Malako 9 - Nouveau Testament en Kilega

¹ Nu abatendile bune, Lebelebe nkumubula buno, bamozi bemana gano, tabakakua aba nu gabakamona ku bukota bua Kalaga busavua na magala.

Kugaluka kua Kilungi kia Yesu.

² Nu kusila kua bindi mutuba Yesu atolile Petelo, nu Yakobo, nu Yoana, nu endile nabo gantata ga muiduko munene nabo bebenyene: nu kilungi kiage kiabagalukide;

³ nu nsulu zage zakelimine, zabe­zaga zenga nunse, butanamenya mukulumizi wa ga kisi kuzengia.

⁴ Nu babasidue na Eliya nu Mose: nu besatenda na Yesu.

⁵ Nu Petelo akuide Yesu bune, Labi, buli busoga ndi tuikala gano: nu tobakazi nusu isatu; lumozi luobe, nu lumozi lua Mose, nu lumozi lua Eliya.

⁶ Kubuno ntamenyaga buakuakula; kubuno bakule boba nunse.

⁷ Nu kimpa kiabakukide; nu iyuki liatukile mu kimpa bune, Wono eli Muana wane, u Ngoli zane: munguililazi.

⁸ Nu kazanga kongo gabagebilegebile, tabamonine ku muntu, umpanga Yesu nabo.

⁹ Nu gababezaga bese bakumba muiduko, abakakizizie bune, Tamusambalile muntu ku bumuamonakubo, aba Muana wa muntu gakayuka ku bakuzi.

¹⁰ Nu bakokomezizie idagi lilio, babuzanizie buabo buabo, buno kuyuka ku bakuzi kuli buni?

¹¹ Nu bamu­buzizie bune, Kubuni basanzi bekutenda buno Eliya atunganana kulinga kuvua?

¹² Nu abatendile bune, Lebelebe Eliya akalinga kuvua, nu kukunga binsania: nu buni buasanzidue Muana wa muntu, buno ababazibue nunse nu kusombua?

¹³ Tondo nkumutenda buno, Eliya avule kalazi, nu bamukitile anga bubatundaga anga buasanzilue.

Yesu Ekonia Muana Uli na Musumbu.

¹⁴ Nu gabasile beigisibua bage, bamonine ku musanganano munene wabatimbikania, nu basanzi babuzanizie nabo.

¹⁵ Nu kazanga kongo musanganano wamumonineko nu bangamine nunsa­nia, nu beitumine lubilo kuko nu bamusekeide.

¹⁶ Nu ababuzizie bune, Buni bumukubuzania nabo?

¹⁷ Nu muntu umozi mu wozo musanganano amutendile bune, Musozi, nakuvuilide na muana wane wamulume, nu abezaga na musumbu wa kaluma;

¹⁸ nu gakumu­buila, nu nti amugusia; nu nti esabasa iyulo, nu kukeketa meinyo, nu ese onda: nu natendile ku beigisibua bobe buno bamutikie; nu tabavuamine.

¹⁹ Nu Yesu abakuide bune, Inyue kibuti kikio kiteli na bukatizio ndi nkeikalaga neinyu kankanka? Gani ganka­kutilua? Vuazi nage kundi.

²⁰ Nu bavule nage kueli: nu gamu­monineko, kazanga kongo musumbu amugusizie nunse, nu aguide gansi, nu ebulubutizie, nu abasile iyulo.

²¹ Nu abuzizie isi nkungu nkizi zamulingile wono musumbu? Nu amutendile bune, Kutukila ku buana buage.

²² Nu mambizi meingi ekumutumbaga ga keiya nu mu mazi, buno amubigie: tondo ndi unavuama kukita, tukuile kiombo, nu tukasie.

²³ Nu Yesu amutendile bune, Ndi una­vuama! Bunsania bunakulungana ku wozo wakatizia.

²⁴ Kazanga kongo isi wa wozo muana alalukile, nu atendile bune, Nakatizia, nkasie ku kutakatizia kuane.

²⁵ Nu gamonine Yesu ku musanga­nano use wakundamana azanzuide wozo musumbu, amutendile bune, Uwe musumbu wa kaluma, nu kimbula matuzi, nakukakizia buno, tuka mu wono nu ntuingile mueli lingo.

²⁶ Nu alalukile, nu amugusizie nunse, nu atukile; nu abeide anga mukuzi; nu beingi batendile bune, Akua.

²⁷ Tondo Yesu amukatile geikoko, nu amu­zanzuide, nu emene.

²⁸ Nu geingide mu numba beigisibua bage ba­muvuilide ku lumbisombiso, Kubuni tatuavuamine kumutikia?

²⁹ Nu abatendile bune, Bubuno tabunamoneka tugu kute ku kusega.

Yesu Ekutenda Beigisibua Bage Kukua Kuage nu Kuyuka Kuage.

³⁰ Nu batukile kuko, batingile mu Galela; nuwe ntatundaga muntu kumenya bubo.

³¹ Kubuno eigisagia beigisibua bage buno, Muana wa muntu asila kugabulua ku maboko ma bantu, nubo bamuite; nu gasile kuitua, kusila kua bindi bisatu nti ayuke.

³² Tondo tabamenyinine bubo, nu bakule boba kumubuzia.

Yesu Ekubula Beigisibua Bage Kuanza.

³³ Nu babasile ku Kapenuma; nu gababeide bese mu numba, ababuzizie bune, Kikizi kimuakananizanagia mu nzila?

³⁴ Tondo beikeide kibibi: kubuno babezaga bakuakanania mu nzila buno, nazi uli munene.

³⁵ Nu ekede gansi, nu amanine babo ikumi na babili, nu abatendile bune, Ndi muntu ekutunda kuba mutangi, abe muzinda ku bansania, nu mukambi wa bansania.

³⁶ Nu atolile muana muto, nu amubikile munkatini muabo: nu amukatile geikoko, nu abatendile bune,

³⁷ Na muntu na muntu wasekela muana muto anga wono muizina liane, nti ansekela: nu wozo wansekela nti ntansekela, tondo nti asekela wozo wansingile.

Yesu Abuide Buno Tabazugile Muntu Ukukita Migeleko.

³⁸ Yoana amutendile bune, Musozi, tuamonine ku muntu umozi watikagia basumbu kuizina liobe; tondo tuamuzugide, kubuno ntakutuyanga.

³⁹ Tondo Yesu abatendile bune, Tamumuzugile: kubuno takuli muntu unakita mugeleko kuizina liane, nu kuntenda bubi.

⁴⁰ Kubuno wozo utakututuna, nti tuli nabo bumozi.

⁴¹ Kubuno unsania ukamunusagia kituma kia mazi ma kunua, kubuno muli bantu ba Klisto, lebelebe nkumutenda buno, ntakaziminua na lukalilo luage lusoga.

⁴² Nu unsania ukeinagia umozi wa ku babano bana bato bakunkatizia mutima, buatunganana akandue ikozi lia kugoga muikosi liage, nu kuisoa mu kitatenge.

⁴³ Nu ndi kuboko kuobe kuakuinia mutima, nti wakusesa; gunulumba wingila kitunga mu kalamo, kutinga kuba na maboko mabili nu kutumbua mu kiziba kia keiya katakuzimaga.

⁴⁴ Mukuso wabo tagukue, nu keiya takazime.

⁴⁵ Ndi kugulu kuobe kuakuinia mutima, nti wakusesa; gunulumba wingila kitunga mu kalamo, kutinga kuba na magulu mabili nu kutumbua mu kiziba kia keiya.

⁴⁶ Nu mukuso wabo tagukue nu keiya takazime.

⁴⁷ Nu ndi liso liobe liakuinia mutima, nti walitikia, gunulumba wingila mu bukota bua Kalaga na liso limozi kutinga kuba na meiso mabili nu kutumbua mu kiziba kia keiya;

⁴⁸ nu mukuso wabo tagukue nu keiya takazime.

⁴⁹ Kubuno na muntu na muntu nokalungua na keiya.

⁵⁰ Munkange uli musoga; tondo ndi munkange taguli na nse lingo, gunasuagibua na kikizi? mube na munkange mu muli, nu mube na bubobelelo bueinyu bueinyu.