Malako 4 - Nouveau Testament en Kilega

Misumo za Mbuto.

¹ Nu alingile kuigisia lingo buigi na kiziba. Nu musanganano munene wakundameine nunse buigi nage, ku bubo eingide mu buato buabezaga mu kiziba, nu musanganano unsania wabezaga wikala gansi ku mutili.

² Nu abeigisizie bitondo bingi mu misumo, nu atendile mu meigisia mage bune,

³ Unguililazi: muyiki wa mbuto endaga ayika mbuto:

⁴ nu gaziyikaga mbuto imozi zakolo­kile mu ntungo mua nzila, nu tuzoni tuazibobueide.

⁵ Nu ingo zakolokile gantata ga luanda, takuabezaga bisogo bingi; nu kazanga kongo zasile, kubuno bisogo tabiabezaga bingi:

⁶ nu gasanukile musi, zagulumine; kubuno tazabezaga na mizi, zomine.

⁷ Nu ingo zakolokile mu mikele, nu mikele zasile, nu zazilimbanizie nu tazako­lamine biguma.

⁸ Nu ingo zakolokile ga bisogo bisoga, nu zako­lamine biguma bingi, zakulile nu zanagile; nu zakolamine makumi masatu, ingo makumi mutuba, ingo lukama,

⁹ Nu atendile bune, Wozo uli na matuzi makunguilila, nti unguilila.

Yesu Ekuisulila Beigisibua bage Musumo.

¹⁰ Nu gabezaga wenyene, bantu bamutimbikanizie nu babo ikumi nu babili bamubuzizie buisulilua bua musumo.

¹¹ Nu ababuide bune, Kumuli ukuakasilue kakungu ka bukota bua Kalaga: tondo ku babano batakatizia bunatendua ku misumo:

¹² buno banamona, tondo tabanatitika; nu banongua tondo tabanamenyi­nina, buno banakivua kugaluka nu kusigililua.

¹³ Nu abatendile bune, Ndi tamuizi musumo wono? nti mukamenya misumo insania buni?

¹⁴ Muyiki ekuyika idagi.

¹⁵ Nu babano ubabo beli muntungo mua nzila, gakusambalua idagi; nu ndi basila kungua, kazanga kongo Satana nti avua kutikia lilio idagi libasambalilagua.

¹⁶ Nu babo ubayikilue ga luanda, nu ndi bongua kuidagi lilio, nti balisekela kazanga kongo na mbogimbogi;

¹⁷ nu tabeli na mizi munda muabo, bakusigala bindi bimozi; nu gavue kabebe aba lubabazio ku kabamba keidagi, kazanga kongo ekuikuka.

¹⁸ Nu babo ubabo bayikilue mu mikele; ubabo bakungua lilio idagi,

¹⁹ nu milondo za kisi, nu buengelezi bua bikulo, nu ntundo za bingo bitondo bingila; nu nti bialimbania idagi, nu nti taliakolama lingo biguma.

²⁰ Nu babo bayikilue mu bisogo bisoga; ubabano bongule kuidagi lilio, nu kulitabizia, nu kukolama biguma, umozi makumi masatu, ungo makumi mutuba, nu ungo lukama.

Musumo wa Kiengi nu Kapilo. Kasuku nu Luzi.

²¹ Nu abatendile bune, Ndi muntu anavua na kasuku nu kukabika kunsi kua luzi, aba kunsi kua mugu, ndi takukabika ga kibikilo kiako?

²² Kubuno takuli kiabisilue, kitakabisulua; aba takuli kiatendagua mu kakungu kitakongubuako.

²³ Ndi muntu eli na matuzi makuinguilila, nti unguilila.

²⁴ Nu abatendile bune, Idangazi na kikio kimukungua kukio: kubuno, kulindika kukuno kumukulindika, ukuko kumukalindikua, lingo ukimukatalikilua.

²⁵ Kubuno wozo uli na kena, akakasua; nu uteli nako, nti akatikibua kako keli nako.

²⁶ Nu abatendile bune, Bukota bua Kalaga bualingimana na muntu wasandide mbuto zage gansi;

²⁷ nu geiyombekile, nu gayukile, mu musi nu mu kindi, mbuto zabalukile nu zasile, nu zakulile lukita lutamenyaga nyenezo.

²⁸ Kubuno bisogo bia kisi bikukolama biguma bibienyene; kulinga nsamba, kusila mombo, nu mu mombo migili.

²⁹ Tondo geidile biguma, kazanga kongo abisesile na bupanga, kubuno busi bua kukola buakuka.

Bukota bua Kalaga Bualingimana na Mbuto za Bunyonyo,

³⁰ Nu atendile bune, Bukota bua Kalaga tubulingimanie na kikizi? aba tubulingimanie na musumo mukizi?

³¹ Bualingimana na kambuto ka bunyonyo, kayikilue mu bisogo, keli kakeke ku mbuto insania zili mu kisi,

³² kungua zasila kuyikua, nu kuasa, nti zaba nnene kutinga insania; nu nti zabika ntabi nnene; nu tuzoni tua mpelela tunavuama kumunua mu kilimelime kiago.

³³ Nu atendaga idagi liage ku misumo mingi bubanalimenyina;

³⁴ nu ntanabatendile buatatendile ku musumo: tondo mu lumbisombiso eigisagia beigisibua bage bitondo binsania bobenyene.

Kisoa Kinene.

³⁵ Nu mu busi bubo muigolo, abatendile bune, Tusokazi ku lisilia.

³⁶ Nu basigile musanganano, nu bendile nage anga bua­bezaga mu buato. Nu mango mato mabezaga buigi nage.

³⁷ Nu kuabeide kisoa kinene, nu bimpumi bidibuide mu buato, nu buato buizede na mazi.

³⁸ Nuwe abezaga ku kansinsi ka buato, eiyo­mbeka ku tulo ga muigo: nu bamuyukizie, nu bamutendile bune, Musozi, gatunakua ndi bunakubela bubi?

³⁹ Nu ayukile, nu azugide kisoa, nu atendile ku kiziba bune, Bota, nu kisoa kiasilile, nu kuolile nunse.

⁴⁰ Nu abatendile bune, Kubuni mukukua boba? Ndi tamuba na bukatizio?

⁴¹ Nu bakule boba nunse, nu bate­ndeine bune, Muntu mukizi wono, aba kisoa nu kiziba nti biku­muanza?