Luka 16 - Nouveau Testament en Kilega

Musumo wa Mulangi wa Bikulo.

¹ Nu atendile lingo beigisibua bage bune, Kuabezaga muntu umozi mugumi, abezaga na mulangi: nu bamubingile kueli buno, agabula bikulo biage.

² Nu amumanine nu amubuide bune, Musagu mukizi wono? tuganze maganzo ma bikulo biguli nabio; kubuno ntualange lingo bikulo biane.

³ Nu wozo mulangi eitendile bune, Buni bunikita kubuno mukota wane antikia ku bu­langi? Nsinavuama kulima; nu nkukua nsoni kusega.

⁴ Nizi bunakite, buno, gantikie ku bulangi, bansekele ku numba zabo.

⁵ Nu amanine babezaga na nsombi za mukota wage, umozi umozi, atendile wozo mutangi bune, Uli na nsombi inga ku mukota wane?

⁶ Nu atendile bune, Bilingiko lukama bia makiti, nu amutendile bune, Tola mukanda wobe nu usasie kuikala gansi, nu nti wasanza makumi matano.

⁷ Nu atendile na wongo bune, Nuwe, uli na nsombi inga? Nu amutendile bune, Bilingiko lukama bia mu­mpunge. Nu amutendile bune, Tola mukanda nu usanze makumi kinana.

⁸ Nu wozo mukota aganuine mulangi uteisanana, kubuno akitile na menge: kubuno bana ba kisi kikino nu ba kibuti kiabo beli na menge kutinga bana ba kiengi.

⁹ Nu nne nkumubula bune, Katazi buida na bikulo biteisanana; kubuno, gabikeida, bakamuse­kela mu biziki bitanakuzinda.

¹⁰ Nu wono uli mukatizia mu bi­keke nunse, nti anaba mukatizia nunse mu bingi; nu wono uteisa­nana mu bikeke nti ntaneisanana mu bingi nunse.

¹¹ Ndi tamuli bakatizia ku bikulo biteisanana, nazi unalemanina kumukasa bikulo biasuaga?

¹² Nu ndi tamuabezaga bakatizia mu bikulo bia ungo muntu, nazi ukamukasa bienyu mubenyene?

¹³ Takuli muka­mbi unakitila bakota babili: kubuno asombe umozi, nu kutunda ungo; aba nti anza umozi, nu kubenga ungo. Tamunavuama kukitila Kalaga nu bikulo.

Yesu Ekutenda na baFalese.

¹⁴ Umpanga baFalese, babo babezaga belami ba bikulo, gabo­ngule kububo bamuzuguide.

¹⁵ Nu abatendile bune, Inyue mu­kuibingia ku bantu; tondo Kalaga eizi mitima zeinyu; kubuno kinsania kikutanunua na bantu kili lusombo ku Kalaga.

¹⁶ Mulembe nu balengania biabezaga aba nu ku Yoana: kutukila nkungu zezo, musagu wa bukota bua Kalaga wasambedue, nu na muntu na mu­ntu nokuiyingizia na magala.

¹⁷ Tondo buli neibineibi igulu nu kisi bitinge, kuisanzo limozi ikeke lili mu mulembe kutinga.

Yesu Ekutenda bua Kuita Isonga.

¹⁸ Na muntu na muntu ukatikagia mukazi, nu kusonga ungo, nti eita meiga: nu unsania wasonga wozo watukibua kuiba, nti eita nuwe meiga.

Musumo wa Lazalo nu Mukota Munene.

¹⁹ Kuabezaga muntu umozi mugumi, wabezaga wavuala nsulu nsoga zakisimana, nu na busi na busi aliaga busoga;

²⁰ nu muzambi umozi izina liage Lazalo abezaga ikala ga kitiko, abezaga na biulu bingi,

²¹ nu atundaga kuembuka na mbobu zakolokaga ku meza za wozo mugumi; nu mboa zavuaga kumulamba ku biulu biage.

²² Nu gabede wozo muzambi alekana, migenzi zamuekile ku bukuba bua Abalahama: nu wozo mugumi nuwe alekene nu ayikilue.

²³ Nu mu Kiziki kia Bakuzi alambuide meiso, ababalagua nu amonine ku Abalahama bulazi, nu Lazalo ku bukuba buage.

²⁴ Nu alilile liu atendile bune, Tatane Abalahama, nkue kiombo, nu singa Lazalo, atobe munue wage mu mazi, nu ozie lulami luane; kubuno nkubabalua mu keiya kakano.

²⁵ Tondo Abalahama atendile bune, Muana wane, kengela tanga buno wabezaga na bisoga bingi mu kalamo kobe, nu Lazalo nuwe abezaga na bibi: tondo kano kaluma esabogaboga, nu uwe usababala.

²⁶ Nu lingo, gatusamba neinyu geli mpembue nnene zabikilue, nu babo bekutunda kutuka kuno nu kuvua kuko kumuli tabanavuama, aba ba kuko kumili tabanabasa kuno.

²⁷ Atendile bune, Tatane, nkukusega tanga buno, buli busoga ndi wasinga Lazalo ku numba za tatane;

²⁸ kubuno nili na bato bane batano; ende kubasambalila buno, bana­vua kubabalua kuno.

²⁹ Tondo Abalahama amutendile bune, Beli na Mose nu bango balengania; bonguilile tanga babo.

³⁰ Nu atendile bune, Tabubo tatane Abalahama; tondo ganenda umozi wa bakuzi, baneiyania.

³¹ Nu amutendile bune, Ndi tabongua ku Mose nu ku bango balengania, aba tondo ganayuka umozi ku bakuzi tabanakatizia.