Matayo 11 - Nouveau Testament en Kilega

¹ Nu gasilile Yesu kukakizia beigisibua bage ikumi na babili, nuwe atukileko kuigisia nu kusambala mu mino zabo.

Yoana Mubatizi Asingile Beigisibua Bage Kubuzia Yesu.

² Nu gabezaga Yoana mu kikando ongule ku misagu za buakitaga Klisto asingile beigisibua bage babili bamubuzie bune,

³ Ndi uwe u wozo wavue, aba ndi tukike ungo?

⁴ Yesu abakuide bune, Endazi musambalile Yoana bumungua kubo nu bumuamona kubo:

⁵ biuku bise biamona, bitunga bise biatabanga, beiya bibali bengibua, bimbula matuzi bise biungua, bakuzi bayukibua, nu bazambi basambalilua musagu musoga.

⁶ Nu mbogimbogi ku wozo uta­kuina mutima nanne.

⁷ Nu gabendile, Yesu alingile kubula musanganano bitondo bia Yoana, ababuide bune, Muendaga kulonda kikizi mu kalula? Kulola lusolu lukutengatenga na lumpumpu?

⁸ Kikizi kimuendaga kulola? ndi muntu wavuala nsulu zabota? Unguililazi, babo bavuala nsulu zabota beli mu numba za bakota.

⁹ Tondo muendile kulola kikizi? Ndi mule­ngania? E, nkumubula bune, Wozo watinga mulengania,

¹⁰ Wozo uwasanzilue bune, Unguililazi, nalinga kusinga mugenzi wane, Kukunga nzila zobe.

¹¹ Lebelebe nkumubula bune, Takumonekaga muntu munene wabutua na bakikulu, watinga Yoana Mubatizi, tondo wozo uli mukeke mu bukota bua meigulu amutinga.

¹² Kutukila ku bindi bia Yoana Mubatizi aba nu kano kaluma bukota bua meigulu buku­luaninua bita, nubo baluani ba bita ubekubutola.

¹³ Kubuno balengania bansania nu mulembe balenganizie aba nu ku Yoana.

¹⁴ Nu ndi mukutunda kubumenyinina, wono u Eliya, wavue.

¹⁵ Wozo uli na matuzi makunguilila, nti unguilila.

¹⁶ Tondo nkalingimania kibuti kino na kikizi? Kili anga bana beikile kuisoko, bekubula banyabo,

¹⁷ nu bekutenda bune, Tuamuidide mpengu, nu tamuaminine; tuamulilide na kasina, nu tamuigombile ga makuba.

¹⁸ Kubuno Yoana avule nu ntalile nu ntanune, nu batendile bune, Eli na musumbu.

¹⁹ Muana wa muntu avule, ekulia nu ekunua, nu bekutenda bune, Muntu kiliagundu nu munuzi wa maku, nu muida wa bandelelombe nu bagi! Nu menge maku­bingibua ku misako zamo.

²⁰ Nu alingile kuzugila zezo mino nu akitile migeleko mingi muzo, nubo tabeiyanizie.

²¹ Kabebe ku Kolazina! kabebe ku Betesaida! songo migeleko mingi zakitilue kumuli, uzakitilue mu Tula nu Sidona, songo beyanizie kalazi banekeide mu nsulu za nsago nu mu luito.

²² Tondo nkumubula bune, Lusungio lua Tula nu Sidona lukaba neibineibi ku busi bua lusungio kutinga lusungio lueinyu.

²³ Nu uwe Kapenuma, ndi ukabakamibua aba kuigulu? Ukake­gibua ku Kiziki kia Bakuzi: songo migeleko zakitilue kumuli, uzakitilue mu Sodomo songo wono muino ukili aba nu lelo.

²⁴ Tondo nkumubula bune, Lusungio lua Sodomo lukaba neibineibi ku busi bua lusungio kutinga lusungio lueinyu.

²⁵ Mu nkungu zezo Yesu akuide buno, nakusima Tatane, Mukota wa meigulu nu kisi, kubuno wabisile malagi mano ku beli na menge nu bumenyinino, nu wamamenesia ku bana;

²⁶ bubo, Tatane, kubuno bubo buabezaga buakutananina.

²⁷ Tatane ankasile binsania: takuli wizi Muana, tugu Isi; takuli wizi Isi tugu Muana, nu unsania Muana ekutunda kumulolesia.

²⁸ Vuazi kundi, bansania bakutua na mikambo, nu bakutua na mizigo, nunne namu­muzie.

²⁹ Muiyambike kisanga kiane kia mukambo, nu muiyigisie kundi kubuno nne nabota, nu nili bubobelelo mu mutima: nuinyue mumunue mubenyene.

³⁰ Kisanga kiane kia mukambo kiatamba, nu muzigo wane uli mugu.