Luka 19 - Nouveau Testament en Kilega

Zakayo Ekugalukia Misako Zage.

¹ Nu gabasile Yesu mu Yeliko, atingile mu muino.

² Nu kuabezaga muntu umozi mugumi, wamanagua Zakayo; mukota wa bandelelombe,

³ nu alondaga kumona ku Yesu buno eli muntu wa lukita lukizi; nu ntamumonineko kubuno kuabezaga musanganano munene wa bantu, nu wozo abezaga muntu muigi.

⁴ Nu eitumine lubilo luabusio, nu abakamine ku muti wa kinsembe, buno embe anamumonako; kubuno atingaga gago.

⁵ Nu ga­basile Yesu gago, agalamine kuigulu nu amutendile bune, Zakayo, sasia kugela, kubuno nkuikala mu numba zobe lelo,

⁶ Nu Zakayo asasizie kugela, nu amusekeide na mbogimbogi.

⁷ Nu gaba­monine ku bubo, bakitile manungunungu, nu batendile bune, Enda kuikala kua muntu wa buagi.

⁸ Nu Zakayo emeine, atendile ku Mukota bune, Unguilila, Mukota, kindi kia bikulo biane nakasa bazambi; nu ndi neibile kia muntu umozi, nti namusubizie kio mambizi manazi.

⁹ Nu Yesu amutendile bune, Lelo lonio lua­basa mu numba zeno, kubuno wono nuwe eli muana wa Abala­hama.

¹⁰ Kubuno Muana wa muntu avule kulonda nu konia wozo wazimina.

Musumo wa Falanga Ikumi.

¹¹ Nu gabongule ku bubo, abeisile ungo musumo, kubuno abezaga ese buigi na Yelusalema, nu bo bakengeide buno bukota bua Kalaga buasasia kumoneka.

¹² Nu atendile bune, Muntu munene umozi endile ku kingo kisi kia bulazi, kukasua bukota buage nu kusubia lingo.

¹³ Nu amanine bakambi bage ikumi, nu abakasile bibombo ikumi, nu abatendile bune, Kunziazi aba nu ganavua.

¹⁴ Nu banyage bamusombile, nu basingile mugenzi kumbusa kuage, kumutenda buno, tatukuziga muntu wono kutu­angata.

¹⁵ Nu gasubizie lingo eseli na bukota buage, nu akakizizie babo bantu bamanue kueli, babo bakambi bakasaga bikulo, nu amenye mutali wamonine mukambi na mukambi.

¹⁶ Nu mutangi atendile bune, Mukota, bikulo biobe biamona mutali lingo ikumi.

¹⁷ Nu amutendile bune, Wakita busoga, mukambi musoga: ku­buno wabeide mukatizia ku bitebingi, ukuba muangati wa mino ikumi.

¹⁸ Nu wa babili avule, atendile bune, Mukota, bikulo biobe biamona mutali wa bingo bitano.

¹⁹ Nu amutendile bune, Angata nu uwe mino itano.

²⁰ Nu ungo avule, nu atendile bune, Mukota, bikulo biobe bibino, nabilangile mu nsulu:

²¹ kubuno nakukuaga boba, kubuno uli muntu mukali: ukutolaga bitabikile, nu ukutubulaga biutayikile.

²² Nu amutendile bune, Nkukusungia ku kako kanua kobe, uwe mukambi mubi. Uwe wamenyaga buno nili mukali, nkutolaga bintabika, nu nkutubulaga bintayikile;

²³ kubuni kutabikile bikulo biane ku babo beli neisuku lia kulanga bikulo nu gakusubia kuane nabisangile na mutali?

²⁴ Nu atendile babo babezaga beimine buigi bune, Munyagazi kikio kibombo, nu mukase wozo uli na bibombo ikumi.

²⁵ Nu bamutendile bune, Mukota, eli na bibombo ikumi.

²⁶ Nkumubula bune, Wozo uli na kena akakasua; tondo uteli na kena, akanyagua aba kako keli nako.

²⁷ Tondo babo beiti bane, batakutunda nibangate, vuazi nabo gano, beitazi nti nkumona.

²⁸ Nu gasilile kutenda bubuno, abakamine kuenda ku Yelusalema.

Yesu Ekubasa ku Yelusalema na Lutanuno.

²⁹ Nu gabeide ese buigi na Betapage nu Betania, ku muiduko wamanagua Oleve, asingile babili ku babo beigisibua,

³⁰ atendile bune, Endazi aba nu ku muino uli luabusio lueinyu; nu gamuabase mumo muamone ku muana wa mpunda asuikua, utetetelagua geli: nti muazisula, nu kuvua nazo.

³¹ Nu ndi muntu amubuzia bune, Kubuni muazisula? tendazi bune, Mukota akuiyaninazo.

³² Nu babo basingilue bendile, nu bamonine ku bubo buababuide.

³³ Nu gababezaga besasula muana wa mpunda batendile bune, Kubuni mukusula muana wa mpunda?

³⁴ Nu babatendile bune, Mukota akuiyaninazo.

³⁵ Nu bavule nazo ku Yesu: nu babikile nsulu zabo gantata ga muana wa mpunda, nu Yesu eikede gantata gazo.

³⁶ Nu gabezaga esenda, banzile nsulu zabo mu nzila.

³⁷ Nu gabeide ese buigi na kugela muiduko wa Oleve, musanganano wa beigisibua bage babogilebogile nu kuganuna Kalaga neiyuki inene ku kabamba ka migeleko mingi zibamonine kuzo;

³⁸ nu batendile bune, Mbogimbogi ku Mukota munene ukuvua muizina lia Mukota; bubobelelo muigulu, nu lutanuno kuigulu.

³⁹ Nu baFalese ba­mozi babezaga mu musanganano bamubuide bune, Musozi, zugila beigisibua bobe.

⁴⁰ Nu abatendile bune, Nkumubula buno, ndi beikala kibibi makozi nti malaluka.

Yesu Ekulilila Yelusalema.

⁴¹ Nu gabezaga buigi amonine ku muino, nu agulilide,

⁴² atendile bune, Songo wamenyaga buno busi buenyu, nu bitondo biabezaga bia bubobelelo buenyu! tondo kano kaluma biabisua kumuli.

⁴³ Kukavua bindi bia beiti beinyu bakamobakila bitutu, bakutimba nabio, nu bakukulumania nabio ku ndenge insania;

⁴⁴ nu bakamu­gusia gansi, uwe nu bana beli munda mueinyu; nu tabakasiga ikozi gantata geikozi; kubuno tamuizi nkungu zimualolilue.

Yesu Ekuyanga Bantu Bakunzagia mu Numba za Kukumbamina.

⁴⁵ Nu eingide mu numba za kukumbamina Kalaga, nu alingile kuimbia babo bakunzaga,

⁴⁶ nu abatendile bune, Buasanzilue bune, Numba zane zabe numba za masego: tondo inyue muaziga­lukia anga numba za banyagi.

⁴⁷ Nu eigisizie busi na busi mu numba za kukumbamina Kalaga. Tondo basankoga banene nu basanzi nu bakulu ba bantu balondile bubemuita;

⁴⁸ nu tabamonine bubekita; kubuno bantu bansania bamuyangaga nu bamunguililaga.