Matayo 27 - Nouveau Testament en Kilega

Ngatu Bekugabula Yesu mu Maboko ma Pilato.

¹ Gabuabede buse nindunindu basankoga banene nu bakulu ba bantu bamukalide luango buno, beite Yesu.

² Nu bamukandile, nu bendile nage, nu bamugabuide ku Pilato wozo wabezaga mukota.

Yudasa Abezaga na Mpipi Nene.

³ Nu Yudasa wamugabuide gamonine esasungibua, eibezizie nu asubizizie basankoga nu bakulu bibio bindi makumi masatu bia feza.

⁴ Atendile bune, Nagile kubuno nagabuide mikila zeisanana na buagi. Batendile buno, takitondo kietu! kili kitondo kiobe uwenye­ne.

⁵ Esile bibio bindi bia feza gansi mu kiziki kiasuagibua, nu endile kuikama.

⁶ Nu basankoga banene bakatile bindi bia feza, batendile bune, Tabuakulungana ku mulembe kubika feza zino mu kikagi, kubuno zili bukunza bua mikila.

⁷ Nu bakalile luango luabo, nu bakunzile kiziki kiabezaga ga mubumbi wa nyungu, buno kibe kiziki kia nsinda za bageni.

⁸ Kububo bekumana kiziki kikio bune, Kiziki kia mikila, aba nu kano kaluma.

⁹ Buno lizindilile liatendagua na mulengania Yehemia bune, Bakitile bindi makumi masatu bia feza, bubo buli bukunza bua wozo wakunzilue, anga bubakitile bukunza bua bana ba Isalele;

¹⁰ nu bazikasene ku kiziki kia mubumbi wa nyungu, anga buankakizizie Mukota.

Pilato Ekubuzia Yesu.

¹¹ Yesu emanine ku mukota Pilato: nu wozo mukota amubuzizie bune, Ndi uwe U Mukota wa baYuda? Yesu amuakuide bune, Bubo buwatenda.

¹² Nu gasongedue na basankoga banene nu bakulu, ntatendile buampa.

¹³ Ububo Pilato amubuzizie bune, Ndi ntukungua ku bitondo bingi bibakukulongekela?

¹⁴ Nu ntamuakuide buampa; kububo mukota angamine.

Yesu aba Balaba.

¹⁵ Na busi na busi buakitaga kisagulo mukota abakandulilaga mukandua umozi, ubatunda.

¹⁶ Nu babezaga na mukandua umozi munene, amanagua buno, Balaba.

¹⁷ Nu gabakundamene, Pilato ababuzizie bune, Mukutunda namukandulila nazi? Balaba, aba Yesu ukumanua buno, Klisto?

¹⁸ Kubuno amenyine buno, babo bakumugabula tugu ku kabamba ka lugi.

¹⁹ Nu gabezaga eikala ga kisumbi kia lusungio, mukikulu wage amusingide mugenzi bune, Ntuingile mu kitondo kia muntu wono wisanana; lelo nabezaga nababazibua mu ndozi ku kabamba kage.

²⁰ Basankoga banene nu bakulu babulile misanganano buno, basege Balaba, nu kuita Yesu.

²¹ Tondo mukota ababuzizie bune, Beli babili, mukutunda namukandulila nazi? Nubo bakuide bune, Balaba.

²² Pilato ababuzizie bune, Nkite Yesu ukumanua Klisto buni? Bansania beitabizizie bune, Atakue.

²³ Ababuzizie bune, Bubi bukizi buakitile? Balalukile bubibu bune, Atakue.

²⁴ Gamenyine Pilato buno, bubo buatendaga tabuabasuagila, tondo kazege keitide, atolile mazi, nu ogile ku maboko nu musanganano wamonaga, atendile bune, Nsili na katati ka mikila zeno za muntu wono wisanana, mukite anga bumukutunda.

²⁵ Nu bantu bansania bamuakuide bune, Mikila zage zikabezaga gantata geitu nu gantata ga bana beitu.

²⁶ Kububo, bakanduide Balaba; tondo alibuide Yesu, amugabuide buno atakue.

Bekubika Yesu Nkumbu za Mikele. Bekuenda Kumutaka ku Muti wa Magu.

²⁷ Nu bakoloboyo ba mukota bendile na Yesu ku Palabolia nu kibombo kinsania kiamukonganine.

²⁸ Nu bamutikizie nsulu, nu bamuvualikizie nsulu zakisimana.

²⁹ Nu bakitile nkumbu za bukota za mikele nu bamubikilezo kuitoe, nu babikile musumbo mu kuboko kuage kua seidume; nu bamukomene mazu nu bamuililikile bune, Samba Mukota wa baYuda.

³⁰ Nu bamusuilile matazi, nu bakatile musumbo nu bamulibulaga nago kuitoe.

³¹ Nu gabasilile kumuililika, bamutikizie nsulu zakisimana, nu bamuvualikizie nsulu zage, nu bendile nage buno bamutake.

³² Nu gabatukile, basangile muntu wa kisi kia Kulene, izina liage Simona: bamuekezie muti wa magu wa Yesu, ku magala mabo.

Bekutaka Yesu ku Muti wa Magu.

³³ Nu gababasile ku kiziki izina liakio Gologota, buisulilua buno, nkungu miliba.

³⁴ Nu bamukasile maku masambikua na bili lubaba anga nsangu buno amanue: gasondile, asombile kumanua.

³⁵ Nu gabasilile kumutaka, babeganizie nsulu zage, bazesile ku mbale;

³⁶ nu beikalile kumulanga.

³⁷ Nu babikile geitoe liage masongelo mage masanzilue buno, WONO YESU MUKOTA MUNENE WA BAYUDA.

³⁸ Nu kuabezaga beibi babili batakilue nage, umozi ku kuboko kuage kua seidume, nu ungo ku kuboko kuage kua seikazi.

³⁹ Batingaga mu nzila bamulingile nu batengezietengezie matoe mabo,

⁴⁰ nu batendile bune, Uwe musambuzi wa numba za kuku­mbamina, nu kuzobaka mu bindi bisatu, iyonie lino uwenyene! ndi uwe u Muana wa Kalaga, kasi igezie ku muti wa magu.

⁴¹ Basa­nkoga banene nu basanzi nu bakulu bamuililikile lingo, batendile bune,

⁴² Onezie bango, tondo ntanavuama kuiyonia wenyene. We eli Mukota wa Isalele; kasi igezie ku muti wa magu, nuisue tuamukatizie.

⁴³ Akatizizie Kalaga; kasi Kalaga amonie kano kaluma, ndi ekumutunda; kubuno atendile bune, Nili Muana wa Kalaga.

⁴⁴ Nu babo beibi batakilue nage bamutendile nubo bubo lingo.

Kukua kua Yesu Klisto.

⁴⁵ Kutukila nkungu mutuba kuabede kapilo ga kisi kinsania nu kuika ku nkungu mubula.

⁴⁶ Nu mu nkungu mubula, Yesu alalu­kile neiyuki inene atendile, Eli, Eli, lama sabachthani? buisulilua, Kalaga wane, Kalaga wane, buni buwamenkela?

⁴⁷ Bango babe­zaga bemana, gabongule ku bubo, batendile bune, Wono ekumana Eliya.

⁴⁸ Nu kazanga kongo ungo eitumine lubilo, akatile luata, nu aluiyazizie na maku mabezaga makali, nu abikilemo ku musumbo nu amunusizie.

⁴⁹ Bango batendile bune, Siga tanga, tumone ndi Eliya ekuvua kumonia.

⁵⁰ Yesu alalukile neiyuki inene lingo, nu eidekanizie.

⁵¹ Nu nsulu zabezaga zakingua mu numba nene za kukumbamina zatikile bibe bibili kutukila kuigulu nu gansi, nu kisi kiatengiletengile nu makozi matikile;

⁵² nu nsinda zalimbukile; nu bitumba bingi bia basuagibua, babezaga bakua bayukile;

⁵³ nubo gabatukile mu nsinda, kusila kua kuyuka kuage, beingide mu muino wasuagibua nu beingi babamonineko.

⁵⁴ Mukota wa bakoloboyo lukama, nu babezaga nage kulanga Yesu, gabamonine kisi kise kiatengatenga nu binsania biakitilue, bakule boba nunse, batendile bune, Lebelebe, wono abezaga Muana wa Kalaga.

⁵⁵ Nu bakikulu beingi babezaga gago balolelaga kulazikulazi, nubo babezaga ba ku Galela, ubabo bayangaga Yesu, nu kumukitila:

⁵⁶ mu babo muabezaga Malia Magadala, nu Malia nina wa Yakobo nu Yose, nu nina wa bana ba Zebedayo.

Bekubika Yesu mu Nsinda.

⁵⁷ Nu gabuabede buse muigolo, muntu umozi mugumi wa ku Alimataya avule, izina liage Yosefu, wozo wabezaga muigisibua wa Yesu:

⁵⁸ nu muntu wono endile ku Pilato, asegile kitumba kia Yesu. Kububo Pilato akakizizie buno, bamukasekio.

⁵⁹ Yosefu akatile kitumba, akivualikizie nsulu zenga zabota,

⁶⁰ nu akibikile mu nsinda zage nto, zabezaga muikozi: nu akumbizie ikozi inene, alibikile ku muingilo wa nsinda, nu endile.

⁶¹ Nu Malia Magadala abezaga kuko nu ungo Malia, beikalaga buigi na nsinda.

⁶² Gatingile busi bua kulongeka, babo basankoga banene nu baFalese bakundamene ku Pilato,

⁶³ batendile bune, Mukota, tukituakengela iyuki lia wozo muengelezi gabezaga ekili na kalamo, atendile bune, Nayuke lingo kusila kua bindi bisatu.

⁶⁴ Kakizia buno, nsinda zilangue aba nu kusila kua bindi bisatu, kubuno beigisibua bage banavua kuiba kitumba kiage, nu kubula bantu buno ayuka ku bakuzi; ndi bakita bubo, buengelezi bubo buzinda buna­tinga butangi.

⁶⁵ Pilato ababuide bune, Inyue muli na balangi, endazi muzilange anga bumuizi.

⁶⁶ Beiyendede balangile nsinda busoga, babikile kamenyikilo ku lilio ikozi, balangi babezaga nabo.