Luka 6 - Nouveau Testament en Kilega

Yesu Ekutenda bua Busi bua Sabato.

¹ Mu busi bua sabato, atingile mu masoa ma mabela; nu beigisi­bua bage bakalile mabela, nu kumalia, kumapikisa mu maboko.

² Tondo baFalese bamozi bababuide bune, Kubuni kumukukita butakulungana ku mulembe busi bua sabato?

³ Nu Yesu abakuide bune, Ndi tamuasomine buakitile Davidi, gabezaga akukua na nzala, we, nu bango babezaga nage;

⁴ eingide mu numba za Kalaga, nu atolile kampampa kako ka kalolesio, akatolile nu akakasile banyage, kako katakulungana ku mulembe kulibua na beteli basankoga.

⁵ Nu abatendile bune, Muana wa muntu eli mukota wa busi bua sabato.

Yesu Ekonia Muntu Wabezaga Wakaka Kuboko Busi bua Sabato.

⁶ Nu gabeide bungo busi bua sabato, eingide mu numba za musanganano nu eigisizie: nu kuabezaga muntu umozi woma kuboko kua seidume.

⁷ Nu basanzi nu baFalese bamulolile buno, ndi onie bubo busi bua sabato; buno embe banamusongela.

⁸ Tondo amenyine makengelo mabo; nu abuide wozo muntu wabezaga woma kuboko bune, Zanzuka, nu wemane munkatini muabo. Nu azanzukile nu emanine kima.

⁹ Nu Yesu abatendile bune, Nkumubuzia buno ndi buakulungana ku mulembe kukita busoga, aba kukita bubi mu busi bua sabato? konia muntu, aba kumubigia?

¹⁰ Nu akakile bansania meiso, nu abuide wozo muntu bune, Lambia kuboko kuobe, nu akulambizie, nu kuabeide kugimagima anga kokungo.

¹¹ Nubo bongilue nunse; batendeine buabo buabo buno, buni butukita Yesu.

Yesu Ekusombola ku Beigisibua Bage Ikumi na Babili.

¹² Nu mu bindi bibio, endile kusega ku muiduko; akesizie ntende kindi kinsania ekusega Kalaga.

¹³ Nu gakeide busi, amanine beigisibua bage; nu asombueide ikumi nu babili gaba­samba, abenikile buno basingua:

¹⁴ Simona, einikilue izina buno, Petelo, nu muto wage Andele, nu Yakobo, nu Yoana, nu Filipo, nu Batolomayo,

¹⁵ nu Matayo, nu Toma, nu Yakobo muana wa Ala­fayo, nu Simona wamanagua Zelote,

¹⁶ nu Yudasa muana wa Yakobo, nu Yudasa Isakaliote, uwamugabuide;

¹⁷ nu gendile nabo, nu emanine nabo ga kiziki kia kibitabita, nu musanganano munene wa bantu bansania batukile ku Yudaya, nu ba ku Yelusa­lema, nu kuntungo za Tula nu Sidona, nu bavule kumunguilila, nu kuonibua ku nsambo zabo;

¹⁸ nu babo bakuaga na basumbu ba nsese bonezibue.

¹⁹ Nu musanganano unsania batundile kuitubia kueli; kubuno magala mabezaga meki mabasa mueli nu mabonezie bansania.

Kutenda kua Yesu ku Muiduko.

²⁰ Nu alambulide beigisibua bage meiso, nu atendile bune, Mbogimbogi kumuli inyue bazambi; kubuno bukota bua Kalaga buli bueinyu.

²¹ Mbogimbogi kumuli inyue bakukuana nzala kano kaluma: kubuno muaseke.

²² Mbogimbogi kumuli inyue bakalingua nu kusombua na bantu, nu mukalekanuka na mikunda­mano zabo, nu bakamuzugila, nu tabakamumona neipiko, ku ka­bamba ka Muana wa muntu.

²³ Bogazibogazi busi bubo, nu kutumatuma na mbogimbogi, kubuno lukalilo lueinyu lusoga luli lunene muigulu: kubuno beisibo basungizie lingo balengania.

²⁴ Tondo kabebe kumuli inyue bagumi! kubuno muasila kumona mutali weinyu.

²⁵ Kabebe kumuli, inyue bakuseka kano kaluma kubuno mukasulunana nu mukalila.

²⁶ Kabebe kumuli inyue, kungua mukuganunua na bantu bansania! kubuno bubo ubuakitile beisibo ku balengania ba buza.

²⁷ Tondo nkumubula inyue bekungua; Tundazi babo bamu­somba, nu kitazi busoga ku babo bekumusomba.

²⁸ Kitazi babo bekumusuilila mponga, nu segelazi babo bekumulinga.

²⁹ Nu wozo wakulibula lugizi kuitama mugalukizie lio lingo; nu wozo wakutikia ikoti lia gantata, nti wamukasa lia munda.

³⁰ Kasa na muntu na muntu ukukusega; nu wozo ukukunyaga biobe ntumu­buziebio lingo.

³¹ Nu anga bubo bumukutunda bantu kumukitila, ububo nuinyue bumubakitila.

³² Nu ndi mukubatunda baku­mutunda mutali mukizi umunamona? Kubuno bagi bekutunda babo bekubatunda.

³³ Nu ndi mukukita busoga ku babo baku­mukita busoga, mutali mukizi umunamona? Kubuno bagi beku­kita bubo nubo.

³⁴ Nu ndi inyue muambia bango nu kulemanina kumona kena kubeli mutali mukizi umukumona? Kubuno bagi bakuambania buabo buabo, buno basubizibue lingo.

³⁵ Tondo tundazi bamusomba, nu bakitilazi busoga nu kubambia, tamule­manine buno bamulige; nu mutali weinyu wabe munene, nu muabe bana ba Wozo Uli Muigulu; kubuno eli na kiombo ku bantu bata­kumusima nu babi.

³⁶ Mube na kiombo, anga buli Soinyue na kiombo.

³⁷ Tamusungie; buno munavua kusungibua; tamu­kande, buno munavua kukandua: sigililazi, nuinyue muasigililue:

³⁸ kasanazi, nuinyue muakasue; kilindiko kiyala, kiatutubizibua, kiatengezibue, kiakubukile, bantu bamukase ga bibelo bienyu. Kuko kumukulindika ukuko kumukalindikua.

³⁹ Nu abeisile musumo: Ndi kiuku kinavuama kusondelezia kingo kiuku? ndi bubeli babili tabanakoloka mu muzinga?

⁴⁰ Muigisibua ntatinga musozi wage: tondo na muigisibua na muigisi­bua wazindilizia nti akaba anga musozi wage.

⁴¹ Buni bukulola kikolokolo kili mu liso lia munyobe, nu ntukumona ku lubabu luli mu liso liobe?

⁴² Buni bunavuama kutenda ku munyobe bune, Munane vua tanga nkutikie kikolokolo kili mu liso liobe, nu uwenyene ndi ntukumona ku lubabu luli mu liso liobe? Uwe muengelezi, tikia tanga lubabu luli mu liso liobe, nu nti ubunavuama kutikia kikolokolo kili mu liso lia munyobe.

⁴³ Kubuno takuli muti muso­ga unakolama biguma bibi: aba muti mubi kukolama biguma bisoga.

⁴⁴ Kubuno muti na muti ukumenyua ku biguma biago. Kubuno bantu tabanakola biguma bia figi ku muti wa mikele, aba kukola biguma bia mizigi ku mikele.

⁴⁵ Muntu musoga muisuku lia mutima wage mukutuka bitondo bisoga; nu muntu mubi muisuku lia mutima wage mubi mukutuka bitondo bibi: kubuno buku­kengela mutima nti ubukutenda kanua.

⁴⁶ Kubuni mukumana buno, Mukota, Mukota, nu tamukukita bunkutenda?

⁴⁷ Na muntu na muntu ukuvua kundi, nu kungua ku malagi mane, nu kumanza, nkamulolesia bualingimana nabo:

⁴⁸ alingimana na muntu ukubaka numba, ombile gansi nunse, nu abikile kibanza gantata ga luanda: nu muiyalo wavule, nu wazigubile na magala, tazatengiletengile; kubuno zobakilue busoga.

⁴⁹ Tondo wozo ukungua, nu ntakita, nkamulingimania na muntu wobakile numba zage gantata ga bilongo geteli kibanza; nu muiyalo wazigubile na magala, nu kazanga kongo zaguide; nu kubiga kua numba zezo kuabeide kunene.