Matayo 21 - Nouveau Testament en Kilega

Yesu Ekubasa ku Yelusalema na Lutanuno.

¹ Nu gababasile buigi na Yelusalema, nu kubasa ku Betepage, ku muiduko wa Oleve, Yesu asingile beigisibua bage babili,

² nu ababuide bune, Endazi ku muino uli luabusio lueinyu, nu kazanga kongo muamone ku mpunda zasuikua, nu muana wazo: nti muazisula, nu nti muanvuila nazo.

³ Ndi muntu amubuzia, nti muabula bune, Mukota ekuiyaninazo: nu kazanga kongo nti asingazo.

⁴ Bubuno bunsania buabezaga buno lizindilile liatenda­gua na mulengania bune,

⁵ Bulazi mukinga wa Siona bune, Mukota wobe akuvua kuguli, Wabota nu ekuenda gantata ga mpunda.

⁶ Nu beigisibua bendile, nu bakitile anga buababulaga Yesu,

⁷ nu bavule na mpunda, nu muana wazo, nu babikile nsulu zabo gantata gazo; nu eikede gantata gazo.

⁸ Nu bantu beingi ba misanganano banzile nsulu zabo mu nzila; nu bango basesile ntabi za miti, nu bazanzile mu nzila.

⁹ Nu musanganano wendaga luabusio luage, nu babo bamuyangaga, balalukile bubibu bune, Hosana ku muana wa Davidi; Mbogimbogi ku wozo ukuvua muizina lia Mukota; Hosana mu meigulu.

¹⁰ Nu gabasile ku Yelusalema, bantu bansania ba mu muino bangamine, babuzanizie bune, Wono eli nazi?

¹¹ Bantu ba misanganano batendile bune, Wono eli mule­ngania, Yesu, wa ku Nazaleta wa Galela.

Yesu Ekutukia Bakunzia mu Numba Nene za Kukumbamina Kalaga.

¹² Nu Yesu engide mu numba za kukumbamina Kalaga, nu alingile kuimbia babo bansania bakunzagia nu babo bakunzaga mu numba zezo, nu eidukizie meza ma bagulania ba falanga, nu bisumbi bia bakunzia ba nkulimba;

¹³ nu ababuide bune, Buasanzilue bune, Bakamana numba zane buno numba za masego: tondo beinyue muazigalukia anga kiziki kia banyagi.

¹⁴ Biuku nu bitunga bamuvuilide ku numba nene zakukumbamina, nu abonizie.

¹⁵ Tondo gamonine basankoga banene nu basanzi ku bubo buakitile buakuangamia, nu bana balalukile lingo mu zezo numba nene za kukumbamina bune, Hosana ku muana wa Davidi; bongilue.

¹⁶ Nu bamubuzizie bune, Ndi wungua ku bubo bukutenda babo bana? Yesu ababuide bune, E, ndi tamuasomine buno, mu tunua tua bana bato nu tunua tua bekibamoma, umukuzindilila lutanuno.

¹⁷ Nu abasigile, nu endile ku Betania, nu eikede kuko.

Yesu Asuilila Muti wa Biguma.

¹⁸ Gabezaga esasubia ku muino nindunindu, akule na nzala.

¹⁹ Nu amonine ku muti wa figi mu ntungo mua nzila, awendede, nu ntamonine kampa kugo, tugu nsamba; nu abuide muti bune, Ntuka­kolama biguma lingo tanga kutukila kano kaluma aba nu ku nkiko zitanakuzinda. Nu kazango kongo wozo muti womine.

²⁰ Nu gamonine beigisibua bage ku bubo, bangamine nu batendile bune, Buni buoma muti wa figi mu kazanga kongo?

²¹ N u Yesu abakuide bune, Lebelebe nkumubula bune, Ndi muaba na bukatizio buteli na kangonongono, mukakita tabubuno buakitua wono muti wa figi tugu; tondo mukabula muiduko bune, Tutumuka, nu wiyise mu kitatenge, nu nti buaba.

²² Nu binsania, bimukasegaga mu mase­go, ndi muakatizia, mukabikasua.

Bekubuzia Yesu Bukota Buage.

²³ Nu geingide Yesu mu numba zakukumbamina, basankoga banene nu bakulu ba bantu bamuvuilide gabezaga eseigisia, nu bamubuzizie bune, Buangato bukizi bukukitila ku bubuno? nu nazi wakukasile buangato bubuno?

²⁴ Nu abakuide bune, Nunne nkumubuzia bumozi, ndi muanakulabo, nti namubula nunne buanga­to bunkukitila ku bubo.

²⁵ Bubatizio bua Yoana, buatukile kuni, muigulu aba ku bantu? Babuzanizie buabo buabo, ndi tuamutenda bubo, buatukile muigulu; nti ekututenda buno, kubuni tamuamu­katizizie?

²⁶ Tondo ndi tukutenda buno, ku bantu; nu tukukua musanganano boba; kubuno bantu bansania bekukatizia Yoana buno, eli mulengania.

²⁷ Nu bakuide Yesu bune, Tatuizi. Nu ababuide bune, Nunne lingo nsikumubula ku buangato bunkukitila ku bubuno.

²⁸ Tondo buni bumukukengela? muntu umozi abezaga na bana babili; avule ku mutangi, abuide bune, Muana wane wamulume, enda ukite mukambo muisoa lia biguma.

²⁹ Amuakuide bune, Nsikuziga; tondo kumbusa eibezizie, endile.

³⁰ Isibo endede wozo ungo wa babili nu amutendile bubo lingo. Nuwe amuakuide bune, Nkuenda Tatane: tondo ntendile.

³¹ Kubabo babili, muana mukizi wakitile buatendile Isibo? Bamu­buide bune, Wozo mutangi. Yesu ababuide bune, Lebelebe nkumbula bune, Bandelelombe nu bakikulu bitazi bakalinga kuingila mu bukota bua Kalaga kumuli.

³² Yoana avule kueinyu mu buisanana, nu tamuamukatizizie; tondo bandelelombe nu bakikulu bitazi bamukatizizie: nu gamuamonine, tamuibezizie buno mumu­katizie.

Musumo wa Nyene Isoa Asegaga Bantu Bage Biguma Biage.

³³ Unguililazi ku ungo musumo: Kuabezaga muntu nyene numba, ayikile mizigi za biguma muisoa liage, alikulumanizie na mukolo, nu ombile muzinga wa kukambutula biguma, nu obakile numba ndazi, nu alisigile ku bakambi, nu endile mu kingo kisi.

³⁴ Nu gabede nkungu za biguma biseli buigi na kuela, asingile bakobe bage ku bakambi, kutola biguma biage.

³⁵ Tondo bakambi bakatile bakobe bage, nu balibuide umozi, beitile ungo, balibuide ungo makozi.

³⁶ Nu asingile lingo bango bakobe bage, batinga batangi ku buingi; bakambi babakitile anga bubakitile babango.

³⁷ Ububo abasingide muana wage, atendile bune, Embe bananza muana wane.

³⁸ Tondo bakambi, gabamonine ku muana, babuza­nizie bune, Wozo eli mupieni; vuazi tumuitazi, nu tupiene bupieni buage.

³⁹ Nu bamukatile, nu bamutukizie muisoa, nu bamuitile.

⁴⁰ Gakavua nyene isoa akakita babo bakambi buni?

⁴¹ Nubo bamubuide bune, Akeita babo bakambi babi; nu akakasa isoa liage ku bango bakambi, bakamukasaga biguma ndi biela.

⁴² Yesu ababuzizie bune, Ndi inyue tamuasomine mu masanzo bune, Ikozi liasombilue na bobaki, Uliabede ikozi inene lia kapindapinda; Bubo ubuatukile ku Mukota, Nubo bukutuganiagania?

⁴³ Kubuno nkumubula bune, Bukota bua Kalaga bukatukibua kumuli, nu bukakasua kingo kilongo kikakolamaga biguma.

⁴⁴ Nuwe wagua geikozi lilio nti abeleka; tondo unsania wakolokelua nalio, nti liamubungula.

⁴⁵ Nu gongule basankoga banene nu baFalese ku misumo zage, bamenyine bune, Akubatenda.

⁴⁶ Nu balondaga kumukata tondo bakule musanganano boba, kubuno bamumenyaga buno, eli mulengania.