Luka 3 - Nouveau Testament en Kilega

Bulongeki bua Yoana Bualongekede Yesu.

¹ Mu muaka wa ikumi neitano wa kuangata kua Tibelio Kaisa; nu Pontio Pilato abezaga muangati wa Yudaya, nu Helode muangati wa Galela, nu Filipo muto wage muangati wa Itulaya, nu Takoniti, nu Lusania muangati wa Alibene,

² nu Anasa nu Kayafa babezaga basankoga banene, idagi lia Kalaga Iiabaside Yoana muana wa Zakalia mu kalula,

³ Nu abasile ku kisi kinsania kili buigi na Yadene, asambalaga kubatizibua kua kuiyania kuisigililo lia misako za buagi;

⁴ anga buasanzilue mu mukanda wa malagi ma mulenga­nia Yesaya bune, Iyuki lia muntu likulaluka mu kalula, Kungazi nzila za Mukota, Isiazi matingilo mage,

⁵ Mpinga na mpinga zizazibue, Nu muiduko na muiduko ukagezibua. Nu gatimba gakeisibua. Nu nzila zitutulututulu nti zikeisanana;

⁶ Nubo bansania bamone ku lonio lua Kalaga.

⁷ Nuwe abuide musanganano babatizibue nage bune, Inyue kikanga kia mpoma nazi wamutendile buno, mutine bongoa buka­vua?

⁸ Kolamazi biguma bia kuiyania nu tamukengele kutenda mubenyene buno, tuli na Tateisue Abalahama kubuno Kalaga anavuama kubasizia Abalahama bana mu makozi mamano.

⁹ Kano kaluma isaga liabikua gansi na miti: nu muti unsania utakolama biguma bisoga nti wasesua nu nti weisua mu keiya.

¹⁰ Nu musa­nganano wamubuzizie bune, Tukite buni?

¹¹ Nu abakuide bune, Muntu uli na nsulu ibili, akase wozo uteli na kampa; nu wono uli neidia akite bubo lingo.

¹² Nu lingo bandelelombe bavule kuba­tizibua, nu bamubuide bune, Musozi tukite buni?

¹³ Nu ababuide bune, Tamutikie kampa kutinga bumuakakizizibue.

¹⁴ Nu bakoloboyo bamubuzizie bune, Tukite buni, nuisue? Nu aba­buide bune, Tamubenge muntu umozi nu tamumukandike bitondo; lingo mube na mbogimbogi na lukalilo lueinyu lumukuligua.

¹⁵ Nu galindilaga bantu bubo buabe, nu bantu bansania bake­ngeide mu mitima zabo misagu za Yoana, buno embe we U Klisto;

¹⁶ Yoana akuide bansania bune, Lebelebe nkumubatizia na mazi; tondo wozo wavue antinge, nsiatananina kukandula mizigi za bisala­pata biage: nu akamubatizia na Muuza Wasililila nu keiya:

¹⁷ nu lueli luage luli mu kuboko kuage, nuwe akengia mulungu wage nunse, nu akakundamania mumpunge wage mu kigenge kiage, tondo akagisia mpepa mu keiya katakuzimaga.

¹⁸ Nu wono abanine mano meingi, nu kubasambalila musagu musoga;

¹⁹ tondo mukota Helode, azugidue nage ku kabamba ka Helodia mukazi wa muto wage, nu ku bubi bunsania buakitaga Helode,

²⁰ atalikide bubuno lingo gantata ga bunsania, akandile Yoana mu kikando.

Yesu Ekubatizibua.

²¹ Gabeide bantu bansania basila kubatizibua, Yesu nuwe abatizizibue, nu asegaga, nu igulu liakanduidue,

²² nu Muuza Wasililila agelile gantata gage mu mubili wa kisusania kia nkulimba, nu iyuki liatukile muigulu bune, Uwe uli Muana wane, Ngoli zane, nakomana nobe.

Kibuti kia Yesu Klisto.

²³ Nu gabeide Yesu akuka miaka makumi masatu, alingile kui­gisia, bamukengeide buno eli muana wa Yosefu, muana wa Eli,

²⁴ muana wa Matata, muana wa Lewi, muana wa Meleke, muana wa Yana, muana wa Yosefu,

²⁵ muana wa Matatia, muana wa Amasa, muana wa Nahuma, muana wa Eseli, muana wa Nagei,

²⁶ muana wa Mata, muana wa Matatia, muana wa Simi, muana wa Yoseke, muana wa Yoda,

²⁷ muana wa Yoana, muana wa Lesa, muana wa Zelubabela, muana wa Salatiele, muana wa Neli,

²⁸ muana wa Meleke, muana wa Adi, muana wa Kasama, muana wa Elemadama, muana wa Eli,

²⁹ muana wa Yose, muana wa Elieze, muana wa Yolima, muana wa Matata, muana wa Lewi,

³⁰ muana wa Simona, muana wa Yuda, muana wa Yosefu, muana wa Yona, muana wa Eleyakima,

³¹ muana wa Melea, muana wa Mena, muana wa Matata, muana wa Natana, muana wa Davidi,

³² muana wa Yese, muana wa Obede, muana wa Boaza, muana wa Salamona, muana wa Nasona,

³³ muana wa Aminadaba, muana wa Ani, muana wa Heselona, muana wa Pelese, muana wa Yuda,

³⁴ muana wa Yakobo, muana wa Isaka, muana wa Abalahama, muana wa Tela, muana wa Nako,

³⁵ muana wa Seluga, muana wa Leu, muana wa Pelege, muana wa Ebe, muana wa Sela,

³⁶ muana wa Kanana, muana wa Apakasade, muana wa Seme, muana wa Noa, muana wa Lemeke,

³⁷ muana wa Metusela, muana wa Enoke, muana wa Yelede, muana wa Mahalalele, muana wa Kanana,

³⁸ muana wa Enosa, muana wa Sete, muana wa Adama, muana wa Kalaga.