Luka 24 - Nouveau Testament en Kilega

Kuyuka Kua Yesu ku Bakuzi.

¹ Tondo mu busi bua kulinga bueizinga, mu nindunindu nunse, bendile ku nsinda, na bulago bubabikile kayikayika.

² Nu basangile lilio ikozi liatukibua ku nsinda.

³ Nu gabingidemo tabamonine ku kitumba kia Mukota Yesu.

⁴ Nu bangamine na bubo, nu bantu babili babezaga bemana buigi nabo, babezaga bavuala nsulu zikukelima:

⁵ nu bakule boba, nu baguede gansi bukukumania, bamubuide bune, Buni bumukulonda wozo mulami munkantini mua bakuzi?

⁶ Nteli gano, tondo ayuka: kengelazi buamutendile nti eikikile ku Galela,

⁷ nu atendile buno, buatu­nganana Muana wa muntu agabulue ku maboko ma bagi, nu kuta­kua, nu kusila kua bindi bisatu nti ayuke.

⁸ Nu bakengede bua­batendaga.

⁹ Nu gabatukile ku nsinda, nu basubizie kusambalila babo ikumi nu umozi, nu ku bango bansania.

¹⁰ Nu babezaga Malia Magadala, nu Yoali nu Malia nina wa Yakobo: nu bango bakikulu babezaga nabo, basambalide basingua bubo bunsania.

¹¹ Tabangile bubo bubatendagua nu tabakatizizie.

¹² Tondo Petelo azanzukile nu eitumine lubilo ku nsinda; nu akumbamine nu amonine tugu ku zezo nsulu zabota zabezaga gansi; nu endile ku numba zage, nu angamine na bubo buabeide.

Yesu Ekumonekako na Beigisibua Bage Babili mu Nzila za ku Emau.

¹³ Nu kuabezaga mu bubo busi beigisibua babili bendile ku muino wamanagua Emau, wabezaga bulazi na Yelusalema anga lugendo lua nkungu ibili.

¹⁴ Nubo basambalilene bubo bunsania buabeide.

¹⁵ Nu gabasambalilanaga nu kubuzania, Yesu wenyene avule buigi nabo nu endede nabo gamozi.

¹⁶ Tondo meiso mabo mazibilue buno tabamumenyinine.

¹⁷ Nu ababuide bune, Buni bumukuenda muasambalilana nu mukuenda? Nu bemanine, nu babezaga na kabebe.

¹⁸ Nu umozi wa kubeli, izina liage Koleopa, amuakuide bune, Ndi Uwe uli tugu mugenzi mu Yelusalema utemenya tondo buetile kuko ku bindi bibino?

¹⁹ Nu abatendile bune, Buni buabeide? Nu bamutendile bune, Bua Yesu wa Naza­leta, abezaga mulegania mubibu mu kukita nu mu kutenda ku Kalaga nu ku bantu bansania;

²⁰ basankoga nu bangati beitu bamugabuide buno asungibue nu buno akue, nu bamutakile.

²¹ Tondo isue tuabezagile tukumulemanina buno, we akulule Isalele. Nu lingo lelo, ukindi kia bisatu na gakitidue bubo.

²² Lingo bakikulu bamozi ba kueitu batuangamizie gabendagile ku nsinda lukesikesi;

²³ nu tabamonine ku kitumba kiage, nu gabavule batutendile buno, bamonine ku migenzi, zabatendile buno, alama.

²⁴ Nu bamozi ku babo batuabezaga nabo bendile ku nsinda nu bamonine ku bubo buatendaga babo bakikulu: tondo we tabamu­monineko.

²⁵ Nu abatendile bune, Inyue batakumenyinina, nu beli na mitima zatamba ku kukatizia binsania biatendaga balenga­nia!

²⁶ Ndi tabuatunganana Klisto kusungibua ku bitondo bibino, nu kuingila mu lutanuno luage?

²⁷ Nu kutukila ku Mose nu ku balengania bansania, abasambalide buisulilua bua masanzo mansania masanzidue wenyene.

²⁸ Nu babasile buigi na muino gubendaga kugo nu endile anga ukutinga.

²⁹ Nu bamusubizie, nu batendile bune, Ikala neisue; kubuno busi buseli muigolo, nu buse buida. Nu eingide nu eikeide nabo.

³⁰ Nu gabezaga esalia nabo, atolile kampampa; nu asegile; nu akabunguide nu abakasileko.

³¹ Nu meiso mabo malimbuidue, nu bamumenyine: nu ababombile.

³² Nu batendeine buabo buabo bune, Ndi tatuabezaga na mitima tugu zakukengela, gatuatendaga nage mu nzila, nu gatulolesagia masanzo?

³³ Nu batukile mu zezo nkungu, nu basubizie ku Yelusalema, nu basangile beigisibua ikumi nu umozi bakundamana nu bango babezaga nabo, nu batendile bune,

³⁴ Lebelebe Mukota ayuka, nu amonekako na Simona.

³⁵ Nu babasambalide bansania buabede mu nzila, nu lukita lubamumenyine mu kubungula ka­mpampa.

Yesu Ekumonekako na Beigisibua Ikumi nu Umozi.

³⁶ Nu nkungu zibatendaga bubo, we wenyene emanine muni ati­ni muabo, nu ababuide bune, Bobelelazi.

³⁷ Tondo basalimine nu bakule boba nunse, nu bakengeide buno bamona ku musumbu.

³⁸ Nu ababuide bune, Kubuni kumukuzangazanga nu kubuni muli na kanongonongo mu mitima zeinyu?

³⁹ Lolazi ku maboko mane nu ku magulu mane, buno unne wono; mbabatazi nu ndo­lazi; kubuno musumbu nteli na misuna nu makua, anga bumu­kumonako.

⁴⁰ Nu gasilile kutenda bubo abalolesezie makasa mage nu magulu mage.

⁴¹ Nu gababezaga tabekatizia na mbogi­mbogi, nu bangamine, abatendile bune, Ndi muli neidia gano?

⁴² Nu bamukasile kindi kia kiena kiokibua.

⁴³ Nu akitolile, nu akilile nti bakumona.

⁴⁴ Nu ababuide bune, Bubuno ubunamubulile ganabezaga neinyu, buno buatunganana kuzindilila bubo bunsania bunasa­nzidue mu mulembe wa Mose, nu balengania, nu mu nimbo.

⁴⁵ Nu abakasile makengelo buno bamenyinine masanzo.

Ikakizio Inene lia Musagu wa Yesu.

⁴⁶ Nu ababuide bune, Ububo buasanzilue bune, Klisto akasu­ngibua nu nti ayuke ku bakuzi kusila kua bindi bisatu;

⁴⁷ nu ba­Bilongo bansania basambalilue kuiyania nu kusigililua misako za buagi buabo muizina liane, kulinga ku Yelusalema.

⁴⁸ Nu inyue muli balongeki ba bitondo bibino.

⁴⁹ Nu lebelebe namuvuila neidagano lia Tatane; tondo iziziazi mu muino, aba nu gamua­vualikibue na magala matuke kuigulu.

Yesu Esenda Kuigulu.

⁵⁰ Nu abasondelezizie aba nu ku Betania, nu alambizie maboko, nu abakitide mponga.

⁵¹ Nu gabakitide mponga alekanukile nabo, nu ekilue muigulu.

⁵² Nu gabasilile kumukumbamina ba­subizie ku Yelusalema na mbogimbogi nnene:

⁵³ nu beikeide mu numba za kukumbamina bindi binsania, baganuine Kalaga.