Malako 3 - Nouveau Testament en Kilega

Yesu Ekonia Muntu Wabezaga na Kuboko Kuoma Busi Bua Sabato.

¹ Nu eingide lingo mu numba za musanganano; nu muabezaga muntu woma kuboko.

² Nu bamulolaga buno, ndi amonie busi bua sabato; buno bamusongele.

³ Nu amutendile wozo muntu woma kuboko bune, Zanzuka.

⁴ Nu ababuzizie bune, Ndi buakulungana ku mulembe kukita busoga busi bua sabato aba kukita bubi? kuita, aba konia? Tondo beikede kibibi.

⁵ Nu abakakile meiso, nu abeide na kabebe ku kabamba ka mitima zabo mibibu nu atendile wozo muntu bune, Lambia kuboko kuobe, nu akulambizie; nu kuboko kuage konine.

⁶ Kazanga kongo baFalese nu baHelode batukile bamukalide luango bubanamuita.

Yesu Ekonia Bantu ba Nsambo za Nkita na Nkita.

⁷ Nu Yesu endile na beigisibua bage ku kiziba: nu musanganano munene wamuyangile kutuka ku Galela; nu ku Yudaya,

⁸ nu ku Yelusalema, nu ku Edoma, nu ku lisilia lia Yadene, nu buigi na Tula nu Sidona, musanganano munene, gabongule ku misagu za buakitaga bamuendeide.

⁹ Nu asambalide beigisibua bage buno kulumiziazi buato bukeke, kubuno musanganano gukuvua kumu­limbania:

¹⁰ kubuno onezie bantu beingi; babo babezaga na nsambo mbibu, bamukakanine buno beitubie kueli.

¹¹ Nu ba­sumbu ba nsese gabamumonineko bamuguilide, nu balalukile, batendile bune, Uwe umuana wa Kalaga.

¹² Nu abakakizizie nunse buno tabamusaganizie buno uwamonia.

Yesu Ekusombola Beigisibua Bage.

¹³ Nu abakamine ku muiduko, nu amanine babo batundaga; nu bamukundile.

¹⁴ Nu asombueide ikumi na babili buno babe nage, nu abasinge buno basambale,

¹⁵ nu babe na buangato bua kutikia basumbu:

¹⁶ nu akasile Simona izina buno, U Petelo;

¹⁷ nu Yakobo muana wa Zebedayo, nu Yoana muto wa Yakobo; nu abakasile izina Bonagete, buisulilua bualio buli bana ba mukulumino:

¹⁸ nu Andele, nu Filipo, nu Batolomayo, nu Matayo, nu Toma, nu Yakobo muana wa Alufayo, nu Tadayo, nu Simona mu Kananayo,

¹⁹ nu Yudasa Isakaliote, u wozo wamugabuide. Nu eingide mu numba.

Buagi Butanasigililua.

²⁰ Nu musanganano wakundamene lingo, nu tabamenyine bubalia kampampa.

²¹ Nu gongule beida bage ku musagu wozo bendile kumutola, kubuno babatendile bune, Eseli muluba.

²² Nu basanzi batukile ku Yelusalema batendile bune, Eli na Belezebula, mukota wa basumbu, nu mu magala mage ekutikia basumbu.

²³ Nu abamanine, nu abeisile misumo bune, Ndi Satana anavuama kutikia Satana?

²⁴ Nu ndi bukota buneidekanukia bubuenyene, kasi bunakua.

²⁵ Nu ndi numba zalekanukibua tazinasimba.

²⁶ Nu ndi Satana ekuitikia, kasi asila kulekanuka, nu ntanavuama lingo kuemana, kasi nti asila.

²⁷ Tondo muntu ntanavuama kuingila mu numba za uli na magala, nu kubigia bikulo biage, tondo alinge tanga kukanda wozo uli na magala; nu kusila nti anavuama kubigia numba zage.

²⁸ Lebelebe nkumubula, misako za buagi insania za bantu zikasigililua nu bilingano bibakulingana;

²⁹ tondo wozo walinga Muuza Wasililila ntakasigililua nunse, tondo eli na katati ka buagi butanakuzinda:

³⁰ kubuno batendile bune, Eli na musumbu wa nsese.

Bantu Bakasuaga ku Kabamba ka Yesu.

³¹ Nu nina nu bato bage; bemanine kumbuga, nu basingile muntu kumumana.

³² Nu musanganano wamutimbikanizie; nu bamutendile bune, Nyoko nu bato bobe beli kumbuga bekukulonda.

³³ Nu abakuide bune, Nazi mane nu banazi bato bane?

³⁴ Nu alolile babo babezaga bamutimbikania, nu atendile bune, Lolazi, mane nu bato bane!

³⁵ Kubuno unsania ukukita kusombola kua Kalaga, we nti muto wane, nu mubitu wane, nu mane.