Matayo 18 - Nouveau Testament en Kilega

Yesu Ekuigisia Beigisibua Bage Buno Banze.

¹ Mu nkungu zezo beigisibua bavule ku Yesu, bamubuzizie bune, Nazi uli munene mu bukota bua meigulu?

² Yesu amanine muana muto, nu amubikile munkatini muabo,

³ nu atendile bune, Lebelebe, nkumubula bune, Ndi tamuagaluka, nu kuba anga bana bato, tamukeingila mu bukota bua meigulu.

⁴ Muntu unsania wibotia anga wono muana muto, ukaba munene mu bukota bua meigulu.

⁵ Unsania wasekela muana muto anga wono muizina liane nti ansekela:

⁶ tondo ukeinagia umozi wa ku babano bana bato bekunkatizagia mutima, buatananina akandue ikozi lia kugoga muikosi liage, nu kuisua muiziba lia kitatenge.

⁷ Kabebe ku kisi ku kabamba ka kuinania mitima! Lebelebe, kuinania mitima kuatunganana kuvua, kabebe ku wozo ukuinia ungo mutima.

⁸ Ndi kuboko kuobe aba kugulu kuobe kuakuinia mutima, nti wakusesa, nu nti wakuisa bulazi nobe; gunulumba wingila kitunga mu kalamo, kuteli kuingila mu keiya katanakuzima na maboko mabili nu magulu mabili.

⁹ Ndi liso liobe liakuinia mu­tima, nti walitikia, nu nti walisa bulazi nobe; gunulumba wingila mu kalamo na liso limozi, kuteli kutumbua mu kiziba kia keiya na meiso mabili.

¹⁰ Tamubenge muana muto umozi wa ku babano, kubuno nkumubula bune, Muigulu bindi binsania migenzi zabo zikulolaga ku meiso ma Tatane uli muigulu.

¹¹ (Kubuno Muana wa muntu avule konia kikio kiazimine.)

¹² Mukukengela buni? Ndi muntu eli na lukama lua mikoko, nu umozi wazimina, ndi ntana­siga zizingo makumi mubula nu mubula, nu kuenda mu muiduko kulonda wozo wazimine?

¹³ Nu gagumonine, lebelebe nkumubula bune, Agubogedebogede, kutinga zezo makumi mubula nu mubula zitazimine.

¹⁴ Ububo Soinyue uli muigulu ntakutunda muana umozi wa ku babano bana bato kuzimina.

Yesu Ekubula Beigisibua Bage Menge a Bantu a Bakukitila Bango.

¹⁵ Ndi mubuto wobe akuagila, enda, umulolesie buakuagila inyue babili: ndi akunguilila, nti waluta mubuto wobe.

¹⁶ Ndi anana nti wenda na muntu umozi aba bantu babili ububo bulongeki buasuage ku balongeki babili aba basatu.

¹⁷ Nu ndi abanana, nti walondola mulondo wozo ku ekelezia; nu ndi anana ku ekelezia, nti abe kuguli anga wa Bilongo nu anga Mundelelombe.

¹⁸ Lebelebe nkumubula bune, Kinsania kimuakandage ku kisi, nti kiakandue nukio muigulu, nu kinsania kimuakandulage ku kisi, nti kiakandulue nukio muigulu.

¹⁹ Nkumubula lingo bune, Ndi babili beita­bizania ku luango lumozi, nti basega, nu Tatane uli muigulu abakitile anga bubasegaga.

²⁰ Ndi babili aba basatu bakundamana kuizina liane, nunne nti nili munkatini muabo.

Yesu Ekubula Beigisibua Bage Bubasigilila Bango Bantu Buagi Buabo.

²¹ Nu Petelo avule nu amubuzizie bune, Mukota, ndi mubuto wane anagila nti namusigilila mambizi manga? Ndi mambizi mutuba kamo?

²² Yesu amubuide bune, Nsikukubula tugu mambizi mutuba kamo; tondo Makumi mutuba kamo mambizi mutuba kamo.

²³ Ububo bukota bua meigulu bualingimana na mukota umozi watundaga kuganza biage biabezaga na bakambi bage.

²⁴ Nu galingile kuganza biage, bavule na umozi abezaga na nsombi za talanta tununu ikumi.

²⁵ Nuwe ntabezaga na kena ka kuliga nsombi zage, nu mukota wage atendile bune, Bamukunzie na mukazi wage nu bana bage nu biage binsania bubo ubualige nsombi zage.

²⁶ Mukambi aguede gansi amukumbamine, nu amubuzizie bune, Mukota nkuile kiombo, nkakuligaga nsombi insania.

²⁷ Nu Mukota wage amukuilide kiombo, amulekede, nu amusigilide na nsombi.

²⁸ Tondo mukambi atukile mu numba, akulumene nuwe na mukambi wage wabezaga na nsombi za ndenalise lukama, amuka­tide geikosi atendile bune, Ndige nsombi zane kano kaluma.

²⁹ Mukambi wage aguide gansi, amulakide bune, Nkuile kiombo, nkakuligaga nsombi zobe.

³⁰ Tondo we ananine, endile kumubika mu kikando, aba nu gakaliga nsombi.

³¹ Gamonine bango bakambi banyage ku bubo mitima zabo zinine, bavule kusolela mukota wabo bunsania buakitaga.

³² Mukota wage amumanine, amubuide bune, Uwe mukambi mubi, nakusigilide nsombi insania, kubuno wanda­kide:

³³ ndi ntunavuama kukuila munyobe kiombo anga bunaku­kuilide kiombo?

³⁴ Nu mukota wage ongilue, amubikile mu maboko ma basungia aba nu gakaliga nsombi insania.

³⁵ Ububo buamukite Tatane uli muigulu, ndi umozi wa kumuli ntakusigilila mubuto wage mu mitima zeinyu.