Matayo 4 - Nouveau Testament en Kilega

Satana Alindikile Yesu.

¹ Tondo Yesu asondelezizibue na Muuza mu kalula buno alindi­kue na Liabo, u Satana.

² Eiyombekile bindi makumi manazi, ntalia musi nu kindi, kusila kua bubo akule na nzala.

³ Nu muli­ndiki avule nu amutendile bune, Ndi uwe u Muana wa Kalaga, kakizia makozi mamano mabe kampampa.

⁴ Nuwe amuakuide bune, Buasanzilue, muntu ntanalama na kampampa tugu, umpanga neidagi linsania likutuka mu kanua ka Kalaga.

⁵ Nu wozo Liabo, u Satana, amusondelezizie ku muino wasuagibua nu amuemanizie gantata ga mutondo wa numba nnene za kukumbamina,

⁶ nu amubuide bune, Ndi uwe u Muana wa Kalaga, iyise gansi: kubuno buasanzilue bune, Akakizie migenzi zage zikulange: nu, Mu maboko mabo bakueke, Unavua kukikitanua kugulu kuobe kuikozi.

⁷ Nu Yesu amubuide bune, Buasanzilue lingo bune, Ntulindike Mukota Kalaga wobe.

⁸ Nu lingo, wozo Liabo, u Satana, endile nage ku muiduko wasakama nunse, nu amulolesizie makota mansania ma kisi, nu malebo mamo;

⁹ nu amubuide bune, Bibino binsania nakukase, ndi wankumbamina.

¹⁰ Nu Yesu amubuide bune, Tuka Satana: kubuno buasanzilue bune, Kumbamina Mukota Kalaga wobe, nu nti wamukitila wenyene.

¹¹ Nu Liabo, u Satana, amu­sigile: nu migenzi za Kalaga zavule, zamukitide.

Yesu Esalinga Kusambalila Bantu Musagu wa Kalaga.

¹² Gongule Yesu musagu buno, Yoana akandua, endile ku Galela;

¹³ nu atukile ku Nazaleta, nu avule kuikala ku Kapenuma, uliko buigi na kiziba, mu miaga za Zebulona nu Nafatale:

¹⁴ bubo lizindilile liatendagua na mulengania Yesaya bune,

¹⁵ Kisi kia Zebulona nu kisi kia Nafatale, Nzila za mu ntungo na kiziba, lisilia lia Yadene, Galela za baBilongo,

¹⁶ Bantu babezaga mu kapilo bamonine ku kiengi kinene, Nubo beikalaga mu kisi kia kilimelime kia lukuo. Kiengi kiababaside.

¹⁷ Kutukila nkungu zezo Yesu alingile kusambala, nu kutenda bune, Iyaniazi; kubuno bukota bua meigulu buse buigi.

Yesu Ekumana Petelo nu Andele nu Yakobo nu Yoana.

¹⁸ Nu gatabangaga mu ntungo mua kiziba kia Galela, amonine ku bantu babili ba muto neiselenzi, Simona wamanagua buno Petelo, nu muto wage Andele, beisaga kakila mu kiziba; kubuno babezaga bazubi.

¹⁹ Ababuide bune, Nyangazi, nu namubike buno mube bazubi ba bantu.

²⁰ Nu kazanga kongo basigile tukila, nu bamuyangile.

²¹ Nu gabede esalombozia, amonine ku bango bantu babili ba muto neiselenzi, Yakobo muana wa Zebedayo, nu muto wage Yoana, babezaga mu buato neisibo Zebedayo, balandaga tukila tuabo; nu abamanine.

²² Nu kazanga kongo basigile isibo na buato, nu bamuyangile.

²³ Nu Yesu endile kunsania ku Galela, eigisagia mu numba zabo za musanganano, nu abasambalide musagu musoga wa bukota, nu onezie nsambo za nkita na nkita za bantu.

²⁴ Nu lukumu luage luasambedue mu ndenge insania za Sulia; nu bamuvuilide na ba­sambi bansania, nu bansania bateikosagia na nsambo za nkita na nkita, nu babezaga na basumbu, nu babezaga na lungu, nu boma maboko; nu abonezie.

²⁵ Nu misanganano za bantu beingi zamuyangile kutuka ku Galela, nu ku Dekapoli, nu ku Yelusalema, nu ku Yudaya nu ku lisilia lia Yadene.