Matayo 5 - Nouveau Testament en Kilega

Kusambala kua Yesu ku Muiduko.

¹ Gamonine ku musanganano wa bantu, abakamine ku muiduko: nu geikede gansi, beigisibua bage bamuvuilide:

² nu gali­mbuide kanua kage, abeigisizie bune,

³ Mbogimbogi ku babo beli bazambi mu muuza wabo: kubuno bukota bua meigulu buli buabo.

⁴ Mbogimbogi ku babo beli na kabebe: kubuno bakabobelezibua.

⁵ Mbogimbogi ku babo babota; kubuno bakapiena kisi.

⁶ Mbogimbogi ku babo bekukua na nzala nu mpusia za kuisanana: kubuno babo bakeikuta.

⁷ Mbogimbogi ku babo bekukua kiombo; kubuno babo baka­kuilua kiombo.

⁸ Mbogimbogi ku babo beli na mutima wasuaga; kubuno babo bakamona ku Kalaga.

⁹ Mbogimbogi ku basungi; kubuno bakamanua bana ba Kalaga.

¹⁰ Mbogimbogi ku babo bababazizibue ku kabamba ka kuisanana: kubuno bukota bua meigulu buli buabo.

¹¹ Mbogimbogi kumuli inyue bakalingua, nu kubabazibua, nu kuekua buza ku mulondo na mulondo mubi ku kabamba kane.

¹² Bogazibogazi nu mube na kielele: kubuno lukalilo lunene lueinyu lusoga luli muigulu: kubuno ububo bubababazagia balenga­nia balingaga kuba nti tamubutua.

Bantu baKalaga beli Munkange nu Kiengi kia Kisi.

¹³ Inyue muli munkange wa kisi; tondo ndi munkange taguli nse, unasuagibua na kikizi? Tagunasuaga lingo nunse, umpanga nti watebua kumbuga nu kunyantua na bantu.

¹⁴ Inyue muli kiengi kia kisi. Muino tagunabisama ndi wobakua gantata ga muiduko.

¹⁵ Aba bantu tabanagulumizia kasuku, nu kukabika kunsi kua luzi, tondo gantata ga kibikilo kia kasuku; nuko nti kakusania bansania beli mu numba.

¹⁶ Bubo kiengi kienyu kisane ku bantu, bamone ku makitilo meinyu masoga, nu nti baganune Soeinyue uli muigulu.

Mulembe wa Mose.

¹⁷ Tamukengele buno, navule kubigia mulembe aba bulengania: nsiavule kubibigia, tondo kubizindilizia.

¹⁸ Lebelebe, nkumubula bune, Igulu nu kisi bikazimina tondo keisanzo kamozi kakeke ka masanzo ma mulembe takakazimina aba mansania makazindilizibua.

¹⁹ Muntu unsania ukakagulaga ikakizio limozi ku mamano nu kuigisia bango bantu bubo, akakegibua mu bukota bua meigulu: tondo ukamanzaga nu kuigisia bango bantu bubo, wozo akakutibua mu bukota bua meigulu.

²⁰ Kubuno nkumubula nunse, ndi kuisa­nana kueinyu takuatinga kuisanana kua basanzi nu baFalese, nti tamukeingila mu bukota bua meigulu.

²¹ Mungule buatendagua ku bantu ba wakalazi bune, Ntuite muntu; ukeitaga muntu nti akaba na katati ku lusungio:

²² tondo nne nkumubula bune, Muntu unsania ukongelua mubuto wage akaba na katati ku lusungio; nu muntu unsania ukabula mubuto wage buno, kikongolo, akaba na katati mu luusu lua milondo; nu muntu unsania ukabulaga mubuto wage buno, Uwe u kioto, akaba na katati mu kiziba kia keiya.

²³ Umpanga, ndi usakasana lukaso ku kayulo, nu ndi wakengela buno, uli na mulondo na mubuto wobe,

²⁴ siga tanga lukaso ku kayulo, nu nti wenda ku mubuto wobe buno ugomie nage, nu nti wasubia kukasana lukaso luobe.

²⁵ Sasia kugomania na wakusomba nkungu ziguli nage mu nzila; wozo wakusomba anavua kukubasia ku ngatu, nu ngatu nti akubasia ku bakoloboyo, nu nti wakandua.

²⁶ Lebelebe, nkumubula bune, Ntukatuka nunse kuko ndi ntusila nsombi zobe insania.

²⁷ Mungule buatendagua bune, Ntuite meiga:

²⁸ Tondo nne nkumubula bune, muntu unsania ukulola mukikulu na lutundo lua kumulimbia, nti asila kalazi kuita meiga mu mutima wage.

²⁹ Nu ndi liso liobe liakuinia mutima, nti walitikia, nu nti walisa bulazi nobe: wanulumba wazimina kiganza kimozi, kuteli mubili wobe unsania kuingila mu kiziba kia keiya katanakuzinda.

³⁰ Nu ndi kuboko kuobe kua seidume kuakuinia mutima, nti wakusesa, nu nti wakuisa bulazi nobe: wanulumba wazimina kiganza kimozi, kuteli mubili wobe unsania kuingila mu kiziba kia keiya katanakuzinda.

³¹ Buatendilue lingo bune, Muntu unsania ukatikagia mukikulu wage nti amukasa mukanda wakuita isonga:

³² Tondo nne nkumu­bula bune, Ndi wamulume atikia mukikulu wage, kuteli ku kabamba ka butazi, nti amubika muiti wa meiga nu unsania wasonga wozo watukibua nti eita meiga.

³³ Lingo, mungule buatendagua ku bantu ba wakalazi buno, Ntulumbile kilumbilo kia buza tondo mukitile Mukota bilumbilo biobe binsania:

³⁴ tondo nne nkumubula bune, Tamulumbile nunse; aba kuigulu, kubuno igulu lili kisumbi kietangatanga lia Kalaga;

³⁵ aba ku kisi kubuno kisi ukibikilo kia magulu mage; aba nu ku Yelusalema, kubuno muino wozo uli wa Mukota Munene.

³⁶ Aba ntulumbile kuitoe liobe, kubuno ntunavuama kugalukia luzuili lumozi kuluengia aba kuluinia.

³⁷ Tondo kuitabizia kueinyu kube bune, E, nti, E, nu tobo nti, tobo; Iyuki liakutalika likutuka ku wozo mubi.

³⁸ Mungule buatendagua bune, Liso, ku liso, nu linyo, ku linyo:

³⁹ tondo nne nkumubula bune, Tamuluane na muntu mubi: tondo ndi muntu akulibula lugizi kuitama lia seidume, nti wamu­timbulila lingo lia seikazi.

⁴⁰ Nuwe wakusongela, nu kutola nsulu zobe za kuntata, mukase ingo za kunsi.

⁴¹ Nuwe ukakuenzia lugendo lua mutandi umozi, ku magala mage, wende nage lugendo lua mitandi ibili.

⁴² Kasa wozo ukukusega, nu wozo ukukuambia ntumukase mugongo.

⁴³ Mungule buatendagua bune, Tunda munyobe, nu somba wozo wakusomba:

⁴⁴ tondo nne nkumubula bune, Tundazi babo bamu­somba, nu segelazi babo bekumubabazagia;

⁴⁵ bubo muabe bana ba Soinyue uli muigulu: kubuno ekusanizia bantu babi nu bantu basoga kisongo kiage kia busi, nu ekulokezagia bantu beisanana nu bateisanana mbula.

⁴⁶ Ndi mukutunda bakumutundaga, mukaba na lukalilo lukizi? Bandelelombe ndi tabakukitaga bubo?

⁴⁷ Nu ndi mukusekela mibuto zeinyu tugu, nti unatinga bango bantu buni? Ndi baBilongo tabakukitaga nubo bubo?

⁴⁸ Umpanga mube basililila, anga buasililila Soinyue uli muigulu.