Luka 13 - Nouveau Testament en Kilega

Bantu Bekugaluka ku Kalaga.

¹ Nu nkungu zezo kuabezaga bantu bamusambalilaga mu­sagu wa baGalela, babo basambikagia Pilato asambikia mikila zabo na za kisansa kiabo.

² Nu abatendile bune, Ndi mukukengela buno baGalela babo babezaga bagi kutinga baGalela bansania, kubuno bababazizibue ku bitondo bibino?

³ Nkumubula bune, Tabubo: tondo ndi tamuiyania inyue bansania, nti mukazika anga bubazikile.

⁴ Aba babo ikumi na kinana balimbilue na kindo kia Siloama nu kiabeitile, mukukengela buno babezaga bagi kutinga bantu bansania babezaga mu Yelusalema?

⁵ Nkumubula bune, Tabubo: tondo, ndi tamuiyania inyue bansania nti mukazika anga bubazikile.

Musumo wa Muti Utakolamaga Biguma.

⁶ Nu abeisile musumo wono; Muisoa lia muntu umozi muabe­zaga muti wa figi; endaga kulonda biguma kugo, nu ntabimonine­ko.

⁷ Nu atendile ku wozo mulangi weisoa liage bune, Kuse kuatinga miaka isatu nkuvuaga kulonda biguma ku wono muti wa figi, nsikubimonagako: sesago, kubuni ukubigia bisogo?

⁸ Nu wozo amutendile bune, Mukota siga lingo tanga mu wono muaka, nasibule ntungo insania zago, nu nawisile bisogo bisoga;

⁹ nu ndi wakolama biguma nti buli busoga, nu ndi tawakolama lingo nti wagusesa.

Yesu Ekonia Mukikulu Wabezaga Mugongole.

¹⁰ Yesu abezaga ekuigisia mu numba imozi za musanganano busi bua sabato;

¹¹ nu kuabezaga mukikulu umozi abezaga na lusambo lua musumbu miaka ikumi nu kinana; abezaga akumbama; nta­vuamaga kuisanana nunse.

¹² Nu Yesu gamumueneko, amu­manine, nu amutendile bune, Mukikulu, wakandulua ku bugongole buobe.

¹³ Nu amubikile maboko: nu kazanga kongo isanene, nu aganuine Kalaga.

¹⁴ Nu muangati wa numba za musanganano ongilue, kubuno Yesu onezie muntu busi bua sabato, ubuatendile ku musanganano bune, Kuli bindi mutuba biatunganana kukita mulimo: umpanga mu bibio umumuvua konibua, tondo ta ku busi bua sabato.

¹⁵ Tondo Mukota abakuide bune, Inyue bengelezi, tondo ndi bamozi kumuli, tabakukandula ngombe aba mpunda zeinyu kuenda kuzinusia mazi busi bua sabato?

¹⁶ Nu wono mukikulu eli wa kikanga kia Abalahama, nu Satana amukandile miaka ikumi nu kinana, ndi tabuamutananina buno akandulue mu kikando kikino busi bua sabato?

¹⁷ Nu gatendile bubo, bansania bamusombaga bakule na nsoni: nu musanganano unsania, wabogi­lebogile ku bitondo bia lutanuno biatendaga.

Musumo wa Kaguma ka Bunyonyo.

¹⁸ Nu atendile bune, Bukota bua Kalaga bualingimana na ki­kizi? nu nibulingamanie na kikizi?

¹⁹ Bualingimana na kambuto ka bunyonyo, muntu akatolile nu akeisile muisoa liage; nu kanagile, nu kabede muti munene; nu tuzoni tua mu mpelela tuakataga ku ntabi zako.

Musumo wa Mugago.

²⁰ Atendile lingo bune, Buni bunilingimania bukota bua Kalaga?

²¹ Bualingimana na mugago, wisile mukikulu mu bianzi bisatu bia bugali nu bunsania buagagile nunse.

Yesu Ekuenda Kuigisia Bantu ku Yelusalema.

²² Nu atingaga mu mino nu tuino, endaga igisia, nu endaga ku Yelusalema.

²³ Muntu umozi amubuzizie bune, Mukota babo bonibua, ndi bakeke? ta beingi? nu ababuide bune,

²⁴ Idindi­kazi muingile mu luibi luabumbutana: kubuno nkumubula buno, beingi bakalonda kuingila, tondo tabakavuama.

²⁵ Gakasila nyene numba kuzanzuka, nu kuigala luibi, nuinyue mukemana kumbuga, nu kukokomona ku luibi, nu kutenda bune, Mukota, tuigulile; nuwe akatenda bune, Nsizi kumukutukila;

²⁶ nu mukalinga ku­tenda buno, Tualile nu tuanune nobe, nu uwe wigisizie mu nzila zeitu;

²⁷ nu akatenda bune, Nkumubula nsizi kumukutukila; ntukilazi inyue bansania bekukitaga bubi.

²⁸ Nu kukaba kulila nu kubuga meinyo, gamukamona ku Abalahama nu Isaka, nu Yakobo, nu balengania bansania, mu bukota bua Kalaga nuinyue mukabasi­bua kumbuga.

²⁹ Nu bakatuka ku ndenge inazi za kisi, nu ba­keikala mu bukota bua Kalaga.

³⁰ Nu unguililazi, bazinda ba­kaba batangi, nu batangi bakaba bazinda.

Kusomba kua Helode, nu Kusungibua kua Yelusalema.

³¹ Mu nkungu zezo baFalese bamozi bamuendeide, bamubuide bune, Tuka gano, wende ku kingo kiziki, kubuno Helode ekulonda kukuita.

³² Nu abakuide bune, Endazi mubule wozo mukala bune, Lelo nu lubi nkutikia basumbu nu konia basambi nu kindi kia bisatu ukinasilile mu mulimo wane.

³³ Tondo buantunganana nende lelo, nu lubi, nu ndele; kubuno tabuatunganana mulengania kukuila mu Yelusalema.

³⁴ Yelusalema, Yelusalema, ukuitaga balengania, nu kubalibula makozi babo bakusingua kuguli! ma­mbizi manga natundile kukundamania bana bobe, anga bukugu­batilaga nkoko zagubatila bana bazo mu biupi, nu ntuabuzigile!

³⁵ Unguililazi, numba zeinyu zikasigua buasi; nkumubula bune, Tamukamonako lingo nunse, aba nu gamukatenda buno, mbogi­mbogi ku wozo ukuvua kuizina lia Mukota!