Malako 1 - Nouveau Testament en Kilega

Musagu Musoga Wasanzilue na Malako. Yoana Mubatizia.

¹ Kulinga kua musagu musoga wa Yesu Klisto, Muana wa Kalaga.

² Anga buasanzilue ku mulengania Yesaya, bune, Unguililazi, nalinga kusinga mugenzi wane, Ukakunga nzila zo be;

³ Iyuki lia muntu likulaluka mu kalula buno; Kungazi nzila za Mukota, Isiazi matingilo mage.

⁴ Yoana avule, nu abatizizie mu kalula nu kusambala bubatizio bua kuiyania bualusizie isigililo lia misako za buagi.

⁵ Nu bantu bansania ba mu kisi kia Yudaya bamuendede nu bantu bansania ba ku Yelusalema; nu babatizizibue mu luzi lua Yadene, nu beigongile misako za buagi buabo.

⁶ Nu Yoana abezaga avuala nsulu za mioza za ngamia, nu abezaga na mukoma wa kikoba mu kibunda, nu aliaga nzige nu buki bua mu lubanda.

⁷ Nu abasambalilaga bune, Ukavua kumbusa kuane antinga, kubuno nsiatananina kuku­mbama nu kukandula mizigi za bisalapata biage.

⁸ Namubatizizie na mazi; tondo we amubatizie na Muuza Wasililila.

Yesu Ekubatizibua.

⁹ Nu busi bubo, Yesu atukile ku Nazaleta wa Galela, nu abatizi­zibue na Yoana mu Yadene.

¹⁰ Nu kazanga kongo gabede esatuka mu luzi, nu amonine igulu liakandulua, nu Muuza agelile anga nkulimba gantata gage:

¹¹ nu iyuki liatukile mu meigulu liatendile bune, Uwe uli Muana wane, Ngoli zane, nakomana nobe.

Satana Ekulindika Yesu.

¹² Nu kazanga kongo Muuza amusindikile mu kalula.

¹³ Nu abezaga mu kalula bindi makumi manazi nu alindikilue na Satana; nu abezaga ku nyama nkali; nu migenzi bamukitilaga.

Yesu Ekusambalila Bantu ba Galela Musagu wa Kalaga.

¹⁴ Kusila kua kukandua kua Yoana, Yesu endile ku Galela, kusambala musagu musoga wa Kalaga,

¹⁵ nu atendile bune, Nkungu zakuka, nu bukota bua Kalaga buse buigi; iyaniazi, nu katiziazi musagu musoga.

Yesu Ekumana Petelo nu Andele.

¹⁶ Nu atingile mu ntungo mua kiziba kia Galela, amonine ku Simona nu Andele muto wa Simona babezaga bekuisa tukila mu kiziba; kubuno babezaga bazubi.

¹⁷ Nu Yesu ababuide bune, Nyangazi, nu namubike buno mube bazubi ba bantu.

¹⁸ Kazanga kongo basigile tukila, nu bamuyangile.

¹⁹ Nu gabede esalombozia, amonine ku Yakobo muana wa Zebedayo, nu Yoana muto wage, nubo babezaga mu buato balandaga tukila tuabo.

²⁰ Nu kazanga kongo, abamanine: nu basigile isibo Zebedayo mu buato, na bakiti babo, nu bamuyangile.

Yesu Ekutikia Musumbu wa Nsese mu Muntu wa Kapenuma.

²¹ Nu bendile ku Kapenuma; nu kazanga kongo ku busi bua sabato, eingide mu numba za musanganano nu eigisizie.

²² Bangamine na meigisia mage: kubuno abegisizie anga uli na buangato, nu nteigisizie anga basanzi.

²³ Nu kazanga kongo kuabezaga muntu wabezaga na basumbu ba nsese mu musanganano wabo, alalukile neiyuki inene,

²⁴ atendile bune, Tuli nobe buni Yesu wa Nazaleta? ndi wavule buno utubigie? Nizi buno uli Wasililila wa Kalaga.

²⁵ Nu Yesu amuzugide, atendile bune, Ikala kibibi, nu tuka mu muntu wono.

²⁶ Nu wozo musumbu wa nsese amugusizie nu alilile neiyuki ibibu, nu atukile mu wozo muntu.

²⁷ Nu bansania bangamine nunse, nu babuzanizie bune, Buni bubo? mese mango meigisia! kubuno akukakizia basumbu ba nsese na buangato, nubo bekumuanza.

²⁸ Nu kazanga kongo lukumu luage luakukile mu kisi kinsania kia Galela.

Yesu Ekonia Ninabiala wa Petelo Isusila.

²⁹ Nu kazanga kongo, gabatukile mu numba za musanganano, beingide mu numba za Simona nu Andele, na Yakobo nu Yoana.

³⁰ Nu ninabiala wa Petelo abezaga neisusila; nu bamusambalide musagu wage:

³¹ nu endile kueli nu amukatile geikoko nu amue­manukizie, kazanga kongo isusila liasilile, nu abakitide.

Yesu Ekutikia Basumbu mu Bantu.

³² Nu muigolo, geidile busi, bamuvuilide na bantu bansania babezaga na nsambo, nu babezaga na basumbu.

³³ Nu bantu bansania ba mu muino bamukonganine ku luibi.

³⁴ Nuwe onezie bantu beingi babezaga na nsambo za nkita ningi, nu atikizie basumbu beingi; nu ntazigile basumbu batenda, kubuno babezaga bemuizi.

Yesu Ekusambala Kuingo Mino za Galela.

³⁵ Nu mu nindunindu, ku mukelo nunse, ayukile nu endile ku kalula, nu asegile kuko.

³⁶ Simona nu babo babezaga nage bamuyangile.

³⁷ Nubo gabamusangile bamubuide bune, Bantu bansania bakukulonda.

³⁸ Nu abatendile bune, Tuendazi kuingo mino zili buigi, buno nisambale kuko; kubuno bubo ubunavuilide.

³⁹ Nu eingide mu numba ningi za musanganano mu kisi kinsania kia Galela, abasambalilaga nu atikizie basumbu.

Yesu Ekonia Muiya Bibali.

⁴⁰ Nu muntu umozi muiya bibali amuvuilide, nu amukomene mazu, nu amusegile bune, Ndi watunda, unavuama kunengia.

⁴¹ Yesu amukuilide kiombo, alambizie kuboko kuage, nu eitubizie kueli, nu amubuide bune, Natunda; enga.

⁴² Nu kazanga kongo bibali biatukile kueli, nu engile.

⁴³ Nu amukakizizie bubibu, nu kazanga kongo amusingile kumbuga,

⁴⁴ nu amutendile bune, Unguilila, ntutende ungo muntu: tondo enda tugu widolesie ku sankoga, nu ukasane ku kabamba ka kuengibua kuobe anga buakaki­zizie Mose, kuba bulongeki kubeli.

⁴⁵ Tondo we atukile, nu alingile kusambala bubibu, nu kukukia lilio idagi kunsania, nu Yesu ntavua­mine kubasa lingo mu mino zezo na mugulu, tondo abezaga ku kiziki kia kalula: nu bantu bamuvuilide nu batukaga ku biziki binsania.