Matayo 6 - Nouveau Testament en Kilega

Kusambala kua Yesu ku Muiduko.

¹ Nkumutonda buno kuisanana kueinyu takube ku bantu buno, mumenyue nabo; ndi muakita bubo tamuli na lukalilo lusoga ku Soinyue uli muigulu.

² Kungua ukukita bantu mponga, ntuide monze, anga bukukita bengelezi ku numba za musanganano nu mu nzila, buno baganunue na bantu. Lebelebe nkumubula bune, Babo bakasilue lukalilo luabo.

³ Tondo kungua ukukita bantu mponga, kuboko kuobe kua­seikazi takumenye bukukita kuboko kuobe kuaseidume;

⁴ bubo ndi wakita bantu mponga zibe ku lumbisombiso, nu Soinyue uku­mona mu lumbisombiso nti akukase lukalilo lusoga.

⁵ Nu ndi ukusega Kalaga, ntube anga bengelezi; kubuno babo bekuelama kusega Kalaga nti bemana mu numba za musanganano nu mu ndenge za nzila buno bamonekeko na bantu. Lebelebe, nkumubula bune, Babo bakasilue lukalilo luabo.

⁶ Tondo, ndi ukusega ku Kalaga, nti wingila mu numba zobe nu nti wasega ku lumbisombiso, nu nti wigala luibi, nu nti wasega Soinyue uli mu lumbisombiso, nu Soinyue ukumona mu lumbisombiso; akukase lukalilo lusoga.

⁷ Tondo, ndi mukusega ku Kalaga, tamulalukela­luke anga bukukitaga baBilongo; babo bakukengelaga bune, Bamenyue ku kutendatenda kuabo.

⁸ Umpanga tamube anga babo; kubuno Soinyue eizi bimukuiyanina kungua tamumusega.

⁹ Segazi ku Kalaga anga bubuno; Tateisue uli muigulu izina liobe liganunue.

¹⁰ Bukota buobe buvue, kusombola kuobe kukitue ku kisi anga bukukukitua muigulu.

¹¹ Tukase lelo idia lietu.

¹² Tusigilile misako za buagi bueitu anga butukusigililaga bekutua­gilaga,

¹³ aba ntutuenzie ku malindiko, tondo tonie ku wozo mubi, kubuno uli na bukota, nu magala, nu lutanuno, aba ku nkiko zitana­kuzinda.

¹⁴ Kubuno ndi mukusigilila bantu misako za buagi buabo, nti Soinyue nuwe uli muigulu amusigilile misako za buagi bueinyu.

¹⁵ Tondo ndi tamukusigilila bantu misako za buagi buabo, nu Soinyue nuwe ntakamusigilila misako za buagi bueinyu.

¹⁶ Lingo ndi tamulia, tamube anga bengelezi bekukandaga malanga; buno bantu babamenye buno batakulia. Lebelebe, nku­mubula bune, Bakasilue lukalilo luabo.

¹⁷ Tondo uwe ndi ntu­kulia, ibongie muambo kuitoe, nu nti woga ku meiso;

¹⁸ tondo ndi ntukulia, ntumenyue na bantu; tondo Soinyue ukumona mu lumbisombiso akukase lukalilo lusoga.

¹⁹ Tamuibikile bikagi ku kisi, kuli kagembe nu nkisa kubibigia, gena gakuita beibi buno beibe;

²⁰ tondo ibikilazi bikagi bienyu muigulu, kuteli kagembe nu nkisa kubibigia, nu lingo gatanavuama kuita beibi buno beibe;

²¹ kubuno gago geli kikagi kiobe, ugago gakaba mutima wobe.

²² Kasuku ka mubili keli liso: tondo ndi liso liobe lili isoga, mubili wobe unsania nti uli na kiengi.

²³ Tondo ndi liso liobe lili ibi, mubili wobe unsania nti uli na kapilo. Ndi kikio kiengi kili muguli kise kapilo; nti keli kapilo nunse.

²⁴ Takuli muntu unavuama kukambila bakota babili: embe nti asombe umozi, nu nti atunde ungo; embe anze umozi, nu abenge ungo. Tamunavuama kukambila Kalaga nu bikulo.

²⁵ Kubuno nkumubula bune, Tamulemanine mu kalamo keinyu, buno tualie kikizi? aba tuanue kikizi? aba ku mubili weinyu, buno tuavuale kikizi? Ndi kalamo takatinga idia, nu ndi mubili tawatinga nsulu?

²⁶ Lolazi ku tuzoni tua mu mpelela, tatukuyika aba tatukutubula mbuto, aba tatukukundamania mu bigenge, tondo Soinyue wa muigulu ekutulisagia. Inyue tamuatinga tuzoni ku busoga?

²⁷ Nazi wa kumuli unalemanina kuitalikila ingo nkiko mu kalamo kage?

²⁸ Buni bumukulemanina nsulu? Kengelazi lukita lua maluba ma mu masoa, lukita lumakuasa; tamakukita mulimo, aba tama­kulukaga;

²⁹ tondo nkumubula bune, aba Solomo mu lutanuno luage lunsania ntavualikizibue anga busoga bua limozi lia mamo?

³⁰ Tondo ndi Kalaga ekuvualikia bisugu bia masoa, biligo lelo, nu lubi bikutebua mu ngulumina za keiya; ndi ntakamuvualikia inyue beli basosu mu bukatizio bueinyu.

³¹ Tamulemanine nu tamu­tende bune, Tualie kikizi? aba, Tuanue kikizi? aba, Tuavuale kikizi?

³² Kubuno baBilongo bekulondaga bibino binsania; tondo Soinyue wa muigulu eizi binsania bimukuiyanina.

³³ Tondo londazi tanga bukota bua Kalaga, nu kuisanana kuage; nu muatalikilue binsania.

³⁴ Umpanga tamulemanine bia lubi, kubuno busi bua lubi buidemanine bubuenyene. Bubi buabo buasuage kubo.