno bubo buatendile bale­ngania tabumubele,

⁴¹ Unguililazi, inyue babengi, nu muganegane, nu muzimine, Kubuno nkukita mulimo mu bindi bienyu, Ndi muntu ekumusambalilago, tamukukatizia.

⁴² Nu gababasile, babasegile buno babasambalile bubuno bungo busi bua sabato.

⁴³ Nu gabalangene musanganano, baYuda beingi nu bagalukizie mitima zabo ku bulili bayangile Paolo nu Balanaba; nubo, batendile nabo, babalutile kuikala mu mponga za Kalaga.

⁴⁴ Nu gabezaga bungo busi bua sabato, buigi na bantu bansania ba muino bakundamene kungua kuidagi lia Kalaga.

⁴⁵ Tondo baYuda gabamonine ku musanganano, babeide na lugi, nu baka­nizie buatendaga Paolo, nu balingeine.

⁴⁶ Paolo nu Balanaba basambede na luatu bune, Buatananine idagi lia Kalaga lilinge kusambalua kumuli. Tondo kubuno mukulisomba tamukuikengela kutananina kalamo katanakuzinda, unguililazi, tuagaluka ku ba­Bilongo.

⁴⁷ Kubuno ububo butuakakizizibue na Mukota bune, Nakubikile buno ube kiengi kia baBilongo, Buno ube lonio aba kuzinda kua kisi.

⁴⁸ Nu gongule baBilongo bubuno, babogilebogile, nu baganuine idagi lia Mukota: nubo basombuedue ku kalamo katanakuzinda bakatizizie.

⁴⁹ Nu idagi lia Mukota liakukile mu kisi kikio ki­nsania.

⁵⁰ Tondo baYuda balutile bakikulu banzagua, nu bamu­lume banene ba muino, nu balingile kusungia Paolo nu Balanaba, nu babatikizie mu miaga zabo.

⁵¹ Tondo babatitibulide mukungu wa magulu mabo, nu bendile ku Ikonia.

⁵² Nu beigisibua beiya­zizibue na mbogimbogi nu na Muuza Wasililila.