Malako 12 - Nouveau Testament en Kilega

Musumo wa Nyene Isoa Wasegaga Biguma ku Bakambi Bage ba Biguma.

¹ Nu alingile kubeisa misumo. Muntu umozi ayikile isoa lia mizigi za biguma, nu atimbizie mukolo, nu ombile itengu lia kuyika biguma bia mizigi, nu akitile numba kuigulu za mulangi, nu endile mu kingo kisi.

² Nu mu nkungu za kukola asingile mukobe ku bakambi buno, embe anamona ku biguma ku bakambi beisoa.

³ Nu bamukatile, nu bamususuide, nu bamusubizie nteli na kampa.

⁴ Nu asingile lingo ungo mukobe; nu bamusumitile kuitoe nu bamubabazizie nunse.

⁵ Nu asingile ungo; nu bamuitile: nu bango beingi babalibuide nu bango babeitile.

⁶ Tondo abezaga na ungo, umozi tugu, muana wage watunda: nu amusingile kubeli, nu atendile bune, Embe bananza muana wane.

⁷ Tondo babo bakambi batendile bune, Wozo umupieni wage, vuazi, tumuitazi, nu tupiene bupieni buage.

⁸ Nu bamukatile, nu bamuitile, nu bamuisile ku lutikilo luisoa.

⁹ Nu buni bukakita wozo mukota weisoa lia biguma? akavua nu akabigia bakambi, nu akakasa bango lilio isoa.

¹⁰ Ndi tamuasomine ku masanzo mamo: Ikozi liasombagua na bobaki, Uliabede ikozi inene lia kapindapinda;

¹¹ Bubo buatukile ku Mukota, Nubo bukutuganiagania?

¹² Nu balondile bubamukata; tondo bakule musanganano boba; kubuno bamenyine wozo musumo wabeisaga: bamusigile, nu bendile.

Yesu Ekutenda Buidigo.

¹³ Nu bamusingide baFalese bamozi nu baHelode, bavule bubanamukandika bitondo.

¹⁴ Nu gabasilile, bamutendile bune, Musozi, tuizi buno uli bulili, nu ntukuikutia ku kitondo kia muntu umozi; kubuno ntukulola ku kilungi kia bantu, tondo ukuigisia meigisia ma Kalaga mu bulili: Ndi buakulungana ku mulembe kuliga idigo ku Kaisa, aba kutaliga?

¹⁵ Tumukase, aba tatumu­kase? Tondo amenyine kuengelela kuabo, abatendile bune, kubuni kumukundindikila? Vuazi na falanga zeidigo, buno nizimoneko.

¹⁶ Nu bamuvuilide nazo, nu ababuide bune, Kikino kisusania nu mamano masanzo bili bia nazi? Nu bamutendile bune, Bili bia Kaisa.

¹⁷ Nu Yesu abatendile bune, Kasazi Kaisa bia Kaisa, nu ku Kalaga bia Kalaga. Nu bangamine nage nunse.

Yesu Ekutenda Basodoke Kuyuka kua Bantu ku Bakuzi.

¹⁸ Nu Basodoke bamuvuilide, babo bakutendaga buno, takuli iyukilo; bamubuzizie bune,

¹⁹ Musozi, Mose atusanzide buno, Ndi iselenzi wa muntu akua, nu kusiga mukikulu, nu ndi ntasiga muana, nti muto wage ayana wozo mukikulu, nu abutile iselenzi bana.

²⁰ Mutuli muabezaga mutuba kamo bandemozi: nu mutangi asongile mukikulu nu akule ntasigile bana;

²¹ nu wababili amuyanine, nu akule, nuwe ntasigile bana; nu wozo wa basatu bubo nuwe:

²² nu babo bansania mutuba kamo, tabasigile bana. Nu bubo, nuwe mukikulu akule.

²³ Muiyukilo wozo mukikulu akaba wa nazi? kubuno babo mutuba kamo bamusongile.

²⁴ Yesu abatendile bune, Ndi tamukuibaga bubuno, kubuno tamuizi ma­sanzo, aba magala ma Kalaga.

²⁵ Kubuno gabakayuka ku bakuzi, tabakasonga, aba tabakasongua; tondo babe anga migenzi za mui­gulu.

²⁶ Tondo ku kitondo kia bakuzi buno bakayuka; ndi tamu­somaga mu mukanda wa Mose ku kitondo kia kiziki kia guluminaga keiya mu muti, buamutendile Kalaga bune, Nne nili Kalaga wa Abalahama, nu Kalaga wa Isaka, nu Kalaga wa Yakobo?

²⁷ We nteli Kalaga wa bakuzi, tondo wa balami: bubo mukuibaga nunse.

Yesu Ehutenda bua Mulembe.

²⁸ Nu umozi wa ku basanzi abasile, nu ongule kubakutenda, nu amenyine buno abakula busoga, amubuzizie bune, Kukakizia kukizi kutangi?

²⁹ Yesu atendile bune, Kutangi ukukuno, Unguilila Isalele, wozo Mukota, Kalaga weitu, eli Mukota umozi tugu:

³⁰ nu tunda Mukota, Kalaga wobe na mutima wobe unsania, nu mu kalamo kobe kansania, nu mu menge mobe mansania, nu na magala mobe mansania.

³¹ Nu kuibili kuli bubo, Tunda munyobe anga buwi­tunda uwenyene. Takuli kungo kukakizia kuatinga mamo.

³² Nu musanzi amutendile bune, Bulili, Musozi, watenda buligo, buno Kalaga eli umozi tugu aba takuli ungo, tugu we:

³³ nu nti wamu­tunda mu mutima wobe unsania, nu mu menge mobe mansania, nu na magala mobe mansania, nu kutunda munyobe anga buwitunda uwenyene buatinga kayulo kakugisibua nu bisansa binsania.

³⁴ Nu gamonine Yesu buno atendile na menge, amutendile, Uwe ntuli bulazi na bukota bua Kalaga. Nu takuli muntu wagelekile kumu­buzia lingo.

Yesu Ekubuzia baFalese Bubekukengela ku Klisto.

³⁵ Nu Yesu akuide geigisagia mu numba za kukumbamina bune, Kubuni basanzi bekutenda buno Klisto eli muana wa Davidi?

³⁶ Kubuno Davidi wenyene atendile mu magala ma Muuza Wasililila bune, Mukota atendile ku Mukota wane, Ikala ku kuboko kuane kua seidume, Aba nu ganangate beiti bobe.

³⁷ Davidi wenyene amumanine Mukota; nu buni bueseli muana wage? Nu bantu beingi ba wozo musanganano munene bamungui­lide na mbogimbogi.

³⁸ Nu mu meigisia mage atendile bune, Idangazi na basanzi, nu babo bekuelama kuvuala nsulu ndazi, nu kusambizibua muisoko,

³⁹ nu kuikala ga bisumbi bitangi mu numba za musanganano, mu biziki bitangi mu bisagulo,

⁴⁰ babo bakunyaga numba za misigala, nu ku buengelezi bakusega isego nkungu ndazi; babo bakasungibua lusungio lunene nunse.

Masengi ma Mukikulu Musigala.

⁴¹ Nu eikeide buigi na sanduku za mitebe, nu alolile musanga­nano bugukuisa falanga muzo; nu bagumi beingi beisile ningi.

⁴² Nu kuavule musigala muzambi, nuisile sengi ibili, anga likuta limozi.

⁴³ Nu amanine beigisibua bage, nu abatendile bune, Lebelebe nkumubula buno wono musigala abika ningi kutinga bansa­nia babika bikulo mu sanduku zeno:

⁴⁴ kubuno babikile bia mutali wabo; tondo we ku buzambi buage bunsania esile binsania biabezaga nabio, aba bikulo biage binsania.