Luka 22 - Nouveau Testament en Kilega

Bekukalila Yesu Luango Bubamuita.

¹ Gabeide busi bua kisagulo kia tumpampa tutagaga buse buigi, buamanagua buno Isuluko.

² Nu basankoga banene nu basanzi balondile bubamuita; kubuno bakule bantu boba.

³ Nu Satana eingide mu Yudasa wamanagua Isakaliote, nuwe aga­nzagua mu babo ikumi na babili.

⁴ Nu endile kugomia na basa­nkoga banene nu bakota ba bakoloboyo, buno abagabulilewe.

⁵ Nu babeide na mbogimbogi, nu bamulagile kumukasa falanga.

⁶ Nu eitabizizie, nu alondile buanabagabulilawe kuteli musanga­nano.

Bekulongekela Yesu nu Beigisibua Bage Kiziki kia Kulia Idia lia Isuluko lia Kalaga.

⁷ Nu busi bua tumpampa tutagaga buakukile, nu buatunganeine kukita kisagulo kiesuluko.

⁸ Nu asingile Petelo nu Yoana, nu abatendile bune, Endazi mutukitile isuluko, tuliazi.

⁹ Nu bamu­buide bune, Kuni kukutunda tualikulumizia?

¹⁰ Nu abatendile bune, Unguililazi gamuabase mu muino, muakulumane na wamu­lume eka idega lia mazi; muyangazi mu numba zingilage muzo.

¹¹ Nu muabule nyene numba buno, Musozi akutenda bune, Kuni kuli busio bua bageni nilie na beigisibua bane kisagulo kiesuluko?

¹² Nu amulolesie busio buli kuigulu bualongekilue: umumutulo­ngekela isuluko.

¹³ Nu bendile, nu bamonine ku bubo buabate­ndaga; nu balongekile isuluko.

Isuluko lia Kutinga.

¹⁴ Nu gakukile nkungu, eikeide ga meza na basingua.

¹⁵ Nu abatendile bune, Nkutunda nunse kulia kisagulo kiesuluko kikino neinyu, nti nsisungibua:

¹⁶ kubuno nkumubula bune, Nsikakilia lingo, aba galikazindilila mu bukota bua Kalaga.

¹⁷ Nu gatolile kituma asegile, atendile bune, Tolazi kituma kikino nu nusianiazi bueinyu bueinyu;

¹⁸ kubuno, nkumubula bune, Nsikanua lingo mazi ma biguma bia mizigi, aba nu gakavua bukota bua Kalaga.

Yesu Ekubatenda Bubaliaga nu Bubanuaga u Kakengelezio ka Mubili Wage nu Mikila Zage.

¹⁹ Nu atolile kampampa, nu gasilile kusega, akabunguide, nu abakasile nu atendile bune, Kano keli mubili wane, wakasanua ku kabamba keinyu; kitazi bubuno bumukankengelaga.

²⁰ Nu kituma nukio kusila kua kulia, nu atendile bune, Kituma kikino kili idagano ito mu mikila zane, zakubulua ku kabamba keinyu.

²¹ Tondo unguililazi, kuboko kua wozo ukungabula kuli nanne ga mamano meza.

²² Kubuno Muana wa muntu ende anga buazindi­lizibua: tondo kabebe ku wozo muntu wamugabula!

²³ Balingile kubuzania buabo buabo, nazi wakite bubuno?

Beigisibua Beli na Miango Buabo Buabo Buno Nazi uli Munene Gabasamba.

²⁴ Nu beigisibua babeide na miango buabo buabo buno, nazi munene gabasamba.

²⁵ Nu abuide bune, Bakota baBilongo be­kuangata, nu bangati bakumanua buno, Bakiti ba busoga.

²⁶ To­ndo inyue tamube bubo; tondo we ukutunda kuba munene kumuli, abe anga mukeke; nuwe mukota, abe anga mukambi.

²⁷ Kubuno nazi uli munene, wozo wikile ga meza, aba wozo ukukamba? tondo nili kumuli anga mukambi.

²⁸ Tondo inuye, muabezaga nanne mu malindiko mane mansania;

²⁹ nunne namubikila bukota, anga bubo buambikile Tatane,

³⁰ buno mulie nu kunua ku meza mane mu bukota buane; nu mukeikala ga bisumbi bia bukota nu kusungia bilongo ikumi nu bibili bia balsalele.

Yesu Ekutenda na Petelo ku Bukatizio Buage.

³¹ Simona, Simona, Satana atundaga kukupepa anga mumpunge:

³² tondo nakusegeide, buno bukatizio buobe tabukokoke; nuwe ndi wasila kugaluka, lindia mibuto zobe.

³³ Nu amutendile bune, Mukota nili nobe, nili kayikayika kuenda nobe ku kikando aba nu kukua.

³⁴ Nu amutendile bune, Petelo, gabe nkoko tazibika lelo, wantune mambizi masatu buno ntunizi.

Yesu Ekutenda Beigisibua Bage Buabe.

³⁵ Nu ababuide lingo bune, Ganamusingaga tamuabezaga neisuku, nu nsago, nu bisalapata, muidile kikizi? Nu bamute­ndile bune, Tatuidile kampa.

³⁶ Nu abatendile bune, Tondo kano kaluma, nyene isuku, alitole, nu nsago lingo; nu uteli na bupanga, akunzie nsulu zage, nu akunze bupanga.

³⁷ Kubuno nkumubula bubo buasanzilue buatunganana buzindilile kundi, Nu aganzilue na bagi: Kubuno binsania biane biatunganana kuzi­ndilila.

³⁸ Nu batendile bune, Mukota, gano geli mapanga mabili, nu abatendile bune, Umpanga.

Yesu Eli na Kabebe mu Getesemane.

³⁹ Nu atukile, nu endile ku muiduko wa Oleve, anga buabezaga lukita luage; nu beigisibua bage bamuyangile.

⁴⁰ Nu gabasile ga kikio kiziki, abatendile bune, Segazi buno tamuingile mu malindiko.

⁴¹ Idekanukizie nabo anga bulazi buaganisua ikozi; nu akomine mazu nu asegile,

⁴² atendile bune, Tatane, ndi watunda, ntikizie kituma kikino: tondo ta kusombola kuane, tondo kuobe kukitue.

⁴³ Nu mugenzi wa kuigulu amubaside kumulindia.

⁴⁴ Nuwe ababazizibue nu asegile nunse bubibu; nu kilungu kiage kiabezaga kise kiasusanania anga matogi ma mikila makolokaga gansi.

⁴⁵ Nu gasilile kusega, azanzukile nu endile kuabezaga beigisibua bage, nu abasangile beiyombeka ku tulo na kabebe,

⁴⁶ nu atendile bune, Kubuni kumuiyombeka? Yukazi nu musege, buno tamuingile mu malindiko.

Bese Bakata Yesu.

⁴⁷ Kazanga kongo gatendaga, musanganano munene wabasile, nu wozo wamanagua Yudasa, umozi wa babo ikumi nu babili, avuaga luabusio luabo, akundile Yesu nu amumumine.

⁴⁸ Tondo Yesu atendile Yudasa bune, Ndi ukugabula Muana wa muntu?

⁴⁹ Nu babo babezaga nage, gabamonine ku bubo, batendile bune, Mukota, ndi tubabange na bupanga?

⁵⁰ Nu umozi wa kubeli abangile mukobe wa sankoga munene, nu amusesile kutuzi kua seidume.

⁵¹ Tondo Yesu, atendile bune, Sigazi bubo. Nu eitubizie ku kutuzi kuage, nu onine.

⁵² Nu Yesu abuide basankoga banene, nu bakota ba numba za kukumbamina, nu bakulu bavuaga kueli bune, Buni bumuavua anga bekuvua ku muibi na mapanga nu nkoma?

⁵³ Ganabezaga neinyu busi na busi mu numba za kukumbamina nu tamuandambizizie maboko; kano kaluma zili nkungu zeinyu, nu magala ma kapilo.

Bekukata Yesu: nu Petelo Ekumutuna.

⁵⁴ Nu bamukatile, nu bendile nage, nu kumusondelezia ku numba za sankoga munene. Nu Petelo amuyangile bulazi.

⁵⁵ Nu gabakongezie keiya ga lusu nu bakungikene, Petelo abezaga nabo.

⁵⁶ Nu mukikulu umozi mukambi, amumonine kuikala buigi na keiya, nu amulolile kisozi, atendile bune, Wono muntu abezaga nage.

⁵⁷ Tondo atunine, atendile bune, Uwe mukikulu, nsizi wozo.

⁵⁸ Nu gatingile nkungu nkeke, ungo amumonineko, amu­buide bune, Uwe uli umozi wa ku babo. Tondo Petelo atendile bune, Uwe wamulume, tanne.

⁵⁹ Nu gatingile nkungu emozi ungo alingizie kutenda bune, Lebelebe wono muntu abezagile na wozo, kubuno eli muGalela.

⁶⁰ Tondo Petelo atendile bune, Uwe, muntu, nsikumenya bukutenda. Nu kazanga kongo mukuba esate­nda mulume wa nkoko abikile.

⁶¹ Nu Mukota akebetukile, nu alolile Petelo. Nu Petelo akengeide buamubulaga Mukota buno, gabe nkoko tazibika, wantune lelo mambizi masatu.

⁶² Nu endile kumbuga, nu alilile bubibu.

Bakanda Yesu.

⁶³ Nu babo bantu gabakatile Yesu bamuililikile, nu bamulibuide.

⁶⁴ Nu bamuzibile ku meiso, nu bamubuzizie bune, Lengania: Nazi wakulibula?

⁶⁵ Nu bamutendile bingo bitondo bingi bia kumulinga.

Bekuvua na Yesu ku Balongeki.

⁶⁶ Nu gakeide busi, musanganano wa bakulu nu basankoga banene nu basanzi; bakundamene; nu bamulusizie ku lusu luabo, batendile bune,

⁶⁷ Ndi uwe u Klisto, tubule. Tondo Yesu aba­kuide bune, Ganamubulabo, tamunakatizia;

⁶⁸ nu ganamubuzia, tamunanakula.

⁶⁹ Tondo kutukila kano kaluma Muana wa muntu eikale kuseidume kua magala ma Kalaga.

⁷⁰ Nu bansania batendile bune, Ndi uli Muana wa Kalaga? Nu abakuide bune, Inyue mukutenda buno nnowe.

⁷¹ Nu batendile bune, Bulongeki bukizi lingo butukutunda? Kubuno tungua kuatenda wenyene na kanua kage.