Luka 4 - Nouveau Testament en Kilega

Satana Ekulindika Yesu.

¹ Nu Yesu ezazizibue na Muuza Wasililila, asubizie kutuka Yadene, nu asondelezizibue na Muuza mu kalula,

² alindikilue na Liabo, u Satana. Nu atingizie bindi makumi manazi ntalile, nu gasilile bindi bibio akule na nzala.

³ Nu Liabo, u Satana, amu­buide bune, Ndi uwe u Muana wa Kalaga, kakizia ikozi lilino libe kampampa.

⁴ Nu Yesu amubuide bune, Buasanzilue buno, muntu ntanalama na kampampa tugu.

⁵ Nu amubakamizie kuigulu, nu amulolesizie makota mansania ma kisi mu nkungu imozi,

⁶ Nu Liabo, u Satana, amubuide bune, Nakukase buangato bunsania nu lutanuno luamo: kubuno nageiduebo, nu ninakasa gunkutundabo.

⁷ Umpanga ndi wankumbamina binsania nti biabe biobe.

⁸ Nu Yesu amuakuide bune, Buasanzilue buno, Kumbamina Mukota Kalaga wobe, nu nti wamukitila wenyene.

⁹ Nu amusondelezizie ku Yelusalema, nu amubikile gantata ga mutondo wa numba za kuku­mbamina, nu amubuide bune, Ndi uwe u Muana wa Kalaga, iyise gansi tanga;

¹⁰ kubuno buasanzilue buno, Akakizie migenzi zage zikulange;

¹¹ nu, Bakueke mu maboko mage, Unavua kuikuka kugulu kuobe kuikozi.

¹² Nu Yesu amutendile bune, Buasanzilue buno, Ntulindike Mukota Kalaga wobe.

¹³ Nu gasilile kumulindika, Liabo, u Satana, alekanukile nage mu nkungu zezo.

Yesu Ekusubia ku Galela.

¹⁴ Nu Yesu asubizie mu magala ma Muuza Wasililila ku Galela; nu musagu wage wasambeidue ku ndenge insania za kuko.

¹⁵ Nu eigisizie mu numba ningi zabo za musanganano, nu aganuinue na bansania.

Yesu Eli mu Musanganano wa Nazaleta.

¹⁶ Nu abasile ku Nazaleta, kuko kuakuzizibue; nu anga bua­bezaga lukita luage, eingide mu numba za musanganano mu busi bua sabato, nu emanine nu asomine.

¹⁷ Nu bamukasile mukanda wa mulengania Yesaya nu gakanduide mukanda, amonine kiziki kiasanzilue bune,

¹⁸ Muuza Wasililila wa Mukota uli gantata gane, Kubuno ambongezie muambo buno nisambale musagu musoga ku bazambi: Nu Ansingile buno, nisambalile bakandua musagu wa bukandulua. Nu biuku bimone, Nu kukandula bakandua,

¹⁹ Nu kusambala muaka wa mponga za Mukota.

²⁰ Nu alimbile mukanda, nu agusubanizizie ku mukambi, nu eikeide: nu bansania babezaga mu musanganano bamulolile.

²¹ Nu alingile kubabula bune, Lelo isanzo lilino liazindilila mu matuzi meinyu.

²² Bansania bamulongekeide nu bangamine ku malagi ma mponga matukile mu kanua kage: nu batendile bune, Ndi wono ta muana wa Yosefu?

²³ Nu wono abatendile bune, Lebelebe muambule musumo wono, Munganga eiyonie: tungule buwakitaga mu Kapenuma bukite lingo gano mu kueinyu.

²⁴ Nu atendile bune, Lebelebe nkumubula buno, Takuli mulengania ukuanzua kuabo.

²⁵ Tondo lebelebe nkumubula buno, Kuabezaga misigala mingi mu baIsalele mu bindi bia Eliya, mu nkungu zakandilue igulu miaka isatu nu miezi mutuba, nu kuabezaga munganda mu kisi kinsania;

²⁶ nu Eliya ntasingilue ku umozi wa kubeli, tugu ku Selefata mu Sidona, ku wozo mukikulu wabezaga musigala.

²⁷ Lingo kuabezaga beiya bibali beingi mu Isalele bindi bia mulengania Elisa; aba takuli umozi wa kubeli wengezibue, tugu Namana muntu wa Sulia.

²⁸ Nu bansania mu numba za musanganano gabongule ku bubo bongilue;

²⁹ nu bazanzukile, nu bamuimbizie mu muino, nu babakamine nage gantata ga muiduko wozo wabezaga wobakua ga muino, buno bamusindike mu mpembue.

³⁰ Tondo Yesu atingile gabasamba nu endile.

Yesu Ekuvua ku Kapenuma, nu Ekutikia Basumbu ba Nsese.

³¹ Nu abasile ku Kapenuma; muino wa Galela. Nu abeigisizie busi bua sabato:

³² nu bangamine na megisia mage; kubuno idagi liage liabezaga na buangato.

³³ Nu mu numba za musanganano muabezaga muntu umozi wabezaga na musumbu wa nsese, nu alalukile mueli neiyuki inene bune,

³⁴ Kia! buni butuli nobe, Yesu muNazaleta? ndi wavule buno utubigie? nakumenya buno, uwe uli Wasililila wa Kalaga.

³⁵ Nu Yesu amuzugide, nu atendile bune, Ikala kibibi, nu umutuke. Nu wozo musumbu gamugusizie munkatini muabo, amutukile, nu ntamukitile buampa.

³⁶ Nu bansania bangamine nunse, nu batendeine bune, Idagi ikizi lilino? kubuno ekubakakizia na buangato nu magala, buno basumbu ba nsese babatuke.

³⁷ Nu misagu zage zakukile ku ndenge insania za kuko.

Yesu Ekonia Ninabiala wa Petelo nu Bango Bantu Beingi.

³⁸ Nu atukile mu numba za musanganano, nu eingide ku numba za Simona. Nu ninabiala wa Simona abezaga neisusila inene; nu bamusegile buno amonie.

³⁹ Nu emanine buigi nage, nu azugide isusila; nu liamulekeide: nu kazanga kongo azanzukile nu abakitide.

⁴⁰ Nu geidile busi, bamuvuilide na bansania babezaga na nsambo za nkita ningi; nu abikile maboko mage gantata ga muntu na muntu nu abonezie.

⁴¹ Nu basumbu beingi babatukile, balalukile nu batendile bune, Uwe uli Muana wa Kalaga. Nu abazugide buno tabatende, kubuno bamumenyine buno eli Klisto.

⁴² Nu gakeide busi, atukile nu endile ku kiziki kia kalula: nu musanganano wamulondile, nu babasile kuko kuabezaga, bamusu­bizie buno ntanenda.

⁴³ Tondo ababuide bune, Buatunganana nisambale musagu musoga wa bukota bua Kalaga muingo mino: kubuno nasingilue.

⁴⁴ Nu asambeide mu numba ningi za musanganano za mu Galela.