Matayo 22 - Nouveau Testament en Kilega

Musumo wa Kisagulo kia Muana wa Mukota.

¹ Nu Yesu abakuide nu abeisile lingo misumo, atendile bune,

² Bukota bua meigulu bualingimana na mukota umozi wakitile idia lia kisagulo kia muana wage,

³ nu asingile bakambi bage kumana balagene nabo ku kisagulo: nu basombile kuvua.

⁴ Asingile lingo bango bakambi ababuide bune, Bulazi bantu bana­laganaga nabo bune, Idia liagoa, ngombe zane nu biana biane bia ngombe bianona biasesilue, binsania bise kayikayika: vuazi ku kisagulo.

⁵ Tondo nubo babengile buatendaga, beiyendede, umozi kuisoa liage, nungo kukunzia biage;

⁶ nu bango bakatile bakambi ba mukota, babakitile musumbia, nu babetile.

⁷ Mukota abonge­due; nu asingile bakoloboyo bage, buno bete babo beitani, nu bagisie muino wabo.

⁸ Bubo, abuide bakambi bage bune, Idia lia kisagulo liagoa, tondo bantu banalaganaga nabo tabatananina.

⁹ Endazi ku makano ma nzila, manazi bamuamonageko ku kisagulo.

¹⁰ Nu bakambi bage bendile mu nzila, nu bakundamanizie bantu bansania babamonine kubo, babi nu basoga: mu numba za kisagulo muabezaga muiyala na bageni.

¹¹ Tondo gengide mukota ku ku­lola bageni, amonine ku wamulume uteli na nsulu zasuaga ku kisa­gulo:

¹² nu Mukota amubuzizie bune, Kilemba kiane, kubuni wengide, nu ntuli na nsulu zasuaga ku kisagulo? Wozo muntu eikede kibibi.

¹³ Nu Mukota abuide bakambi bage bune, Muka­ndazi ku maboko nu ku magulu, nu nti muamuisa mu kapilo kumbu­ga; ukukaba kulila nu kubuga meinyo.

¹⁴ Kubuno bantu beingi bekumanua tondo bakeke ubekusombolua.

Yesu Ekubula Bantu ba Helode Kitondo kia Idigo.

¹⁵ Ububo baFalese bendile kukala luango luabo buno bubana­mukandika bitondo.

¹⁶ Bamusingide beigisibua babo, nu bantu ba Helode, bamubuide bune, Musozi tuizi buno, uli bulili, nu ukuigisia bantu meigisia ma Kalaga mu bulili, nu ntukulonda bunene bua muntu wampa: kubuno ntukulola ku kilungi kia bantu.

¹⁷ Buni bukukengela? Tubule tugu. Ndi buakulungana ku mulembe kuliga Kaisa idigo, aba kutaliga?

¹⁸ Tondo Yesu amenyine makengelo mabo mabi, nu ababuzizie bune, Inyue bengelezi, buni bumukundindika?

¹⁹ Ndololesiazi falanga zeidigo? Nu bavule na falanga zeidigo.

²⁰ Nu ababuide bune, Kikino kisusania nu mamano masanzo bili bia nazi?

²¹ Bamubuide bune, Bia Kaisa. Nu ababuide bune, Kasazi Kaisa bili bia Kaisa; nu kasazi Kalaga bili bia Kalaga.

²² Nu gabongule ku bubo, bangamine, nu bamusigile.

Yesu Ekubula Basadoke K uyuka kua Bantu ku Bakuzi.

²³ Mu busi bubo Basadoke babo bekutendaga buno, takuli iyukilo, bamuvuilide, nu bamubuzizie bune,

²⁴ Musozi, Mose atendile bune, Ndi wamulume akua, nu ntasiga bana nti muto wage ayana mukazi, nti abutila iselenzi bana.

²⁵ Mutuli muabezaga mibuto mutuba kamo bandemozi; nu mutangi asongile mukikulu nu akule, nu ntabutile bana, nu asigide muto wage mukikulu wage;

²⁶ nu wababili abezaga nuwe bubo, nu wabasatu lingo, aba nu ku wa mutuba kamo.

²⁷ Nu gakule babo bansania, mukikulu nuwe akule.

²⁸ Muiyukilo nti akaba mukikulu wanazi mu babo mutuba kamo? Kubuno nawe nawamusongile.

²⁹ Tondo Yesu abakuide bune, Mukuibaga, kubuno tamukumenyininaga masanzo, aba magala ma Kalaga.

³⁰ Kubuno muiyukilo takukasongua aba nu takukasonga­nua, tondo babe anga migenzi za muigulu.

³¹ Kubuno kuyuka kua bakuzi ku lukuo, ndi tamuasomine buamubulaga Kalaga bune,

³² Nne nili Kalaga wa Abalahama, nu Kalaga wa Isaka, nu Kalaga wa Yakobo? Kalaga nteli Kalaga wa bakuzi, tondo wa balami.

³³ Nu gongule musanganano ku bubo bangamine na meigisia mage.

Yesu Ekubula baFalese Kitondo kia Mulembe wa Kalaga.

³⁴ Tondo gongule baFalese buno, baSadoke tabamenyine bungo bubakula Yesu, bakundamene.

³⁵ Nu umozi wa ku beli abezaga ngatu za mulembe, amubuzizie buno amulindike.

³⁶ Musozi, kukakizia kukizi kuatinga kunene mu mulembe?

³⁷ Yesu amu­buide bune, Tunda Mukota Kalaga wobe mu mutima wobe unsania, nu mu kalamo kobe kansania, nu mu menge mobe mansania.

³⁸ Kubuno kukuno ukukakizia kutangi nu kunene.

³⁹ Nu kuebili kuli bubo, utunde munyobe anga buwitunda uwenyene.

⁴⁰ Ku­buno mu mamano makakizio mabili umuli mulembe unsania, nu bulengania.

Yesu Ekubuzia baFalese Bubakukengela ku Klisto.

⁴¹ Gabezaga baFalese bakundamana, Yesu ababuzizie ibuzio bune,

⁴² Buni bumukukengela ku Klisto? eli muana wa nazi? Bamubuide bune, Eli muana wa Davidi.

⁴³ Kubuno Davidi wenyene atendile mu magala ma Muuza Wasililila, amumanine Mukota, atendile bune,

⁴⁴ Mukota atendile ku Mukota wane, Ikala ku kuboko kuane kua seidume, aba nu ganangate beiti bobe.

⁴⁵ Ndi Davidi amumanaga bune, Mukota, kubuni eli muana wage?

⁴⁶ Nu takuli wamuakuide, aba kutukila busi bubo takuli wamubu­zizie ingo mbuzio.