Malako 15 - Nouveau Testament en Kilega

Yesu Alusibua ku Pilato.

¹ Nu kazanga kongo mu nindunindu nunse basankoga banene nu bakulu nu basanzi, nu bakazi ba luango bakitile luango, nu bakandile Yesu nu bendile nage ku Pilato.

² Nu Pilato amu­buzizie bune, Ndi uwe U Mukota wa baYuda? Nu amuakuide bune, Bubo buwatenda.

³ Nu basankoga banene bamubingile mu bitondo bingi.

⁴ Nu Pilato amubuzizie lingo bune, Ntuakule? unguilila, bitondo bingi bibakukubinga.

⁵ Tondo Yesu ntakuide lingo; nu bubo Pilato angamine.

Yesu aba Balaba.

⁶ Na busi na busi buakitaga kisagulo abakandulilaga mukandua umozi, ubatunda.

⁷ Nu kuabezaga mukandua umozi wamanagua buno, Balaba, akandilue na bantu babezaga na misona, nu beitanaga mu misona.

⁸ Nu musanganano, balingile kumusega buno abaki­tile anga buabakitilaga.

⁹ Nu Pilato abakuide bune, Buni bumuku­tunda, Ndi nimukandulile Mukota wa baYuda?

¹⁰ Kubuno amenyinine buno basankoga banene bamugabuide ku lugi.

¹¹ Tondo basankoga banene balubikanizie musanganano, balumbe bakandula Balaba.

¹² Pilato akuide lingo bune, Mukutunda nikite wono buni umukumana Mukota wa baYuda?

¹³ Nu balalukile lingo bune, Atakue.

¹⁴ Nu Pilato abatendile bune, Bubi bukizi buakitile? Nu balalukile lingo bubibu bune, Atakue.

¹⁵ Nu Pilato, atundile kubogiabogia musanganano, abakandulile Balaba; nu gasilile kususula Yesu, amugabuide buno atakue.

Yesu Ekuvualikibua Nhumbu za Mikele Kuitoe Besenda Kumutaka.

¹⁶ Nu bakoloboyo bendile nage ga mulungu ku Palatoria; nu kibombo kinsania kiamukonganine.

¹⁷ Nu bamuvualikizie nsulu zakisimana, nu balukile nkumbu za bukota za mikele, bamuvua­Iikiziezo;

¹⁸ nu balingile kumusambizia, Samba, Mukota wa baYuda!

¹⁹ Nu bamususuide kuitoe na tususula, nu bamusuilide matazi, nu bamukomene mazu, nu bamukumbamine.

²⁰ Nu gabasilile kumuililika, bamutikizie nsulu zakisimana, nu bamuvua­likizie nsulu zage. Nu bendile nage buno bamutake.

²¹ Nu bekizie muntu umozi watingaga, atukaga ku masoa, izina iiage, Simona wa mu Kulene, isi wa Alesandelo nu Lufu, buno eke muti wage wa magu.

²² Nu bendile nage ku kiziki kiamanagua Gologota, buisulilua buakio buno, Kiziki kia lukungu.

²³ Nu bamunusizie maku masambikua na kansembia buno anue: tondo ntamanune.

Bekutaka Yesu ku Muti wa Magu.

²⁴ Nu bamutakile ku muti wa magu, nu babeganizie nsulu zage, bazesile mbale, buno na muntu na muntu notola kikizi,

²⁵ Nu gabeide buse nkungu isatu, nu bamutakile ku muti wa magu.

²⁶ Nu kuabezaga masanzo masanzilue buno, MUKOTA WA BAYUDA.

²⁷ Nu bamutakile na beibi babili; umozi ku kuboko kuage kua seidume, nu ungo ku kuboko kuage kua seikazi.

²⁸ Buno masanzo mazindilile buno, aganzilue na bagi.

²⁹ Nu bansania batingaga bamulingaga, batengezietengezie matoe mabo, nu batendile bune, E! wasambulaga numba za kukumbamina, nu ku bindi bisatu nti wazo­baka,

³⁰ iyonie lino, nu igezie ku muti wa magu.

³¹ Nu bubo basankoga banene bamuililikile buabo buabo nu basanzi, nu bate­ndile bune, Onezie bango; tondo ntanavuama kuiyonia wenyene.

³² Klisto, Mukota wa baIsalele; kasi eigezie ku muti wa magu, buno tumone nu tukatizie. Nu babo batakilue nage nubo bamu­lingile.

³³ Nu gabeide nkungu mutuba zakuka kuabezaga kapilo ku kisi kinsania aba nu ku nkungu mubula.

³⁴ Nu ku nkungu mubula Yesu alalukile neiyuki inene, Eloi, Eloi, lama sabachthani? buisulilua bua bubo, Kalaga wane, Kalaga wane, kubuni kuwande­kelela?

³⁵ Nu bango babezaga bemana buigi, gabongule ku bubo, batendile bune, Akumana Eliya.

³⁶ Nu umozi eitumine lubilo, akatile luata, aluiyazizie na maku mabezaga makali, nu abiki­lemo ku musumbo, nu amunusiziemo, nu atendile bune, Musi­gazi tanga; tulole ndi Eliya avue kumukumbia.

³⁷ Nu Yesu alilile neiyuki inene, nu eidekanizie.

³⁸ Nu nsulu za numba za kukumbamina zatikile bibe bibili, kutukila kuigulu nu gansi.

³⁹ Nu wozo mukota wa bakoloboyo, wabezaga wemana buigi nage, gamonine eidekania, atendile bune, Lebelebe muntu wono abezaga Muana wa Kalaga.

⁴⁰ Nu kuabezaga bakikulu balolaga bulazi; kubeli kuabezaga Malia Magadala, nu Malia, nina wa Yakobo muto wa Yose, nu Salome;

⁴¹ ubabo, bamuyangile nu kumukambila ku Galela, nu bango beingi bendile gamozi nabo ku Yelusalema.

Bese Babika Yesu ku Nsinda.

⁴² Nu gabuabeide buse muigolo, bubuno buabezaga busi bua kulongeka, kuabezaga kuse kuasigala kindi kimozi na ku busi bua sabato.

⁴³ Yosefu wa Alimataya muntu munene wa lusu lua nango, wono walindilaga bukota bua Kalaga avule; nu endile na ngini ku Pilato; nu asegile kitumba kia Yesu.

⁴⁴ Nu Pilato anga­mine kubuno esakua; amanine wozo mukota wa bakoloboyo nu amubuzizie bune, Ndi akua kalazi.

⁴⁵ Nu gasambalidue na wozo mukota wa bakoloboyo, akasile Yosefu kikio kitumba.

⁴⁶ Nu akunzile nsulu zezo zabota, akibikile mu nsinda zabezaga muikozi; nu akukide ikozi inene ku muingilo wa nsinda.

⁴⁷ Nu Malia Magadala, nu Malia, nina wa Yose balolile kuko kubamubika.