Matayo 17 - Nouveau Testament en Kilega

Kugaluka kua Kilungi kia Yesu.

¹ Nu gatingile bindi mutuba Yesu atolile Petelo, nu Yakobo, nu muto wage Yoana, nu abakamine nabo ku muiduko mulazi bobenyene:

² nu kilungi kiage kiabagalukide; nu malanga mage masanine anga kisongo kia busi, nu nsulu zage zabede zenga anga kiengi.

³ Nu babasidue na Mose nu Eliya besatenda nage.

⁴ Nu Petelo akuide Yesu bune, Mukota buli busoga ndi tuikala gano: ndi watunda, nobake nusu isatu; lumozi luobe, nu lumozi lua Mose, nu lumozi lua Eliya.

⁵ Gabezaga esatenda, kimpa kia kiengi kiabakukide; iyuki liatukile mu kimpa bune, Wono eli Muana wane, u Ngoli zane, nakomana nage; munguililazi.

⁶ Nu gongule beigisibua bage kuiyuki lilino, bakomine malanga gansi, nu bakule boba.

⁷ Nu Yesu avule, etubizie kubeli, abatendile bune, Yukazi, tamunakua boba.

⁸ Nu gabalambuide meiso, tabamonine kungo, umpanga Yesu.

⁹ Nu gababezaga basagela muiduko, Yesu abakakizizie bune, Tamubule ungo muntu bumuamona kubo, aba gakayuka Muana wa muntu ku bakuzi.

¹⁰ Nu beigisibua bage bamubuzizie bune, Kubuni basanzi bakutenda bune, Buatunganana Eliya kulinga kuvua tanga?

¹¹ Nuwe abakuide bune, Lebelebe, Eliya akavua kukunga binsania;

¹² tondo nkumubula bune, Eliya avule kalazi, tabamu­menyine, tondo bamukitile anga bubatundaga. Ububo Muana wa muntu ababazibue nabo.

¹³ Beigisibua bamenyine bune, Ekuba­sambalila musagu wa Yoana Mubatizi.

Yesu Akonia Wabezaga na Lungu.

¹⁴ Nu gababasile ku musanganano, muntu umozi avule kueli, amukomine mazu, nu atendile bune,

¹⁵ Mukota, kuila muana wane wamulume kiombo, eli na lusambo lua lungu, ekubabazibua nunse; mambizi meingi ekuitumba ga keiya nu mu mazi.

¹⁶ Namuekile ku beigisibua bobe, tabavuamine kumonia.

¹⁷ Nu abakuide bune, Inyue kibuti kikio kia busombi nu kiteli na bukatizio, ndi nkeikalaga neinyu kankanka? gani gankakutilua? Vuazi nage kundi.

¹⁸ Nu Yesu amuzugide, nu wozo musumbu atukile mu muana: mu nkungu zezo muana onine.

¹⁹ Nu beigisibua bavule ku Yesu bobenyene, nu bamubuzizie bune, Kubuni isue tatuavuamine kumutikia?

²⁰ Nu ababuide bune, Ku kabamba ka busosu bueinyu mu bukatizio: lebelebe, nkumubula, bune, Songo muli na bukatizio anga mbuto za bunyonyo, munabula muiduko bune, Tuka kuko, nu utingile kukuno, nu ukatinga; takuli kitakamukulunganina.

²¹ Tondo bubuno tabunamoneka tugu kute kukusega nu kugila.

Yesu Ekubula Beigisibua Bage Kukua Kuage nu Kuyuka Kuage.

²² Nu gababezaga mu Galela, Yesu abatendile bune, Bakagabula Muana wa muntu mu maboko ma bantu;

²³ nu kuitua, nu kuyu­kibua kusila kua bindi bisatu. Nu abede na kabebe nunse.

Yesu Abangamizie ku Kuliga Idigo.

²⁴ Nu gababasile mu Kapenuma baligia ba idigo bavule ku Petelo bamubuzizie bune, Musozi weinyu ntakuliga idigo kubuni?

²⁵ Atendile bune, E, nkuliga. Nu ingide mu numba, Yesu alingile kumubuzia bune, Simona, ukukengela buni? ndi bakota ba kisi bekuligia bana babo aba ndi bageni?

²⁶ Nu akuide, Bageni tugu. Yesu ababuide bune, Bubo bana bakandulua.

²⁷ Tondo tunavua kubeinia mitima, enda ku kiziba, nu isa kakila mukio, nu tola kiena kialinge kuvua; gawasule mu kanua kakio, nti wamone shekela nu nti wazitikia, nu nti wabakasa zobe nu zane.