Matayo 3 - Nouveau Testament en Kilega

Yoana Mubatizi nu Mulimo Wage.

¹ Mu bindi bibio Yoana Mubatizi abasile, asambalide bantu mu kalula ka Yudaya bune,

² Iyaniazi; kubuno bukota bua meigulu buse buigi.

³ Kubuno wozo watendagua na mulengania Yesaya bune, Iyuki lia muntu likulalukaga mu kalula bune, Kungazi nzila za Mukota, Isiazi matingilo mage.

⁴ Nuwe Yoana abezaga na nsulu za mioza za ngamia, nu mukoma wa kikoba mu kibunda kiage; nu idia liage liabezaga nzige nu buki bua mulubanda.

⁵ Nu bamuendeide bansania ba Yelusalema, nu ba Yudaya, nu bansania ba ndenge insania za buigi na Yadene;

⁶ nu babatizizibue nage mu luuzi lua Yadene, beigongaga misako za buagi buabo.

⁷ Aba gamonine ku baFalese beingi nu Basadoke bavule kubatizibua nage, ababuide bune, Inyue kikanga kia mpoma, nazi wamutendile buno, mutine bongoa bukavua?

⁸ Kolamazi biguma biatananina kuiyania:

⁹ nu tamukengele mubenyene bune, Tuli na tateisue Abalahama; kubuno nikumutenda bune, Kalaga anavuama kubasizia Abalahama bana mu makozi mamano.

¹⁰ Nu kano kaluma isaga liabikua gansi na miti: nu muti na muti utako­lama biguma bisoga nti wasesue, nu nti weisoa mu keiya.

¹¹ Lebe­lebe nkumubatizia na mazi ku kabamba ka kuiyania: tondo we ukavua kumbusa kuane antinga, nsiatananina kueka bisalapata biage: wozo akamubatizia na Muuza Wasililila nu na keiya:

¹² lueli luage luli mu kuboko kuage, nuwe akengia mulungu wage nunse, nuwe akakundamania mumpunge wage mu kigenge kiage, tondo akagisia mpepa mu keiya katakuzimaga.

Yesu Ekubatizibua.

¹³ Gatukile Yesu ku Galela, avule ku luuzi lua Yadene ku Yoana, buno abatizibue nage.

¹⁴ Tondo Yoana ananine, atendile bune, Nne nikuiyanina kubatizibua nobe, tondo wavua kundi?

¹⁵ Tondo Yesu amuakuide bune, Ziga tugu bubo: kubuno bubo buatutananina kuzindilizia kuisanana kunsania. Nu amuzigile.

¹⁶ Gamubati­zizie, kazanga kongo Yesu atukile mu mazi: nu kazanga kongo meigulu mamulimbukide, nu amonine ku Muuza wa Kalaga eku­kumba anga nkulimba, nu amugelede;

¹⁷ nu kazanga kongo, iyuki liatukile mu meigulu, liatendile bune, Wono eli Muana wane, u Ngoli zane, nakomana nage.