Matayo 9 - Nouveau Testament en Kilega

Yesu Asubizie ku Muino wa Kapenuma.

¹ Nu Yesu eingide mu buato, asokile lisilia lia kitatenge, abasile mu muino wage.

² Nu bavule na muntu wabezaga na lusambo lua kugilimina, eiyombeka ga mugu: nu Yesu amenyine bukatizio buabo, amubuide bune, Muana wane, ba na mbogimbogi; misako za buagi buobe zasigililua.

³ Nu bango basanzi bakengeide bune, Muntu wono ekulinga Kalaga.

⁴ Yesu amenyine bubakengalaga, atendile bune, Kubuno mukukengela makengelo mabi mu mitima zeinyu?

⁵ Buni buli busoga, kutenda bune, Misako za buagi buobe zasigililue; aba kutenda bune, Emanuka, wende?

⁶ Tondo buno mumenye bune, Muana wa muntu eli na buangato geikikili ga kisi kusigilila misako za buagi, (nu abuide wozo wabezaga na lusambo lua kugilimina bune), Emanuka, nu weke mugu wobe, nu wende kuobe ku numba.

⁷ Nu azanzukile, nu endile kuage ku numba.

⁸ Tondo gamonine bantu ku bubo, bakule boba, nu baganuine Kalaga, uwakasile bantu buangato bubo.

Yesu Ekumana Matayo.

⁹ Nu gatukile Yesu gago, amonine ku muntu, wamanagua Matayo, abezaga eikile ku mulimo wa kuligia idigo nu amubuide bune, Nyange. Nuwe azanzukile, nu amuyangile.

Yesu Ekubezia baFalese.

¹⁰ Nu gabezaga eiseikala mu numba kulia idia, bandelelombe beingi nu bagi bavule beikede na Yesu nu beigisibua bage.

¹¹ Nu gamonine baFalese ku bubo, babuide beigisibua bage bune, Kubuni Musozi weinyu ekulia na bandelelombe nu bagi?

¹² Tondo gongule Yesu ku bubo, ababuide bune, Beli babibu tabaneiyanina musakizi, tondo basambi.

¹³ Endazi muiyigisie buisulilua bua bubo, Nkutunda kiombo, nsikutunda kisansa: kubuno nsiavule kumana beisanana, tondo bagi.

¹⁴ Mu nkungu zezo beigisibua ba Yoana bavule kueli, bamubuide bune, Isue nu baFalese tukugilaga mambizi meingi, tondo buni butekugilaga beigisibua bobe?

¹⁵ Yesu ababuide bune, Bana ba musongi ndi banavuama kulila, mu nkungu zibeli na musongi? Tondo bindi bikatukibua musongi, ugabakagila.

Musumo wa Mukungio nu Tutembe.

¹⁶ Takuli muntu unalanda kibe kia nsulu za mubalabala ku nsulu za mukungio; kubuno zezo za mubalabala nti zata zezo nsulu za mukungio; nu itengu nti liaba inene nunse.

¹⁷ Aba bantu taba­kongolaga maku meituba mu tutembe tukulu: ndi bamongola mu tuto tutembe nti tuabuga, nu maku meituba nti makubuka, nu tutembe nti tuabiga; tondo bantu bakongolaga maku meituba mu tutembe tuto, nu bibili bikale bisoga.

Yesu Asakide Mukikulu Wabezaga na Lusambo lua Kubasa Mikila, nu Ayukizie Muana wa Muhota.

¹⁸ Gabezaga Yesu esabatenda bitondo bibino, Mukota umozi avule kueli, nu amukumbamine, nu amubuide bune, Muana wane wa mukazi alekana kalazi: tondo vua ubike kuboko kuobe gantata gage, nu alame.

¹⁹ Nu Yesu azanzukile, nu amuyangile na beigisi­bua bage.

²⁰ Nu mukikulu, wabezaga na lusambo lua kubasa mikila miaka ikumi neibili, avule kumbusa kuage nu etubizie ku mupimpo wa nsulu zage:

²¹ wozo mukikulu akengede bune, Ndi neitubia ku nsulu zage, nti nonibue.

²² Tondo Yesu atimbukile, nu amumonineko, nu amubuide bune, Muana wane, lindia mutima wobe, bukatizio buobe buakonia. Nu wozo mukikulu onizibue mu zezo nkungu.

²³ Nu geingide Yesu mu numba za wozo mukota, nu amonine ku beidi ba mionze, nu ku musanganano munene waki­taga kazege,

²⁴ nuwe atendile bune, Tukazi: muana ntakua, tondo eiyombeka tugu. Bamusekile.

²⁵ Nu gatikizibue musanganano, eingide, nu akatile muana ga kuboko kuage, nu muana azanzukile.

²⁶ Nu musagu wozo wakukeine mu kikio kilongo kinsania.

Yesu Onizie Biuku Bibili.

²⁷ Nu gabezaga Yesu esatinga kuko, biuku bibili biamuyangile bialalukile neiyuki inene, biatendile bune, Muana wa Davidi, tukue kiombo,

²⁸ Nu geingide mu numba, bibio biuku biamuyangile: nu Yesu ababuide bune, Ndi mukukatizia buno ninakita bubo? Bamubuide bune, E, Mukota.

²⁹ Nu eitubizie ku meiso mabo, atendile bune, ku bukatizio bueinyu ukinsa bubo buaba.

³⁰ Nu meiso mabo mazibukile. Yesu abalagile bune, Tamutende bubuno ku ungo muntu.

³¹ Tondo gabatukile gago basambede musagu wage mu kikio kilongo kinsania.

Yesu Onizie Kaluma.

³² Nu gabatukile, bamuvuilide na muntu kaluma wabezaga na musumbu.

³³ Nu gatukizibue musumbu, kaluma katendile: nu musanganano wangamine, batendile bune, Tatumonaga ku bubuno lingo mu kisi kia baIsalele.

³⁴ Tondo baFalese batendile bune, Wono akuimbia basumbu ku magala ma mukota wa basumbu.

Yesu Eli na Mponga ku Bantu Bazimine.

³⁵ Nu Yesu atabangile kunsania mu mino minene nu mikeke, nu eigisagia mu numba ningi zabo za musanganano, nu abasambalide musagu musoga wa bukota, nu onizie nsambo insania za nkita na nkita, nu bagongole ba nkita na nkita.

³⁶ Tondo gamonine ku musanganano munene agukuilide kiombo, kubuno wabezaga na kabebe nu wabalangene, anga mikoko ziteli na mulangi.

³⁷ Nu abuide beigisibua bage bune, Lebelebe matubulo meli meingi, tondo bakambi tabeli beingi.

³⁸ Segazi Mukota wa matubulo, buno asinge bakambi mu matubulo mage.