Malako 16 - Nouveau Testament en Kilega

Kuyuka kua Yesu Bakuzi.

¹ Nu gatingile busi bua sabato, Malia Magadala, nu Malia, nina wa Yakobo, nu Salome, bakunzile bulago, buno bende kumubongiabo,

² Nu kumukelo nunse mu busi butangi buizinga, bavule ku nsinda gasanukile kisongo kia busi.

³ Nu batendeine buabo buabo bune, Nazi watutikizie ikozi ku muingilo wa nsinda?

⁴ Nu gabalolile, bamonine ikozi liasila kutukibua: nulio liabezaga inene nunse.

⁵ Nu beingide mu nsinda, bamonine ku musikila abezaga ikala ku lulenge lua kuidume, abezaga avuala nsulu zenga; nu bangamine.

⁶ Nuwe abatendile bune, Tamunangama; muku­londa Yesu muNazaleta, watakilue, ayuka: nteli gano: lolazi, kiziki kibamubikagile.

⁷ Tondo endazi, tendazi beigisibua bage nu Petelo buno, alinga kubatanga ku Galela; kuko ukubamumoneko, anga buabatendile.

⁸ Babasile kumbuga beitumine lubilo kutuka ku nsinda; kubuno bagilimine nu bangamine: nu tabatendile muntu wampa; kubuno bakuaga boba.

⁹ Gayukile Yesu mu nindunindu busi butangi buizinga, alingile kumonekako na Malia Magadala, wozo watikagia basumbu mutuba kamo.

¹⁰ Nu wozo endile nu asambalide babo babezaga nage; gababezaga bekulila bubibu.

¹¹ Nu gongule babano buno, eli na kalamo, nu amumonako, tabakatizizie.

¹² Nu kusila kua bubo amonekileko na bango bantu babili na kingo kilungi, nu babezaga bakuenda kuisoa.

¹³ Nu babo bendile, nu basambalide bango; tondo tabakatizizie.

¹⁴ Nu kusila kua bubo amonekileko na babo ikumi nomozi gabaliaga; nu abazugide kubuno ku kutakatizia kuabo nu ku bubibu bua mitima zabo, kubuno tababakatizizie babo bamumonineko gayukaga.

¹⁵ Nu abatendile bune, Endazi mu kisi kinsania, musambale musagu musoga ku kibumbua na kibumbua.

¹⁶ Wozo wakatizia nu kubatizibua nti onibua; tondo utakatizia nti asungibua.

¹⁷ Nu tulolesio tutuno tuayangane na bakukatizia; kuizina liane batikie basumbu; batende kuingo mitendezi;

¹⁸ nu bakakata ku nzoka, nu ndi bakanua buga­nga, tabukabeita nunse; nu bakabika maboko gantata ga basambi, nu bakona.

Yesu Esenda M uigulu.

¹⁹ Umpanga, Mukota Yesu, kusila kua kutenda nabo, asekeidue muigulu, ekeide ku kuboko kua seidume kua Kalaga.

²⁰ Nu babo bendile, nu basambede kunsania, nu Mukota akitile nabo, nu kuliko­komezia idagi lilio na tulolesio tuayangeine nalio. Amena.