Malako 5 - Nouveau Testament en Kilega

Yesu Ekutikia Basumbu ba Nsese mu Muntu Wabezaga ku Nsinda.

¹ Nu babasile ku lisilia lia kiziba, ku kisi kia Gelasa.

² Nu gatukile mu buato, kazanga kongo akulumeine na muntu watu­kaga ku nsinda, abezaga na musumbu wa nsese,

³ nuwe abezaga akuikala ku nsinda; nu takuabezaga muntu wavuamaga kumukanda na makoki;

⁴ kubuno akandagua mambizi meingi na bilunga nu makoki, nu asesaga mamo makoki, nu kukalikia bibio bilunga: nu takuabezaga muntu wavuamaga kumubotia.

⁵ Nu bindi binsania, musi nu kindi, eikalaga ku nsinda nu ku miduko, alalukaga nu eisumitaga na makozi.

⁶ Nu gamonine ku Yesu bulazi, eitumine lubilo nu amukumbamine;

⁷ nu alalukile neiyuki inene, atendile bune, Nili nobe buni, Yesu, Muana wa Kalaga uli muigulu? Nku­kulumbizia ku Kalaga buno, ntumbabazie.

⁸ Kubuno atendile musumbu wa nsese bune, Tuka mu muntu wono uwe musumbu wa nsese,

⁹ nu amubuzizie bune, Izina liobe? Nuwe amutendile bune, Izina liane. Legioni; buisulilua buno, tuli beingi.

¹⁰ Nu amusegile bubibu buno ntabatikie mu kisi kikino.

¹¹ Nu buigi na kuko ku muiduko, kuabezaga muimba muingi wa ngulube, waliaga.

¹² Nu bamusegile buno tusinge mu zezo ngulube, tuiyingilile muzo.

¹³ Nu abakasile buangato. Nu basumbu ba nsese batukile, nu beingide mu zezo ngulube: nu muimba wongo unsania wakumbile mu mpembue nu wizisile mu kiziba, zabezaga zakuka tununu tubili; nu zakule mu kiziba.

¹⁴ Nu balangi bazo batinine, nu basambeide musagu mu muino, nu mu masoa. Nu bantu bendile kulola bua­beide kuko.

¹⁵ Nu gababasile ku Yesu, nu bamonine ku wozo wabezaga na basumbu eikile, nu ese azuala nsulu nu eli na menge, wozo wabezaga na basumbu: nu bakule boba.

¹⁶ Nu babo bamonaga basambeide bubo buabeide ku wozo wabezaga na basu­mbu, nu musagu wa buabeide ngulube.

¹⁷ Nu balingile kumusega buno, atuke mu miaga zabo.

¹⁸ Nu abezaga eseingila mu buato, wozo muntu wabezaga na basumbu amusegile buno ikale nage.

¹⁹ Tondo ntamuzigide, umpanga amutendile tugu bune, Enda ku numba zobe ku beida bobe, nu kubasambalila bitondo bibino binene biakukitide Mukota, nu buakukuilide kiombo.

²⁰ Nu endile, nu alingile kusambala ku Dekapoli bitondo bibino biamukitide Yesu: nu bantu bansania bangamine.

Yesu Ekonia Mukikulu Wabezaga na Lusambo lua Mikila Miaka Ikumi nu Ibili. Nu Ekonia Muana wa Yailo Wabezaga Musambi.

²¹ Nu gasokile Yesu lingo ku lisilia mu bubo buato, musanganano munene wamukundamanine; nuwe abezaga mu ntungo mua kiziba.

²² Nu umozi wa ku babo bakota ba mu numba za musanganano, izina liage Yailo, amuvuilide; nu gamumonineko, amukomene mazu,

²³ nu amusegile nunse bune, Muana wane wa mukazi ese buigi na kukua: nkukusega, buno uvue kumubika maboko gantata gage buno, one, nu alame.

²⁴ Nu endile nage; nu musanganano munene wamuyangile, bamulimbanizie.

²⁵ Nu mukikulu umozi, wabezaga na lusambo lua mikila miaka ikumi neibili,

²⁶ nu kubabazibua bubibu ku basakizi beingi, nu agabuide bikulo binsania biabezaga nabio, nu ntonine nunse, umpanga lusambo luage luitide nunse,

²⁷ nu gongule ku musagu wa Yesu, abasile kumbusa kuage mu musanganano, nu eitubizie ku nsulu zage.

²⁸ Kubuno atendile bune, Ndi neitubia ku nsulu zage tugu, nti nonibua.

²⁹ Nu kazanga kongo kanua balongo ka mikila kakamine; nuwe amenyine mu mubili wage buno ona lusambo luluno.

³⁰ Nu kazanga kongo Yesu, amenyine buno, magala makokoka kumo, nu akebetukile mu musanganano, nu atendile bune, Nazi weitubia ku nsulu zane?

³¹ Nu beigisibua bage bamutendile bune, Ntukumona ku musanganano wono waku­limbania, nu ukubuzia bune, Nazi wetubia kundi?

³² Nu alolile ndenge insania buno amone ku wozo wamukita bubo.

³³ Tondo wozo mukikulu akule boba nu agilimine, nu amenyine buabeide, avule nu amukumbamine, nu amusambalide bulili bunsania.

³⁴ Nu amubuide bune, Mukinga wane, bukatizio buobe buakonia; enda mu bubobelelo, nu ntube na lusambo lulo lingo.

³⁵ Nu gatendaga bubuno, nu kua wozo muangati wa numba za musanganano kuatukile bantu, batendile bune, Mukinga wobe alekana kalazi; kikizi lingo kiukukutizia Musozi?

³⁶ Tondo Yesu gongule kukutendua bubo, atendile muangati wa numba za musanga­nano bune, Ntunakua boba, katizia tugu.

³⁷ Nu ntazigile muntu umozi kumuyanga, tugu Petelo, nu Yakobo, nu Yoana wozo muto wa Yakobo.

³⁸ Nu beikile mu numba za wono muangati wa musa­nganano; ongule ku kazege keingi, nu bantu balilaga nsanda nnene.

³⁹ Nu geingide, abatendile bune, Kubuni mukukita kazege, nu kulila? wozo mukinga ntalekana, tondo eiyombeka tugu.

⁴⁰ Nu bamusekile nunse, nuwe gabasizie musanganano kumbuga, atolile isi wa muana nu nina, nu babo babezaga nage, beingide mumo mua­bezaga muana.

⁴¹ Nu akatile wozo mukinga geikoko, amutendile bune, Talita kumi; buisulilua bua bubo, Mukinga, nkukubula bune, Zanzuka.

⁴² Nu kazanga kongo wozo mukinga azanzukile nu endile; kubuno abezaga ese miaka ikumi nu ibili. Nu kazanga kongo bangamine nunse.

⁴³ Nu abakakizizie buno muntu nta­menye wono musagu: nu ababuide bune, Mukasazi idia.