Luka 20 - Nouveau Testament en Kilega

Bekubuzia Yesu Buangato Buage.

¹ Nu kuabezaga busi bumozi eigisizie bantu mu numba za kukumbamina, nu kusambala musagu musoga, nu basankoga banene nu basanzi gamozi na bakulu bamuvuilide:

² nu bamubuide bune, Tubule buangato bukizi bukukitila ku bubuno? aba nazi wakukasile bubuno buangato?

³ Nu abatendile bune, Nkumu­buzia bumozi nu nakulazi:

⁴ Bubatizio bua Y oana, buatukile muigulu, aba ku bantu?

⁵ Nu babuzanizie buabo buabo, nu batendile bune, Ndi tuatenda buno, buatukile muigulu; nti atende buno, Kubuni tamuamukatizizie?

⁶ Tondo ndi tuatenda buno, Buatukile ku bantu; nti bantu bansania batulibule makozi; ku­buno bakatizizie buno Yoana abezaga mulengania.

⁷ Nu bamu­tendile bune, Tatuizi.

⁸ Nu Yesu abatendile bune, Nunne nsi­kumubula buangato bunkukitila ku bubuno.

Musumo wa Nyene Isoa Wasegaga Balimi Bage Biguma Biage.

⁹ Nu eisile bantu musumo buno; Muntu ayikile isoa lia mizigi za biguma, nu alikasile balimi bage, nu endile mu kingo kisi eikalile nkungu ndazi.

¹⁰ Nu nkungu za kukola asingile mukambi umozi ku babo bakambi buno, bamukase nkindi za biguma; tondo bakambi bamulibuide, nu bamubasizie nteli na kampa.

¹¹ Nu asingile ungo mukambi: nu bamulibuide, nu bamubabazizie nunse, nu bamubasizie nteli na kampa.

¹² Nu asingile ungo wa basatu; nu bamubabazizie; nu bamuimbizie.

¹³ Nu mukota weisoa atendile bune, Buni bunikita? nkusinga muana wane, mutundua; embe bana­muanza.

¹⁴ Tondo babo bakambi gabamumueneko, babuzanizie buabo buabo, batendile bune, Wozo eli mupieni; tumuitazi, nu tupiene bupieni buage.

¹⁵ Nu bamubasizie muisoa lia biguma, nu bamuitile. Nu wozo mukota weisoa buni buakakita babano?

¹⁶ Gakavua akeita babo bakambi, nu nti akasane lilio isoa ku bango. Nu gabongule batendile bune, Kilo aba nunse.

¹⁷ Tondo abakakile meiso nu atendile bune, Buisulilua bukizi bua bubuno buasanzilue: Ikozi liasombilue na bobaki, Uliabede ikozi inene lia kapindapinda?

¹⁸ Na muntu unsania wagoa geikozi lilino abeleke; tondo unsania wakolokelua nalio, nti liamubungula.

Yesu Ekutenda Buidigo.

¹⁹ Nu basanzi nu basankoga banene balondile kumukata mu nkungu zezo; tondo bakule bantu boba: kubuno bamenyine buno abeisaga musumo wono.

²⁰ Nu bamulolile nu bamusingide bantu kukokosia, nubo beibikile anga beisanana, buno bamukandike bitondo, bubanamulusia ku buangato bua muangati.

²¹ Nu bamubuzizie bune, Musozi, tuizi buno ukutenda nu ukuigisia bulili, kubuno ntukulola kilungi kia muntu, tondo mu bulili ukuigisia meigisia ma Kalaga:

²² ndi buakulungana ku mulembe kuliga Kaisa idigo aba kutaliga?

²³ Tondo amenyinine menge mabo, nu abatendile bune,

²⁴ Ndolesiazi falanga zeidigo. Zili na kisusania nu masanzo ma nazi? Nu bamubuide bune, Bia Kaisa.

²⁵ Nu abatendile bune, Kasazi Kaisa bia Kaisa, nu Kalaga bia Kalaga.

²⁶ Nu tabavuamine kumukandika bitondo ku bantu; nu banga­mine na kuakula kuage, nu beikeide kibibi.

Yesu Ekutenda baSodoke Kuyuka kua Bantu Kubakuzi.

²⁷ Nu baSodoke bamozi babo bakutendaga buno takuli iyukilo, nu bamubuzizie bune,

²⁸ Musozi, Mose atusanzide buno, ndi iselenzi wa muntu akua, nu asiga mukikulu, nu ntasiga bana, muto wage nti amuyana, nu kumubutila bana.

²⁹ Mutuli muabezaga mibuto mutubakamo bandemozi: nu mutangi asongile mukikulu, nu akule ntasiga bana;

³⁰ nu wababili;

³¹ nu wa basatu amuso­ngile; nubo bansania mutubakamo bakule tabasigile bana.

³² Nu mukikulu nuwe akule.

³³ Muiyukilo wozo mukikulu akaba wa nazi? Kubuno asongilue na babo mutubakamo.

³⁴ Nu Yesu abatendile bune, Bana ba kisi kikino bekusonga, nu kusongua;

³⁵ tondo babo bakaganzua buno batananina kuingila mu kisi kikavua, nu lilio iyukilo lia bakuzi, tabakasonga aba kusongua;

³⁶ kubuno tabakavauma kukua lingo; kubuno balingimana na migenzi; nubo beli bana ba Kalaga, kubuno beli bana beiyukilo.

³⁷ Tondo ku kuyuka kua bakuzi, Mose alolesizibue, ku Kilindi kiaguluminaga keiya, gamanaga Mukota, U Kalaga wa Abalahama, nu Kalaga wa Isaka, nu Kalaga wa Yakobo.

³⁸ We nteli Kalaga wa bakuzi, tondo wa balami: kubuno kueli bansania bakulama.

³⁹ Nu bango basanzi bamozi bamutendile bune, Musozi, watenda buligo.

⁴⁰ Nu tabagelekile lingo kumubuzia mbuzio.

Yesu Ekubuzia Buisulilua Bueizina lia Klisto.

⁴¹ Nu ababuide bune, Buni bukutenda bantu buno, Klisto eli muana wa Davidi?

⁴² Kubuno Davidi wenyene atendile mu mu­kanda wa Nimbo, Mukota atendile ku Mukota wane, Ikala ku kuboko kuane kua seidume,

⁴³ Aba nu ganangate beiti bobe.

⁴⁴ Ndi Davidi amumanine Mukota, kubuni eli muana wage?

⁴⁵ Nu gamunguililaga bantu bansania atendile beigisibua bune,

⁴⁶ Idangazi na basanzi babo bekuelama kutabanga mu nsulu ndazi, nu kusekelua ku masoko, nu kuikala ga bisumbi bitangi mu numba za musanganano, nu mu biziki bitangi mu bisagulo,

⁴⁷ bakunyaga numba za misigala, nu kusega masego malazi ku buengelezi: ba­bano bakasungibua nunsania.