Luka 18 - Nouveau Testament en Kilega

Musumo wa Mubi.

¹ Yesu abeisile musumo buno, buatunganana kusega busi na busi, nu kutakutua;

² atendile bune, Kuabezaga ngatu mu muino umozi utakuanzaga Kalaga, nu ntanzaga muntu:

³ nu mu muino wozo muabezaga musigala umozi; wamuvuilaga nu wate­ndaga bune, Nsesele mulondo wane na wono muiti wane.

⁴ Nu eizizizie nu asombile: tondo eibuzizie, Nsikukuaga Kalaga boba nu nsikukutagia muntu;

⁵ tondo wono musigala ekunkutia, nkumuse­sela mulondo wage busoga buno anavua kunvuila lingo bindi binsania, nu kunkutia.

⁶ Nu mukota atendile bune, Unguililazi bukutenda ngatu uteisanana.

⁷ Nu ndi Kalaga ntanabingia basombolua bage, babo bekumusegaga musi nu kindi, nu ndi aneizizia na kubabingia?

⁸ Nkumubula bune, Asasie kubabingia. Tondo gavue Muana wa muntu ndi akamona bukatizio ku kisi?

Musumo wa muFalese nu Mundelelombe.

⁹ Nu eisile wono musumo ku bantu bekuikengela buno beli beisanana, nu kubenga bango:

¹⁰ Bantu babili bendile kusega mu numba za kukumbamina Kalaga; umozi abezaga muFalese, nu ungo abezaga mundelelombe.

¹¹ Wozo muFalese azanzukile nu eisegeide wenyene bune, Kalaga, nakusima, kubuno nsili anga bango bantu, banyagi, bateisanana, beiti ba meiga, nu nsiasusania na wono mundelelombe.

¹² Nkugilaga idia mambizi mabili izinga neizinga, nkutikagia kindi kikumi ku bikulo biane.

¹³ Tondo wozo mundelelombe, emanine bulazi, nu ntatundile kulola kuigulu, tondo aguide bukukumania, atendile bune, Kalaga, nkuile kiombo nili muagi.

¹⁴ Nkumubula buno, Muntu wozo endile abingibua ku numba zage kutinga munyage: kubuno unsania ukuisakika agezi­bue; nu wozo ukuigezie, asakikue.

Bana Bekuvua ku Yesu.

¹⁵ Nu bamuvuilide na bana bato babo buno eitubie kubeli: tondo gamonine beigisibua bage ku bubo, babazugide.

¹⁶ Tondo Yesu abamanine buno bavue kueli, atendile bune, Sigazi bana bato bavue kundi nu tamubazugile; kubuno beli anga babano bukota bua Kalaga buli buabo.

¹⁷ Lebelebe nkumubula bune, Unsania uteitabizia bukota bua Kalaga anga muana muto ntakeingila nunse mubo.

Muntu Umozi Atundaga Kalamo Katanakuzinda.

¹⁸ Nu muangati umozi amubuzizie bune, Musozi Musoga buni bunikita nipiene kalamo katanakuzinda?

¹⁹ Nu Yesu amutendile bune, Kubuni ukumana musoga? takuli umozi musoga, tugu Kalaga wenyene.

²⁰ Wizi makakizio buno, Ntuite meiga, Ntuite muntu, Ntuibe, Ntueke munyobe buza, anza so nu nyoko.

²¹ Nu atendile bune, Nasilile kuanza mamano mansania kutukila ku ku­butua kuane.

²² Nu gongule Yesu ku bubo, amubuide bune, Wagelelua ku bumozi tugu; ukunzie bikulo biobe binsania, nu begania ku bazambi, nuwe ukaba neisuku muigulu: nu uvue unyange.

²³ Nu gongule ku bubo, abeide na kabebe nunse; kubuno abezaga na bikulo bingi.

²⁴ Nu gamonine Yesu ku bubo, atendile bune, Kuingila kua bagumi mu bukota bua Kalaga kuli kubibu.

²⁵ Buli neibineibi ngamia kuingila muitengu lia nsinge, ku mugumi kuingila mu bukota bua Kalaga.

²⁶ Nu babo bongule kubo batendile bune, Nazi ukuvuama konibua?

²⁷ Tondo atendile bune, Butakulungana ku bantu bunakulungana ku Kalaga.

²⁸ Nu Petelo atendile bune, Lebelebe; tuasigile binsania bietu, nu tuaku­yangile.

²⁹ Nu abatendile bune, Lebelebe nkumubula bune, Takuli muntu wasigile numba zage, aba mukikulu wage aba bato bage, aba beisi, aba bana bage, ku kabamba ka bukota bua Kalaga,

³⁰ utakatalikilua bingi mu nkiko zeno, nu mu nkiko zikavua kalamo katanakuzinda.

Yesu Ekubula Beigisibua Bage Lingo Kukua Kuage nu Kuyuka Kuage.

³¹ Nu endile na babo ikumi nu babili, nu abatendile bune, Unguililazi, tuenda ku Yelusalema, nu bunsania buzindilile bua­sanzilue na balengania ku kabamba ka Muana wa muntu.

³² Ku­buno agabulue ku baBilongo, nu eililikue, abengue, nu kusuilua matazi:

³³ nu bamususule nu kumuita: nu kusila kua bindi bisatu nti ayuke.

³⁴ Nubo tabamenyinine bubo, nu buabezaga buabisua kubeli, nu tabamenyinine buatendaga.

Yesu Ekonia Kiuku Buigi na Yeliko.

³⁵ Nu gabezaga ese buigi na Yeliko, muntu umozi abezaga kiuku eikalaga buigi na nzila asegaga:

³⁶ nu gongule musanganano wa­tingaga, ababuzizie bune, Kikizi?

³⁷ Nu bamubuide bune, Yesu wa Nazaleta ukutinga.

³⁸ Nu alalukile, atendile bune, Yesu, muana wa Davidi, nkue kiombo.

³⁹ Nu babo babezaga luabusio bamuzugide, bamuikazizie kibibi, tondo eitide kulaluka bubibu bune, Muana wa Davidi nkue kiombo.

⁴⁰ Nu Yesu emanine, nu akakizizie buno bamulusie: nu gabeide ese buigi, amubuzizie bune,

⁴¹ Ukutunda nakukitila kikizi? Nu atendile bune, Mukota, nkutunda namona.

⁴² Nu Yesu amutendile bune, Mona; bukatizio buobe buakonia.

⁴³ Nu kazanga kongo amonine, nu amuyangile, nu aganuine Kalaga: nu gamueine bantu bansania ku bubo, baganuine Kalaga.