Matayo 26 - Nouveau Testament en Kilega

Beli na Yesu Kangonongono Bakumukalila Luango lua Kumuita.

¹ Nu gasilile Yesu kutenda bubo, abuide beigisibua bage bune,

² Muizi buno, kusila kua bindi bibili kuabe kisagulo kiesuluko, nu Muana wa muntu agabulue buno atakue ku muti wa magu.

³ Mu nkungu zezo basankoga banene, nu bakulu ba bantu, bakundameine mu lusu lua sankoga munene, wamanagua Kayafa;

⁴ bakalile luango buno, bakate Yesu mu lumbisombiso, nu bamuite.

⁵ Tondo batendile bune, Ta mu kisagulo, mu musanga­nano munakivua kuba kazege.

Malia wa ku Betania, Ekubongia Yesu Bulago Kuitoe.

⁶ Nu gabezaga Yesu mu Betania, mu numba za Simona muiya bibali,

⁷ mukikulu umozi amuvuilide na kabongelo ka alabasata? muko muabezaga bulago bua bukunza bubibu nunse, nu amuku­bulide gantata geitoe, gabezaga ekulia.

⁸ Tondo gamonine beigisibua ku bubo, bongilue, batendile bune, Kuzimizia kuno kuli kubuni?

⁹ Ganakunzilue bulago bubuno, bunamonine bikulo bingi, binakasilue bazambi.

¹⁰ Tondo gamenyine Yesu makengelo mabo, abakuide bune, Buni bumukuzangiazangia wono mukikulu?

¹¹ Kubuno mukubezaga na bazambi bindi binsania, tondo tamuli nanne bindi binsania.

¹² Ambongia bulago ku mubili wane, ankitide bubo kulongeka kuyikua kuane.

¹³ Lebelebe, nkumubula bune, Kunsania kukasambalua musagu musoga wono mu kisi kinsania, bakasambala lingo buakitile mukikulu wono, bukaba kabali kage.

Yudasa wa Isakaliote Ekukalila Yesu Luango.

¹⁴ Kububo umozi wa beigisibua ikumi na babili, izina liage Yudasa Isakaliote, endile ku basankoga banene,

¹⁵ nu abatendile bune, Mukutunda kunkasa kikizi, ganamugabulilawe? nu bamu­lindikide bindi makumi masatu bia feza, bamukasilebio.

¹⁶ Kutu­kila ku nkungu zezo alondile kubagabulilawe.

Kulongeka kua Yesu Idia lia Kisagulo Kiesuluko na Beigisibua Bage.

¹⁷ Gabede busi butangi bua tumpampa tutagaga beigisibua bavuilide Yesu, bamubuzizie bune, Kuni kukutunda tulongeke kiziki kia kutulila kisagulo kiesuluko?

¹⁸ Nu atendile bune, Endazi ku muino nu muakulumane na wamulume, nu mubulazi bune, Musozi atenda bune, Nkungu zane zise buigi, nikite isuluko mu numba zobe na beigisibua bane.

¹⁹ Nu beigisibua bakitile anga buaba­tendaga Yesu; nu balongekile kisagulo kiesuluko.

Kuzinda kua Kisagulo Kiesuluko.

²⁰ Gabuabeide buse muigolo abezaga na beigisibua bage ikumi na babili aliaga nabo;

²¹ nu gabaliaga, ababuide bune, Lebelebe nkumubula bune, Umozi wa kumuli uwangabule.

²² Babede na kabebe nunse, nu nawe nawe nawamubuzizie bune, Mukota ndi nne?

²³ Nu abakuide bune, Wozo unakatile nage maboko kiandi­ndi mu lupepe, uwangabule.

²⁴ Muana wa muntu ekuenda, anga buasanzidue; tondo kabebe ku muntu wozo ukugabula Muana wa muntu! bunabeide busoga songo muntu wono ntabutilue.

²⁵ Nu Yudasa, wamugabuide amubuzizie bune, Labi, ndi nne? Yesu amuakuide bune, Uwe ukutenda.

Yesu Ekubabula Bubaliaga nu Bubanuaga, U Kakengelesio ka Mubili Wage nu Mikila Zage.

²⁶ Nu gababeide bese balia, Yesu akatile kampampa, nu asegile nu akabunguide; nu akasile ku beigisibua bage, nu atendile bune, Tolazi, nu liazi; kakano keli mubili wane.

²⁷ Nu atolile kituma, nu asegile, nu abakasilekio, abatendile bune, Inyue bansania nuazi:

²⁸ kubuno kikino kili mikila zane zeidagano, zakubuka ku kabamba ka beingi, kuisigililo lia misako za buagi.

²⁹ Tondo nkumubula bune, Nsikanua lingo biguma bibino bia mizigi, aba nu ku busi bunkanua lingo neinyue mu bukota bua Tatane.

Yesu Ekubula Petelo nu Bango Buamutune Petelo.

³⁰ Nu gabasilile kuimba luimbo, bendile ku muiduko wa Oleve.

³¹ Yesu ababuide bune, Inyue bansania muine mitima nanne mu kindi kikino: kubuno buasanzilue bune, Nkalibula mulangi, nu kibombo kia mikoko kikabalangana.

³² Tondo ganabe nayuka, nalinge kumutanga kuenda ku Galela.

³³ Petelo amuakuide bune, Ndi bansania beina mitima nobe, tondo nne nsine mutima nunse.

³⁴ Yesu amubuide bune, Lebelebe nkukubula bune, Mu kindi kikino gabe mulume wa nkoko ntebika, wantune mambizi masatu.

³⁵ Petelo amubuide bune, Busoga kukua nobe, ndi nsiakutuna. Beigisibua bansania beitabizizie lingo bubo.

Yesu Eli na Kabebe mu Getesemane.

³⁶ Nu Yesu avule nabo muisoa liamanagua Getesemane, nu abuide beigisibua bage bune, Ikalazi gano, nende kusega kuko.

³⁷ Nu endile na Petelo nu bana babili ba Zebedayo, nu alingile kuba na kabebe nu akonkeidue.

³⁸ Nu ababuide bune, Nnenyene nili na kabebe kanene, aba nu ku lukuo: sigalazi gano, kesiazi ntende nanne.

³⁹ Nu gabede esalombozia, aguide bukukama, nu asegile bune, Tatane ndi bunakulunganana kituma kikino kintingile; tondo tabunkutunda kusombola, umpanga bukutunda kusombola.

⁴⁰ A vule ku beigisibua nu abasangile beiyombeka ku tulo, nu atendile Petelo bune, Ndi tamunavuama kukesia ntende nanne nkungu imozi?

⁴¹ Kesiazi ntende nu segazi, buno munavua kuingila mu malindiko; mutima ukutunda bubo, tondo mubili watamba.

⁴² Endile lingo, nu asegile, atendile bune, Tatane, ndi tabunakulungana buno kituma kikino kintinge nsiakinua, kasi kusombola kuobe kukitue.

⁴³ Yesu avule lingo abasangile beiyombeka ku tulo, kubuno bazenzelaga.

⁴⁴ Yesu abasigile lingo, nu endile kusega limbizi lia masatu, atendile bubo lingo.

⁴⁵ Nu avule ku beigisibua bage, nu ababuide bune, Iyombe­kazi lino, nu umunuazi: kubuno nkungu zise buigi, nu Muana wa muntu agabulue mu maboko ma bagi.

⁴⁶ Zanzukazi, tuendazi: wozo ukungabula ese buigi.

Bekukata Yesu.

⁴⁷ Nu gabezaga esatenda bubo, Yudasa, umozi wa babo ikumi nu babili, avule na musanganano munene wa bantu babezaga na ma­panga nu nkoma, batukaga ku basankoga banene nu bakulu ba bantu.

⁴⁸ Nu wozo mugabuzi wamugabulaga abakasile kakengelesio bune, Unamumage ku busundo, nti umuakate.

⁴⁹ Nu kazanga kongo abasile ku Yesu, nu amusekede bune, Samba, Rabi; nu amumumine.

⁵⁰ Nu Yesu amubuide bune, Muida wane, kita buwavuilaga tugu. Nu bavule nu bakatile Yesu na maboko.

⁵¹ Nu ungo wabezaga na Yesu alambizie kuboko, nu abasizie bupanga buage mu musagi, nu abangile mukobe wa sankoga munene, nu amusesile kutuzi.

⁵² Yesu amubuide bune, Ingizia bupanga buobe mu musagi: kubuno bansania bekukata bupanga bekeitua na bupanga.

⁵³ Ndi ukukengela tugu buno, nsinavuama kusega ku Tatane buno ansingile bibombo ikumi na bibili bia migenzi?

⁵⁴ Umpanga buni bukazi­ndilizibua masanzo, kubuno ububo, buatunganana kuba?

⁵⁵ Mu nkungu zezo Yesu abuzizie musanganano bune, Buni bumuavua na mapanga nu nkoma kunkata anga bekukata munyagi? Nikalaga busi na busi mu numba za kukumbamina neigisagia bantu, nu tamuan­katile.

⁵⁶ Tondo bunsania buabede buno, masanzo ma balengania mazindilile. Nu beigisibua bage bansania bamusigile, nu batinine.

Bakuvua na Yesu ku Kayafa nu ku Balongeki.

⁵⁷ Nu babo bakatile Yesu bendile nage ku numba za Kayafa sankoga munene, ukuabezaga kukundamanina basanzi nu bakulu.

⁵⁸ Tondo Petelo amuyangile bulazi, aba nu ku lusu lua sankoga munene, nu eingide, nu eikede na bakambi, kulindila buabe.

⁵⁹ Basankoga banene nu bakazi ba luango bansania balondaga bubana­kandika Yesu, buno bamuite;

⁶⁰ nu bakandiki beingi bavule, tondo tabuakulungene. Tondo bango babili bavule,

⁶¹ nu batendile bune, Muntu wono atendile buno, anavuama kusambula numba nene za kukumbamina Kalaga, nu kuzobaka lingo mu bindi bisatu.

⁶² Nu sankoga munene emanukile, nu amutendile bune, Uwe ndi ntuakule? ndi ntukungua tugu ku bitondo bibakukulongekela?

⁶³ Tondo Yesu eikede kibibi. Nu sankoga munene amubuide bune, Nkukulumbizia ku Kalaga uli Mulami, tubule ndi uwe u Klisto, Muana wa Kalaga.

⁶⁴ Yesu amubuide bune, Bubo buwa­tenda; tondo nkukubula buno, mu nkungu zezo mukamona Muana wa muntu eikala ku kuboko kua seidume kua Magala, nu ekuvua mu bimpa bigulu.

⁶⁵ Nu sankoga munene iyatide nsulu zage, atendile bune, Alinga Kalaga, kubuni lingo kutukulindila bango balongeki? Mungua bualinga Kalaga:

⁶⁶ buni bumukukengela? Bamuakuide bune, Atunganana kukua.

⁶⁷ Nu bamusulide matazi ku meiso nu bamusindikile; nu bango bamulibuide ngizi,

⁶⁸ batendile bune, Ndi uwe U Klisto, menya nazi wakulibula?

Petelo Ekutuna Yesu.

⁶⁹ Nu Petelo abezaga ikala mu lusu: nu mukikulu mukambi amuvuilide, amubuide bune, Uwe nuwe wabezaga na Yesu wa Galela.

⁷⁰ Tondo atunine ku bansania bune, Nsizi bukutenda.

⁷¹ Nu gendile ku kabelabela, ungo mukikulu amumonineko, nu abuide babezaga nage bune, Muntu wono abezaga na Yesu wa Nazaleta.

⁷² Nu atunine lingo, nu alumbide bune, Nsizi muntu wozo.

⁷³ Nu gatingile nkungu nkeke, babezaga bemana buigi bavule, bamubuide bune, Petelo, lebelebe uwe uli umozi wa babo, kubuno kutenda kuobe ukukukumenesia.

⁷⁴ Nu alingile kuisuilila nu kulumbila, nsizi muntu wozo, nu kazanga kongo mulume wa nkoko abikile.

⁷⁵ Nu Petelo akengeide idagi liamubulaga Yesu bune, Gabe mulume wa nkoko ntebika, wantune mambizi masatu. Nu atukile, nu alilile nunse.