Matayo 24 - Nouveau Testament en Kilega

Gabezaga Yesu ku Muiduko wa Oleve, Alenganizie Kugoa kua Numba za Kukumbamina.

¹ Nu Yesu atukile mu numba za kukumbamina, nu endile mu nzila; beigisibua bage bamuvuilide kumulolesia numba insania za kukumbamina.

² Tondo ababuide bune, Ndi tamu­kumona ku binsania bibino? Lebelebe nkumubula bune, Tabaka­siga ikozi limozi gantata ga lingo, litakabungulua.

Beigisibua Bakubuzia Yesu Mbuzio Isatu ga Muiduko wa Oleue.

³ Nu geikede ga muiduko wa Oleve, beigisibua bamuvuilide kulumbisombiso, bamubuzizie bune, Tubule, buni bukaba bitondo bibino? nu kalolesio kakizi kakamonekako kukuvua kobe, nu kuzinda kua nkiko?

Yesu Ekubula Beigisibua Bage Bitondo bia Nkiko Zeno ku Muiduko wa Oleve.

⁴ Yesu abakuide bune, Idangazi muntu ntamuengelele.

⁵ Ku­buno beingi bakavua muizina liane, bakatenda bune, Nne nili Klisto; nu bakengelela bantu beingi.

⁶ Mukongua ku bita, nu misagu za bita; tamuzangezange; kubuno bitondo bibio biatunganana kuvua; tondo kuzinda takuika,

⁷ Kilongo kikaluana na kingo kilongo, nu bukota bukaluana na bungo bukota, kukaba munganda nu tulingini ku lulenge na lulenge.

⁸ Tondo binsania bibino bili bia kulinga kua lubabazio.

⁹ Bakamugabula buno mubabazibue, nu bamuite: nuinyue mukasombua na baBilongo bansania ku kabamba keizina liane.

¹⁰ Nu beingi bakikuka, nu bakagabulana, nu bakasombana.

¹¹ Nu balengania beingi ba buza bakavua, nu bakengelela beingi.

¹² Nu kukuitila kua mibi lutundo lua beingi lukatamba.

¹³ Tondo wozo widindika aba nu kukuzinda, nti ukonibua.

¹⁴ Nu musagu musoga wa bukota ukasambalua ku bansania ba kisi kinsania, kuba bulongeki bua baBilongo bansania; nu nti kuzinda kukavua.

Gabezaga Yesu ku Muiduku wa Oleve, Abuide Beigisibua Bage Kabebe Kanene Kako Katendagua na Mulengania Danyele.

¹⁵ Umpanga gamukamona lusombo lua kubiga, lulo luatendagua na mulengania Danyele, luemana mu kiziki kiasuagibua (wozo ukusomaga bubuno amenyininebo),

¹⁶ babo beli mu Yudaya batine ku muiduko:

¹⁷ nu wozo ukasangua gantata numba ntagele kutikia bili mu numba zage:

¹⁸ nu wozo ukasangua muisoa ntasu­banie kutola nsulu zage.

¹⁹ Kabebe kanene ku beimisu nu beku­momia mu busi bubo!

²⁰ Nu musege buno, kutina kueinyu takube mu bindi bia mpego, aba mu busi bua sabato:

²¹ kubuno kukavua lubabazio lunene, lutebezaga lingo kutukila ku kulinga kua kisi aba nu kano kaluma, aba talukaba lingo.

²² Nu songo bindi bibio tabiakegizibue, takunonine muntu wampa; tondo ku kabamba ka basombolua ukiansile bindi bibio biakegibuako.

²³ Ndi muntu amubula buno, Lolazi, Klisto eli gano, aba kuko; tamumukatizie.

²⁴ Kubuno kukavua bango baKlisto ba buza, nu balengania ba buza, nu bakalolesia migeleko minene nu maganogano; nu kuenge­lela, nu bakageleka kuengelela basombolua, tondo tabukakulungana.

²⁵ Unguililazi, nasila kumutonda.

²⁶ Ndi bamubula bune, Ungui­lilazi, eli mu kalula; tamuendeko; aba bune, Eli mu tuzumba tua bisama; tamukatizie.

Yesu Ekubula Beigisibua Bage ku Muiduko wa Oleve: Kusubia Kuage kua Mabili.

²⁷ Anga bukukelimaga mukenzi wa nkuba kuntata, nu kumone­kako kunsi; ububo bukaba kuvua kua Muana wa muntu.

²⁸ Gago geli kitumba, nti ugakundamanine ndiu.

²⁹ Nu kazanga kongo gakasila lubabazio lua bindi bibio kisongo kia busi kikaba kapilo, nu muezi tagukasana, nu nkeninkeni zikako­loka muigulu, nu magala ma meigulu makatengatenga:

³⁰ nu kakengelezio ka Muana wa muntu kakamoneka muigulu: nu babi­longo bansania ba kisi bakalila, nu bakamona ku Muana wa muntu ekuvua mu bimpa bigulu mu magala mage nu lutanuno luage lunene.

³¹ Nu akasinga migenzi zage, neiyuki inene lia monze, nu baka­kundamania basombolua bage ku ndenge inazi, kutukila kuzinda kueigulu aba nu kuko kungo.

Yesu Ekubula Beigisibua Bage Musumo wa Figi ku Muiduko wa Oleve.

³² Muiyigisie musumo wa muti wa figi: gakutitulaga ntabi, nu nti zise zalinga kuasa ingo nsamba, nti muamenya buno nkungu za nzogo zise buigi;

³³ bubo nuinyue lingo, gamukamona ku bubuno bunsania, mumenye buno, eseli buigi, nu nti eseimine ku nibi.

³⁴ Lebelebe nkumubula bune, Bantu ba kibuti kikio takikatinga, aba nu gakasila bubo bunsania.

³⁵ Igulu nu kisi bikatinga, tondo malagi mane tamakatinga nunse.

³⁶ Tondo ku busi bubo aba nkungu zezo, takuli muntu umozi wizi aba migenzi za muigulu tazizi, aba Muana ndi nteli gamozi neIsi.

³⁷ Nu anga buabezaga mu bindi bia Noa, ubukaba kuvua kua Muana wa muntu.

³⁸ Mu bindi bibio, bitalokaga mbula, bantu baliaga, nu banuaga, nu basongaga, nu basonganaga, aba nu geingide Noa mu buato bunene,

³⁹ taba­menyinine aba nu gavule muiyalo, bakule na mazi, ubukaba kuvua kua Muana wa muntu.

⁴⁰ Mu kindi kikio, bamulume babili bakaba muisoa; umozi akatolua, nu ungo akasigala:

⁴¹ bakikulu babili basangua bakututa mu kilunga, umozi akatolua, nu ungo akasigala.

⁴² Kesiazi ntende: kubuno tamuizi busi buavue Mukota weinyu.

⁴³ Tondo menyazi buno; songo nyene numba anamenyaga nkungu zavue muibi, anakesezie ntende, nu ntanale­kelede numba zage kusambulua.

⁴⁴ Bubo nuinyue mube kayi­kayika; kubuno Muana wa muntu akavua mu nkungu zimutaku­kengela.

⁴⁵ Nazi mukambi mukatizia nu uli na menge, ndi mukota wage amubikile muangati wa numba zage, buno abeganie idia mu nkungu zasuaga?

⁴⁶ Mbogimbogi ku wozo mukambi, mu kusubania kua mukota wage akamusanga ekukita bubo.

⁴⁷ Lebelebe, nkumubula bune, Akamubika muangati wa biage binsania.

⁴⁸ Tondo songo wozo mukambi mubi akengede mu mutima wage bune, mukota wane eizizia;

⁴⁹ nu kulinga kulibula banyage, nu kulia nu kunua na banuzi;

⁵⁰ mukota wa wozo mukambi akavua mu busi buataku­kengela, nu nkungu zatakumenya,

⁵¹ nuwe akamusesa bindi bibili, nu kumubika na bengelezi: nu kukaba idilo nu kubuga meinyo.