Matayo 20 - Nouveau Testament en Kilega

Musumo wa Bakambi.

¹ Bukota bua meigulu bualingimana na nyene isoa wendile nindunindu kulonda bakambi bakumukambila muisoa liage lia biguma.

² Nu gagomezie nabo buno abalige falanga mutuba kamo ku muntu na muntu ku busi bumozi, abasingile muisoa liage.

³ Nu gatingile nkungu isatu, endile, nu amonine ku bango bemana tugu geisoko;

⁴ nu ababuide bune, Endazi muisoa liane namukase anga buakulungana. Nu bendile.

⁵ Gatingile nkungu mutuba, nu nkungu mubula, endile lingo akitile bubo.

⁶ Nu gatingile nkungu ikumi neimozi, endile, nu amonine ku bango bemana; ababuzizie bune, Kubuni inyue muemana tugu nkungu insania?

⁷ Bamubuide bune, Takuli muntu ukutukasa mukambo. Nu ababuide bune, Endazi muisoa liane.

⁸ Nu gabuabede buse mui­golo, nyene isoa abuide mulangi wa biage bune, Mana bakambi, ubakase lukalilo luabo, nti walingila ku bazinda nu kusila ku batangi.

⁹ Nu gavule babo ba ku nkungu ikumi neimozi bakasilue falanga mutuba kamo.

¹⁰ Nu gavule babo batangi, bakengede buno, Isue tukutalikilua ingo falanga; tondo nubo bakasilue falanga mutuba kamo.

¹¹ Nu gabakasilue lukalilo luabo, babulilide nyene isoa bune,

¹² Babano bazinda bakitile mukambo nkungu imozi tugu, nu walingimania neisue, nuisue tuakitile mukambo busi bunsania, nu tuababazibua na musi.

¹³ Tondo akuide umozi wa kubabo bune, Kilemba kiane, nsiakuagila; kubuno tuagomezie nobe ku falanga mutuba kamo tugu.

¹⁴ Kata zozobe, nu wiyendele; nku­tunda kukasa wozo ungo muzinda anga uwe.

¹⁵ Ndi nsinamenya kukita na biane anga bunkutunda? Ndi liso liobe lili ibi kubuno nne nili musoga?

¹⁶ Bubo bazinda bakaba batangi, nu batangi bakaba bazinda.

Yesu Ekubula Beigisibua Bage Kukua Kuage nu Kuyuka Kuage.

¹⁷ Nu Yesu gendaga ku Yelusalema na beigisibua bage ikumi nu babili bobenyene, nu gababede bese mu nzila, nu ababuide bune,

¹⁸ Unguililazi, tukuenda ku Yelusalema; nu Muana wa muntu agabulue ku basankoga banene nu basanzi; nubo bamusungie buno akue,

¹⁹ nu bamugabule ku baBilongo buno bamuililike, nu bamuli­bule, nu bamutake; nu ayukibue kusila kua bindi bisatu.

Yakobo nu Yoana Ninabo Ekubasegela ku Yesu.

²⁰ Nu nina wa bana ba Zebedayo avule na bana bage ku Yesu, amukumbamine, amusegile lusego lumozi.

²¹ Nu amubuide bune, Ukutunda kikizi? Amutendile bune, Laga bana bane babili beikale mu bukota bobe, umozi kuseidume nungo kuseikazi.

²² Tondo akuide bune, Tamukumenya kimukusega. Ndi munavuama kunua ku kituma kinkunua kukio? Bamutendile bune, Tunavuama.

²³ Ababuide bune, Lebelebe, Muanue ku kituma kinanue kukio: tondo kuikala ku kuboko kuane kua seidume, nu kuboko kuane kua seikazi, nsinavuama kumukasa; tondo kuikala kuko kuli ku bantu balongekedue na Tatane.

²⁴ Nu gongule beigisibua ikumi ku bubo, bongedue zezo mibuto zabo ibili.

²⁵ Tondo Yesu abama­nine, ababuide bune, Muizi buno bakota ba baBilongo bekubangata, nu bakota babo bakubakitia.

²⁶ Tondo bubo tabube kumuli; tondo wozo ukutunda kuba munene kumuli abe mukambi wa banyage,

²⁷ nuwe ukutunda kuba mutangi kumuli abe mukambi wa banyage:

²⁸ kubuno Muana wa muntu ntavule kukambilua, nu kukasana kalamo kage ku bukuluzi bua beingi.

Yesu Ekuzibula Meiso ma Biuku Bibili.

²⁹ Nu gabatukile ku Yeliko, musanganano munene wamuyangile.

³⁰ Nu bamulume babili biuku babezaga mu ntungo za nzila, gabongule buno, Yesu ukutinga, balalukile bune, Mukota, muana wa Davidi, tukuile kiombo.

³¹ Nu bantu babazugide bune, Ikalazi kibibi; nu balalukile bune, Mukota muana wa Davidi tukuile kiombo.

³² Nu Yesu emanine, nu abamanine, nu ababuzizie bune, Mukutunda nimukitile kikizi P

³³ Bamubuide bune, Muko­ta, tukutunda meiso meitu mazibulue.

³⁴ Nu Yesu abakuilide kiombo, nu etubizie ku meiso mabo; nu kazanga kongo, bamonine nu bamuyangile.