Misako 11 - Nouveau Testament en Kilega

Petelo Ekuibingia ku Basingua Banyage.

¹ Umpanga basingua nu mibuto zabo babezaga mu Yudaya bongule buno baBilongo bese neidagi lia Kalaga nubo.

² Nu Petelo gabakamine ku Yelusalema, babo bamonesibua bendile nage miango,

³ batendile bune, Wingide ku bantu batamonesibua, nu walile nabo.

⁴ Tondo Petelo alingile kubasambalila bukebuke, atendile bune,

⁵ Nabezaga mu muino wa Yopa nkusega: nu nendile kalengoe namonine ku kalolesio, nyungu zagela, anga nsulu nnene zagezibua kutuka kuigulu na zakatua ku ntungo inazi; nu zanvuilide:

⁶ nazilolile kisozi, nakengede, nu namonine ku nyama za kisi zili na magulu manazi, nu nyama nkali, nuzo zikugelegetaga nu tuzoni tua mpelela.

⁷ Nu nongule kuiyuki liantendile bune, Yuka, Petelo; sesa nu gulie.

⁸ Tondo natendile bune, Tabubo, Mukota: kubuno kinsania kili na nsese aba kinteizi, takingilaga mu kanua kane nunse.

⁹ Tondo iyuki lianakuide lingo kutuka kuigulu bune, Biasuagibua na Kalaga ntubimane nsese.

¹⁰ Nu bubuno buabeide mambizi masatu: nu binsania biabakamizibue lingo kuigulu.

¹¹ Nu kazanga kamozi bantu basatu bemanine lisa na numba zituabezaga muzo, basingilue kundi kutuka ku Kaisalia.

¹² Nu Muuza antendile bune, Enda nabo na mutima umozi. Nu babano mibuto zane mutuba nubo bendile gamozi nanne; nu tuingide mu numba za muntu wozo:

¹³ nu atusambalide buamonine ku mu­genzi wemana mu numba zage, nu wamubuide bune, Singa bantu ku Yopa kumana Simona, ukumanua Petelo;

¹⁴ akusambalile bugunona, uwe nu numba zobe insania.

¹⁵ Nu ganabezaga nkitenda, Muuza Wasililila abagelede, anga bualingile kutugelela.

¹⁶ Nu nakengede idagi lia Mukota, buatendile buno, Yoana aba­tizizie na mazi; tondo inyue mukabatizibua na Muuza Wasililila.

¹⁷ Ndi Kalaga abakasile lukaso anga buatukasilelo, gatuakatizizie Mukota Yesu Klisto, nne u nazi, unavuamine kuzugila Kalaga?

¹⁸ Nu gabongule ku bubo bakatile mukobi, nu baganuine Kalaga, batendile bune, Umpanga, Kalaga asila kukasa baBilongo nubo kuiyania buno babe na kalamo.

Ku Antiokia Bekulinga Kumana Bakatizia Buno, Baklisto.

¹⁹ Nu babo babalanganizibue ku nsungio zalingile ku Setefano bendile aba ku Foiniki, nu ku Kupulio, nu ku Antiokia, basamba­laga wozo musagu tugu ku baYuda.

²⁰ Tondo bamozi ba ku babo, babezaga bamulume ba Kupulio nu ku Kulene, nubo babasile ku Antiokia, batendile na baGeleka buno babasambalile musagu wa Mukota Yesu.

²¹ Nu kuboko kua Mukota kuabeide nabo: nu bantu beingi bakatizizie, bagalukide Mukota.

²² Nu misagu zeno za bubo zabasile ku ekelezia liabezaga mu Yelusalema: nu basingile Balanaba buno ende ku Antiokia:

²³ nugue, gabasile, nu kumona ku mponga za Kalaga, abogilebogile; nu anine bansania buno, bagomie na Mukota na mutima umozi;

²⁴ kubuno abezaga muntu musoga, eiyeide na Muuza Wasililila nu bukatizio: nu bantu beingi batalikidue ku Mukota.

²⁵ Nu endile ku Taliso kulonda Saolo;

²⁶ nu gamumonine, nu avule nage ku Antiokia. Nu basilile muaka umozi bakukundamana na ekelezia, nu beigisizie bantu beingi; nu beigisibua balingile kumanua buno baKlisto ku Antiokia.

BaEkelezia lia ku Antiokia Bekukasia BaEkelezia lia Yelusalema.

²⁷ Mu bindi bibio balengania batukile ku Yelusalema nu kuenda ku Antiokia.

²⁸ Nu umozi wa kubeli izina liage Agabo, emanukile, nu alolesezie mu Muuza buno kuabe munganda mu kisi kinsania: nu bubo buabede mu bindi bia Kalaudio.

²⁹ Nu babo beigisibua, muntu na muntu anga buamonaga, bakengede kueka nkaso ku mibuto zabo beikalaga ku Yudaya:

³⁰ bakitile bubuno bazisingile ku ba­kulu na Balanaba nu Saolo.