Matayo 23 - Nouveau Testament en Kilega

Yesu Ekubula Beigisibua Bage nu Bantu Misako za baFalese.

¹ Nu Yesu abuide misanganano nu beigisibua bage bune,

² Basanzi nu baFalese bakuikalaga mu kisumbi kia Mose:

³ kitazi bunsania bubekumubula: tondo tamukite anga bubakukita. Kubuno bekutenda nu tabekukita.

⁴ Lebelebe, bekukanda mizigo mizitu, zitanavuama kuekua, nu bekuzibika ga bituli bia bantu; tondo tabekutunda kuzisigelezia na minue zabo.

⁵ Bakukita misako zabo insania buno bamenyue na bantu. Basanzile masanzo manene ma mukanda wa Kalaga ku bituli bia makoti mabo, nu bekulundia mipimbo za nsulu zabo.

⁶ Nu bakuelama kiziki kitangi mu bisa­gulo, nu bisumbi bitangi mu numba za musanganano,

⁷ nu beku­tunda kusekelua mu biziki bia isoko, nu kumanua na bantu buno, Labi.

⁸ Tondo inyue tamumanue buno Labi: kubuno muli na musozi umozi tugu, nu inyue bansania muabutua.

⁹ Nu tamu­mane muntu ga kisi buno soinyue, kubuno muli na Soinyue umozi tugu uli muigulu.

¹⁰ Nu tamumanue buno, basondelezia; kubuno muli na musondelezia weinyu umozi tugu, U Klisto.

¹¹ Tondo wozo uli munene kumuli akaba mukambi wa banyage.

¹² Nu unsania wisakika nti akasigulizibua, nu weisigulizia nti akasakikua.

Yesu Ekutenda ku baFalese.

¹³ Kabebe kanene kumuli basanzi nu baFalese, bengelezi! kubuno mukukandila bantu bukota bua meigulu: inyue tamu­kuingila mubo, nu tamukuziga bantu kuiyingilila mubo.

¹⁴ Kabebe kanene kumuli basanzi nu baFalese, bengelezi! kubuno mukunyaga numba za misigala, nu kuengelela gamukusega isego idazi. Ku bubo mukasungibua nunse.

¹⁵ Kabebe kanene kumuli, basanzi nu baFalese, bengelezi! mukutimba kitatenge nu kisi kulonda muntu umozi buno abe muigi­sibua weinyu; kungua akatizia meigisia meinyu nti amutinge ku bubi mambizi mabili muana wa kiziba kia keiya kumutinga.

¹⁶ Kabebe kanene kumuli, basondelezia, muli biuku, mukubulaga buno, Ndi muntu alumbila ku numba nene za kukumbamina nti takena: tondo ndi alumbila ku olo za mu numba za kukumbamina, nti akandua.

¹⁷ Inyue biuku nu bikongolo: kikizi kiatinga kinene olo, aba numba nene za kukumbamina zasuagizie zezo olo?

¹⁸ Mukubulaga lingo buho, Ndi muntu alumbila ku kayulo nti takena; tondo ndi alumbila ku kisansa kia kayulo, nti akandua.

¹⁹ Inyue biuku: kikizi kiatinga kinene, kisansa aba kayulo kasuagizie kikio kisansa?

²⁰ W ozo ukulumbila ku kayulo nti akulumbila kuko nu binsania bili gako.

²¹ Nuwe ukulumbila ku numba za kukumba­mina, nti akuzilumbila, nu ku wozo uli muzo.

²² Nu wozo uku­lumbila muigulu akulumbila ku kisumbi kia Kalaga, nu akulumbila ku wozo wikile gakio.

²³ Kabebe kanene kumuli, basanzi nu baFalese, bengelezi! mukukasana kindi kiekumi kia nsiogo, nu kinzani, nu lusolo, nu mukusiga misako minene za mulembe, buisanana, nu kiombo, nu bukatizio; tondo zezo uzatananina kukitua, nu zezo zengo tamuzi­sige.

²⁴ Inyue basondelezia, muli biuku! mukusuila iyendu, nu mukumena nzogu.

²⁵ Kabebe kanene kumuli, basanzi nu baFalese, bengelezi! kubuno mukusuga kituma nu lupepe gantata, tondo munda muiyala na nsese, nu buengelezi.

²⁶ Uwe muFalese kiuku, linga kusuga munda mua kituma nu lupepe, ububo gantata genge.

²⁷ Kabebe kanene kumuli, basanzi nu baFalese, bengelezi! kubuno mualingimana na nsinda zasingulua na mpemba, gantata zikumoneka nsoga, tondo munda muizile makua ma bantu, nu nsese insania.

²⁸ Ububo inyue mukumonekako na bantu buno muli beisanana, tondo munda mueinyu muizile na buengelezi, nu mibi.

²⁹ Kabebe kanene kumuli, basanzi nu baFalese, bengelezi! kubuno mukobaka nsinda za balengania, nu mukulebia nsinda za beisanana,

³⁰ nu mukutenda buno, songo tuabezaga mu nkiko za batateisue, tatunagomanizie nabo ku mikila za balengania.

³¹ Mukuidongekela buno muli bana bababo beitaga balengania.

³² Izaziazi kilindiko kia basoinyue.

³³ Inyue nzoka, kikanga kia mpoma, buni bumukatina lusungio lua kiziba kia keiya?

³⁴ Ububo unguililazi; namusingila balengania, nu bantu ba menge, nu basanzi: mukuita bamozi nu mukutaka bango ku muti wa magu; nu bango bamozi mukubalibula mu numba za musanganano, nu mukubasungia mu muino na muino:

³⁵ ububo mikila zeisanana zikumukubukila mu kisi, kutukila mikila za Abele wozo wisanana aba nu ku mikila za Zakalia, muana wa Balakia, umuitile gasamba kayulo nu numba zasuagibua.

³⁶ Lebelebe nkumubula bune, pitondo binsania bika­vua ku kikino kibuti.

Yesu Ekulilila Yelusalema.

³⁷ Yelusalema, Yelusalema, ukuitaga balengania, nu walibulaga banakusingide makozi! mambizi manga natundile kukundamania bana bobe, anga bukugubatilaga nkoko zagubatila bana bazo mu biupi, tondo ntuabuzigile!

³⁸ Numba zeinyu zasigala buasi.

³⁹ Kubuno nkumubula buno, Tamukamonako lingo, kutukila kano kaluma aba nu gamukaba muse muatenda bune, Mbogimbogi ku wozo ukuvua muizina lia Mukota.