Misako 12 - Nouveau Testament en Kilega

Bekuingizia Petelo mu Kikando.

¹ Mu bindi bibio mukota Helode alingile kusungia bantu bamozi ba ekelezia.

² Nu eitile Yakobo iselenzi wa Yoana na bupanga.

³ Nu kubuno amonine buatananizizie ba­Yuda, akokomezizie nu akatile Petelo. Nu biabezaga bindi bia tumpampa tutagaga.

⁴ Nu gamukatile, amubikile mu kikando, nu amukatizie bakoloboyo ikumi na mutuba buno bamulange; ake­ngelaga kusila kua Kisagulo kiesuluko nti amubasia ku bantu.

⁵ Umpanga Petelo alangilue mu kikando: tondo ekelezia bamuse­gede nunse na komanizia.

⁶ Nu nkungu zezo Helode gatundaga kumutikia busi bubo Petelo abezaga eiyombeka gasamba bakolo­boyo babili, akandua na makoki mabili: nu balangi lisa na luibi balangaga kikando.

⁷ Nu mugenzi wa Mukota emene buigi nage, nu kiengi kiasanine mu busio: alibuide Petelo ku mpege, nu amuyukizie, atendile bune, Sasia kuzanzuka. Nu makoki mabezaga ku maboko mage maketukile.

⁸ Nu mugenzi amubuide bune, Ikande, zuala bisalapata biobe. Nu akitile bubo. Nu amubuide bune, Vuala nsulu zobe, nu unyange.

⁹ Nu atukile nu amuyangile; nu ntamenyine buno buligo bubo buakitaga mugenzi; tondo akengede buno amona tugu ku kalolesio.

¹⁰ Nu gabatingile mulangi mutangi nu wa babili, babasile ku luibi lua kiuma lua kuingilila mu muino; luabegukide loluinyene; babasile kumbuga, nu batingile ku nzila imozi; nu kazanga kongo mugenzi amusigile.

¹¹ Nu Petelo gamenyine, atendile bune, Kano kaluma namenya lebelebe buno Mukota ansingila mugenzi wage nu anonezie ku Helode, nu ku kulindila kua bantu ba baYuda.

¹² Nu gasilile kukengela bubo, avule ku numba za Malia nina wa Yoana, wama­nagua Malako, nu bantu beingi babezaga bakundamana nu bekuse­ga.

¹³ Nu gazumizie ku luibi, mukiti umozi izina liage Loda, avule kunguilila.

¹⁴ Nu gamenyine iyuki lia Petelo, nteguide luibi kubuno abezaga na mbogimbogi, tondo asubizie lubilo nu abatendile buno, Petelo uwemana ku luibi.

¹⁵ Nu bamubuide bune, Uli musile. Tondo eidangizie bubibu, buno buligo. Nu batendile bune, Mugenzi wage tugu.

¹⁶ Tondo Petelo eitide kuzumia: nu gabeguide luibi nu bamumonineko bangamine.

¹⁷ Tondo we abatengezizie kuboko buno beikale kibibi, abasambalide lukita luamutikia Mukota ku kikando. Nu atendile bune, Endazi, musambalile Yakobo misagu zeno, nu mibuto zeitu. Nu atukile, nu endile ku kingo kiziki.

¹⁸ Nu gabeide busi buakia, bakoloboyo bazangilezangile nunse, kuni kuenda Petelo.

¹⁹ Helode gamulo­ndile, nu ntamumonineko, abuzizie balangi, nu abasengezezie buno beitue. N u atukile ku Yudaya nu endile ku Kaisalia, nu eikede kuko.

Kukua kua Helode.

²⁰ Nu ongedue nunse bantu ba Tula nu Sidona: nu bamuvuilide na mutima umozi, nu babezaga bakita bulemba na Balasoto mulangi wa nkiko za mukota za kuiyombeka, nu batundile bubobelelo, kubuno kisi kiabo kialisizibue na kisi kia mukota.

²¹ Nu busi bubo buasombuedue Helode azualile nsulu za bukota, eikeide ga kisumbi kia bukota, nu abasambalide musagu.

²² Nu bantu balalukile bune, Lili iyuki lia kango kalaga, ta lia bantu.

²³ Nu kazanga kongo mugenzi wa Mukota amulibuide, kubuno ntakasile Kalaga lutanu­no; alidue na minsobobo, nu alekeine.

²⁴ Tondo idagi lia Kalaga lietide nunse nu liatalikidue.

²⁵ Nu Balanaba nu Saolo basubizie kutuka ku Yelusalema, gabasilile bugenzi buabo, nu bavule na Yoana wamanagua Malako.