Misako 10 - Nouveau Testament en Kilega

Konelio Ekumona ku Kalolesio Kakuganiagania.

¹ Kuabezaga mu Kaisalia, muntu umozi izina liage Konelio, mukota wa bakoloboyo, beiyombo lia Itali,

² muntu musoga, nu anzaga Kalaga gamozi na numba zage insania, akasaga bantu nkaso ningi, nu asegaga ku Kalaga bindi binsania.

³ Amonine mu kalo­lesio, anga buigi na nkungu mbula za musi, ku mugenzi wa Kalaga engide kueli nu amubuide bune, Konelio.

⁴ Nu gamulolile akule boba, atendile bune, Buni, Mukota? Nu amutendile bune, Masego mobe nu nkaso zobe biabasa kuigulu kuba kakengelezio ku Kalaga.

⁵ Nu kano kaluma singa bamulume kuenda ku Yopa, nu bavue na Simona, ukumanua Petelo:

⁶ ekuikalaga mu numba za Simona, mukulumizi wa bikoba, numba zage zili ku ntungo kua kitatenge.

⁷ Nu gatukile wozo mugenzi watendaga nu Konelio, amanine bakiti babili ba numba zage, nu mukoloboyo musoga mu babo bamukambilaga bindi binsania;

⁸ nu gasilile kubasambalila bunsania, abasingile kuenda ku Yopa.

Petelo Ekumona ku Kalolesio ka Nsulu Zakatua ku Ntungo Inazi.

⁹ Gakeide busi, gababezaga mu nzila buigi na muino, Petelo abakamine gantata ga numba kusega, buigi na nkungu mutuba:

¹⁰ nu akule na nzala nunse, nu atundile kulia; tondo babezaga bekiyika idia, nu endile kalengoe;

¹¹ nu amonine igulu liguka, nu nyungu anga nsulu nnene zikugela ku kisi gansi zakatua ku ntungo inazi;

¹² nu muzo muabezaga nyama insania za magulu manazi ku binsania bikugelegetaga gansi nu tuzoni tua mumpelela.

¹³ Nu iyuki liamubuide bune, Petelo, yuka, sesa, nu gulie.

¹⁴ Tondo Petelo atendile bune, Tabubo, Mukota; kubuno nsiliaga kili na nsese aba kinteizi.

¹⁵ Nu iyuki liamubuide lingo bune, Kinsania kiasuagibua na Kalaga ntukimane nsese.

¹⁶ Nu bubuno buabeide mambizi masatu: nu kazanga kongo nyungu zezo zasubizie muigulu lingo.

Petelo nu Basingua ba Konelio.

¹⁷ Nu gabezaga Petelo ekuganagana na buisulilua bua kako kalolesio buno kabe buni, nu babo bantu basingaga Konelio, ba­buzizie numba za Simona, bemanine ku luibi,

¹⁸ nu bamanine nu babuzizie buno ndi Simona, ukumanua Petelo, eli kuko?

¹⁹ Nu gabezaga Petelo ekukengela kalolesio kamonagako, Muuza amu­tendile bune, Unguilila, bantu basatu bekukulonda.

²⁰ Tondo zanzuka, nu ugele, nu wende nabo na mutima umozi; kubuno nne uwabasinga.

²¹ Nu Petelo agelile, nu atendile na babo bamulume bune, Nne u wozo umukulonda: muavua ku kikizi?

²² Nu ba­tendile bune, Konelio, mukota wa bakoloboyo, muntu wisanana, nu ukuanzaga Kalaga, akulumbibua busoga ku kilongo kinsania kia baYuda, aninue na mugenzi wasililila kusinga bantu kuguli, buno wende ku numba zage, ongue buwamutende.

²³ Nu abeingizizie mu numba, nu abanzide, nu gakeide busi Petelo endile nabo, nu mibuto imozi zage za ku Yopa, bamuelekezizie.

Petelo Ekuenda ku Konelio.

²⁴ Gakeide busi babasile ku Kaisalia. Nu Konelio abalindide, akundamanizie kikanga kiage, nu beida bage.

²⁵ Nu geingide Petelo mu numba za Konelio, nu Konelio amusekeide, akomine mazu mage, nu amukumbamine.

²⁶ Tondo Petelo amuemanu­kizie, atendile bune, Emanuka; nili muntu anga uwe.

²⁷ Nu mukusambala nage, eingide nu amonine ku bantu beingi bakonga­na:

²⁸ nu abatendile bune, Inyue muizi buno, tabuakulungana muYuda kuikala na muntu wa kingo kilongo aba kusigelela buigi nage; tondo Kalaga andolesia bune, Ntumane ungo muntu buno eli nsese aba buno, ntumuizi:

²⁹ kubuno navua na mutima umozi gamuamanine nkubuzia kimuamaninaga.

³⁰ Nu Konelio atendile bune, Lelo u kindi kia binazi kutukila naganisegela aba nu nkungu zeno, nu nkungu za mubula nabezaga nkusega ku numba zane; nu wamulume emanine lisa nanne, abezaga na nsulu zenga,

³¹ nu ate­ndile bune, Konelio, masego mobe mongubua, nu nkaso zobe za­kengelua ku Kalaga.

³² Bubo singa bantu kuenda ku Yopa kumana Simona ukumanua Petelo, avue gano; ekuikalaga mu numba za Simona mukulumizi wa bikoba, buigi na kitatenge.

³³ Nu kazanga kongo nasingile bantu kuguli; nuwe wakita busoga wavua. Kano kaluma isue bansania tuli gano, nu Kalaga ekutu­monako, nu tukunguilila buwakakizibue na Mukota.

Petelo Ekusambalila Bantu mu Numba za Konelio Bubanonibua.

³⁴ Nu Petelo asuide kanua, nu atendile bune, Lebelebe namenya kasi Kalaga ntakukutia bantu bamozi:

³⁵ tondo mu kilongo ki­nsania wamuanza, nu kukita buisanana, nti eitabizibua nage.

³⁶ Idagi lilino liasingilue ku bana ba Isalele, abasambalide musagu musoga wa bubobelelo mu Yesu Klisto (eli Mukota wa bansania)—

³⁷ idagi lilino mualimenyine liasambedue mu Yudaya unsania, lialingile ku Galela, gasilile bubatizio buasambalaga Yoana;

³⁸ musagu wa Yesu wa Nazaleta, lukita luamubongezie Kalaga na Muuza Wasililila nu buangato; we watingaga kuno nu kuko kukita milimo misoga, nu onezie bansania babo bangatagua na Liabo, u Satana, kubuno Kalaga abezaga nage.

³⁹ Nuisue tuli balongeki ba binsania biakitaga mu kisi kia baYuda, nu mu Yelusalema; wozo ubeitile nu ubatakile ku muti.

⁴⁰ Kalaga ayukizie wono kusila kua bindi bisatu, nu amulolesizie,

⁴¹ tondo ta ku bantu bansania, tondo ku balongeki balingile kusombolua na Kalaga, isue babano, tualiaga nage nu tuanuaga nage gabeide esayuka ku bakuzi.

⁴² Nu atukakizizie buno tusambalile bantu, nu kulongeka buno u wozo wabikilue na Kalaga buno abe Ngatu za balami nu bakuzi.

⁴³ W ono walongekedue na balengania bansania buno kuizina liage muntu na muntu wamukatizia nti asigililua misako za buagi.

⁴⁴ Gabezaga Petelo akitenda bubuno, Muuza Wasililila agelede bansania bonguaga ku lilio idagi.

⁴⁵ Nu babo bamonesibua ba­katizizie bangamine, ubabo bavule gamozi na Petelo kubuno lu­kaso lua Muuza Wasililila luakubulua ku baBilongo.

⁴⁶ Nubo kubuno bongule bubatendaga ku mitendezi, nu baganuine Kalaga. Ububo Petelo ababuide bune,

⁴⁷ Nazi unabazugila ku mazi, buno babano tababatizibue, bantu bakasua Muuza Wasililila anga isue?

⁴⁸ Nu akakizizie buno babatizibue kuizina lia Yesu Klisto. Nu bamusegile buno eizizie bindi bimozi.