Matayo 13 - Nouveau Testament en Kilega

Musumo wa Mbuto.

¹ Mu busi bubo Yesu atukile mu numba, eikede ku mutili wa kitatenge.

² Musanganano munene wamuvuilide, kububo eingide mu buato, eikeide; nu musanganano unsania wemene ku mutili.

³ Nu abatendile bitondo bingi mu misumo bune, Unguili­lazi, muyiki endile kuyika mbuto;

⁴ nu gayikaga, mbuto imozi zakolokile mu ntungo mua nzila, nu tuzoni tuavule tuazilile:

⁵ ingo zakolokile gantata ga luanda, takuabezaga bisogo bingi: nu kazanga kongo zasile kubuno takuabezaga bisogo bingi:

⁶ nu gasanukile musi, zagulumine; kubuno tazabezaga na mizi, nu zomine.

⁷ Ingo zakolokede mu mikele; nu mikele zasile nu zazilimbanizie:

⁸ nu ingo zakolokile ga bisogo bisoga, nu zakolamine biguma bingi, imozi lukama, ingo makumi mutuba, nu ingo makumi masatu.

⁹ Wozo uli na matuzi makunguilila, nti unguilila.

¹⁰ Nu beigisibua bage bamuvuilide, bamubuide bune, Buni bukubeisa misumo?

¹¹ Yesu abakuide bune, Inyue umuakasilue menge ma kumenya tukungu tua bukota bua meigulu, tondo babo tabamakasilue.

¹² Kububuno muntu unsania uli na kena, baka­mukasa kango, nu akaba na bingi: tondo muntu unsania uteli na kena, akanyagua kako keli nako.

¹³ Ku bubo ukunkubeisila misu­mo; kubuno bekumona tondo tabekumona, nu bekungua tondo tabekungua, aba tabekumenyinina.

¹⁴ Nubo bazindilizie meigisia ma mulengania Yesaya ekubabula bune, Kungua mungue, tondo tamuamenyinine; nu kumona muamone, nu tamukutitika;

¹⁵ Kubuno mitima za bantu babano zabezaga mibibu, Nu matuzi mabo tamakunguaga, Nu basila kuziba meiso; Buno banavua kutitika, Nu kungua na matuzi, Nu kumenyinina mu mitima zabo, Nu kugaluka lingo, Nu ninabonia.

¹⁶ Tondo meiso meinyu meli na mbogimbogi, kubuno mekumona; matuzi meinyu meli na mbogimbogi lingo, kubuno mekungua.

¹⁷ Lebelebe nkumubula bune, Balengania beingi nu bantu beisanana batundile kumona ku binsania bimukumona kubio, tondo tababi­monineko; nu batundile kungua ku binsania bimukungua kubio, tondo tababiunguleko.

¹⁸ Umpanga unguililazi ku musumo wa muyiki wa mbuto.

¹⁹ Muntu unsania ukungua kuidagi lia bukota, kuteli kulimenyinina, ububo wozo mubi ekuvua, nu ekunyaga mbuto zayikua mu mutima wage. Wono uwayikilue mu ntungo mua nzila.

²⁰ Nuwe wayikilue ga luanda, uwozo ukungua kuidagi nu kazanga kongo ekulitunda na mbogimbogi;

²¹ tondo nteli na muizi munda muage, ekusigala nkungu nkeke; nu gakuvua kabebe aba lubabazio ku kabamba keidagi, kazanga kongo ekuikuka.

²² Nuwe wayikilue mu mikele, uwozo ukungua kuidagi; tondo tubebe tua kisi nu buengelezi bua bikulo, bukulimbania idagi, we ntako­lame.

²³ Nuwe wayikilue mu bisogo bisoga uwozo ukungua kui­dagi nu kulimenyinina; uwozo wakolama biguma; umozi lukama, ungo makumi mutuba, ungo makumi masatu.

Musumo wa Bisugu.

²⁴ Abeisile ungo musumo bune, Bukota bua meigulu bualingi­mana na muntu wayikile mbuto nsoga muisoa liage:

²⁵ tondo gabezaga bantu beiyombeka ku tulo, wamusomba avule, kuyika mbuto mbi munkatini mua mbuto nsoga, nu endile.

²⁶ Tondo gasile mbuto nsoga zakolamine, nsamba za tunkukuzungu zamone­kile nuzo kuzo.

²⁷ Nu bakambi ba nyene isoa bavule, bamubuzizie bune, Mukota, ndi ntuayikile mbuto nsoga muisoa liobe? Kuni kuatukila tunkukuzungu?

²⁸ Akuide bune, wansomba uwakitile bubo. Bakambi bage bamubuide bune, Ndi ukutunda tuende kuyula tunkukuzungu?

²⁹ Ababuide bune, Kilo; kubuno ndi muayula tunkukuzungu, nti muayula mumpunge.

³⁰ Bisigazi biasile gamozi aba mu nkungu za kutubula: nkabula batubuzi buno, Lingazi kukungika tunkukuzungu nu kutukanda bibombo bibombo kutukagisibua; tondo kundamaniazi mumpunge mu kigenge kiane.

Musumo wa Mbuto za lua Bunyonyo.

³¹ Abeisile ungo musumo bune, Bukota bua meigulu bualingi­mana na kambuto ka lua bunyonyo, muntu akakatile, nu akayikile muage muisoa:

³² keli kakeke ku mbuto insania; tondo gabuku­kula, bukutinga mbuto insania, nu nti zaba muti munene, nu mu ntabi zazo tuzoni tua mu mpelela nti tukuvua kukata.

Musumo wa Mugago.

³³ Abeisile ungo musumo bune, Bukota bua meigulu bualingi­mana na mugago, wisile mukikulu mu bianzi bisatu bia bugali, nu bunsania buagagile nunse.

³⁴ Nu Yesu atendile na musanganano binsania mu misumo, ntanabuatendile buatatendile ku musumo:

³⁵ bubo lizindilile liatendagua na mulengania bune, Nkatenda ku misumo; Nkatenda biabezaga biabisua kutukila kulinga kua kisi.

³⁶ Nu Yesu asigile musanganano, nu eingide mu numba; beigisibua bage bamuvuilide, nu bamubuide bune, Tuisulile musumo wa tunkukuzungu tuabezaga muisoa.

³⁷ Nu abakuide bune, Ukuyi­kaga mbuto nsoga eli Muana wa muntu;

³⁸ Nu isoa lili bantu ba kisi; mbuto nsoga zili bana ba bukota; tunkukuzungu tuli bana ba wozo mubi;

³⁹ nu musombi eli Liabo, u Satana; busi bua kutubula buli kuzinda kua nkiko, batubuzi beli migenzi za Kalaga,

⁴⁰ Umpa­nga bantu bakakundamania tunkukuzungu nu kutuisa ga keiya, nu bubo ubukaba ku kuzinda kua nkiko.

⁴¹ Muana wa muntu akasinga migenzi zage, bakasombola mu bukota buage binsania bikuagia bango, nu bakiti babi.

⁴² Nu bakeisua mu kiziba kia keiya, uku­kaba idilo nu kubuga meinyo.

⁴³ Mu busi bubo bantu basoga bakasana anga kisongo kia busi mu bukota bueIsibo. Wozo uli na matuzi makunguilila, nti unguilila.

Musumo wa Bikulo Biabisua.

⁴⁴ Bukota bua meigulu bualingimana na kikagi kiabisilue muisoa; muntu akimonine, nuwe akibisile lingo; nu ku mbogimbogi zage, endile, nu akunzisizie biage binsania, nu akunzile lilio isoa.

Musumo Weikozi lia Bukunza Bubibu.

⁴⁵ Lingo, bukota bua meigulu bualingimana na muntu mukunzia, walondaga ikozi isoga lia bukunza bubibu;

⁴⁶ nu gamonine ikozi lia pelele lia bukunza bubibu, endile nu akunzizie biage binsania, nu alikunzile.

Musumo wa Kakila ka Biena.

⁴⁷ Lingo, bukota bua meigulu bualingimana na kakila kisagua mu kitatenge, kakundamanizie biena bia nkita na nkita:

⁴⁸ geiyalile kakila bundo, bakabulutile ku muse; beikeide, bakundamanizie hiabezaga bisoga mu mato, nu bisile biabezaga bibi.

⁴⁹ Nu ububo ubukaba mu kuzinda kua nkiko; migenzi zikavua, bakatikia bagi abezaga munkatini mua bantu beisanana,

⁵⁰ nu bakeisua mu kiziba kia keiya, ukukaba idilo nu kubuga meinyo.

⁵¹ Ndi muamenyinina bunsania? Bamuakuide bune, E.

⁵² Nu ababuide bune, Musanzi unsania uli muigisibua mu bukota bua meigulu alingimana na muntu muiya numba ukutikia bikulo bitangi nu bizinda muisuku liage.

Yesu Ekusubia ku Nazaleta, Bamusomba.

⁵³ Nu gasilile Yesu misumo zeno, atukile.

⁵⁴ Nu gabasile mu kilongo kia kuabo abeigisizie mu numba zabo za musanganano, nu bangamine nu batendile bune, Kuni kuasanga muntu wono menge mamano, nu migeleko zeno?

⁵⁵ Ndi wono ta umuana wa mukulumizi wa mbabu? ndi nina ta uwozo ukumanua buno Malia? nu ndi bato bage ta u Yakobo, nu Yosefu, nu Simona, nu Yuda?

⁵⁶ Nu babitu bage, bansania tabeli kueitu? Umpanga kuni kuasangila wono bubuno bunsania?

⁵⁷ Nu beinine mitima nage. Nu Yesu ababuide bune, Mulengania ntakubengua ku ungo, umpanga kuabo, nu mu numba zage.

⁵⁸ Nu ntakitile migeleko kuko, kubuno tabakatizizie.