Luka 1 - Nouveau Testament en Kilega

Musagu Musoga Wasanzilue na Luka. Iyuki Itangi.

¹ Kubuno bantu beingi babikile maboko mabo kukulumizia bitondo bia wozo musagu biazindilila munkatini mueitu

² anga bubatuekeidego babo bamonaga nu bakiti beidagi,

³ nunne namonine buno buli busoga, kubuno nayangile wozo musagu nunse kutukila ku kulinga kuago, kukusanzila mukota Teofilo;

⁴ buno umenyinine nunsania malagi mawigisizibue.

Kubutua kua Yoana Mubatizi Kuatendilue nti Ntebutua.

⁵ Wakalazi mu indi bia Helode, mukota wa Yudaya; kuabezaga sankoga umozi, izina liage Zakalia, mu kibombo kia Abiya; nu mukazi wage abezaga umozi wa ku bana bamukazi ba Alona, izina liage. Elizabeta.

⁶ Nubo babili babezaga beisanana ku Kalaga, banzile makakizio mansania ma Mukota kuteli neitondoki.

⁷ Nu tababezaga na muana, kubuno Elizabeta abezaga mugumba, nubo babili babezaga bese bakungu.

⁸ Nu gakitaga mulimo wa busankoga ku Kalaga, mu kikanga kiage,

⁹ anga buabezaga lukita lua busankoga, abasile buno eingile mu numba za kukumbamina za Mukota nu agulumizie aliga.

¹⁰ Nu musanganano unsania wasegaga kumbuga ku nkungu zakugulumizia aliga.

¹¹ Nu mugenzi wa Mukota wamubaside, nu emanine kibe kia kuidume kia kayulo ka kugulumizia aliga.

¹² Nu Zakalia gamumueineko azangilezangile, nu akule boba.

¹³ Tondo wozo mugenzi wamubuide bune, Zakalia, ntunakua boba: kubuno masego mobe mongubua, nu mukikulu wobe Elizabeta abute muana wamulume, nu wamuinike izina buno, Yoana.

¹⁴ Nu wabe na mbogimbogi nu klelele; nu beingi bakabogaboga mu kubutua kuage.

¹⁵ Kubuno akaba munene kua Mukota, nu ntakanua maku aba bingo bilubaba; nuwe elyale na Muuza Wasililila, kutukila munda za nina.

¹⁶ Nu akagalukia bengi mu baIsalele ku Mukota Kalaga wabo.

¹⁷ Nuwe akalinga kuenda luabusio luage mu muuza nu mu magala ma Eliya, kugalukia mitima za beisibo ku bana babo, nu kugalukia banani ku menge ma beisanana; nu kubika bantu kayi­kayika ku Mukota.

¹⁸ Nu Zakalia abuide mugenzi bune, Buni bunamenye bubuno? kubuno nise mukungu, nu mukikulu wane nuwe ese mukungu nunse.

¹⁹ Nu mugenzi amutendile bune, Nne u Gabulie ukuemanaga ku Kalaga; nunne nasingilue buno nitende nobe, nu kukusambalila misagu zeno misoga.

²⁰ Unguilila, ukuba kaluma, ntuavuame kutenda aba nu busi bukaba bubuno, kubuno ntuakatizia malagi mane, nu makazindilila ku nkungu zamo.

²¹ Nu bantu balindilaga Zakalia, nu bangamine na buizizizie mu numba za kukumbamina.

²² Nu gatukile, ntavuamine kutenda nabo: nu bamenyine buno amona ku kalolesio mu numba za kukumbamina; atendaga nabo na maboko tugu, bubo bamenyine buno eseli kaluma.

²³ Nu gasilile bindi bia kukita kuage, endile ku numba zage.

²⁴ Nu kusila kua bibio bindi mukikulu wage, Elizabeta, eikile iyimi; eibisile miezi itano, nu atendile bune,

²⁵ Bubuno buankitila Mukota andola, buno antikie nsoni zane ku bantu.

²⁶ Nu ku muezi wa mutuba mugenzi Gabulie asingilue na Kalaga kuenda ku muino ku Galela, izina liago Nazaleta,

²⁷ ku mukinga umozi wabezaga ntemenya wamulume, wandagua na Yosefu wa numba za Davidi, nu izina lia wozo mukinga liabezaga Malia.

²⁸ Nu mugenzi wamuvuilide, wamutendile bune, Samba uwe wakitua mponga, Mukota eli nobe, wakitua mponga kutinga bango bakikulu banyobe.

²⁹ Tondo angamine kuidagi lilio, nu akengeide buno kusambizia kukizi kukuno?

³⁰ Nu mugenzi wamutendile bune, Ntunakua boba Malia; kubuno wakitua mponga na Kalaga.

³¹ Unguilila, uwe weke iyimi, nu wabute muana wamulume, wamuinike izina buno YESU.

³² Nu wono akaba munene, nu akamanua Muana wa wozo Uli Kuigulu nunse: nu Mukota Kalaga akamukasa kisumbi kia buangato, kiesi Davidi:

³³ nu akangata numba za Yakobo nkiko zitanakuzinda; nu bukota buage tabunakuzinda.

³⁴ Nu Malia abuide mugenzi bune, Buni buabe bubuno, kubuno nsimenya wamulume?

³⁵ Nu mugenzi wamutendile bune, Muuza Wasililila akuvuile, nu magala ma Wozo Uli kuigulu nunse: maku­kukile anga kilimelime: kubuno wozo wasililila wabutue kuobe amanue Muana wa Kalaga.

³⁶ Unguilila, Elizabeta mubuto wobe, ekile iyimi lia muana wa mulume mu bukungu buage; ese miezi mutuba, wozo wamanagua mugumba.

³⁷ Kubuno takuli butana­kulungana ku Kalaga.

³⁸ Malia atendile bune, Nili mukiti wa Mukota; nu bubo buwantendile bumbele. Nu mugenzi amusi­gile.

Malia Ekuvua Kulola Elizabeta.

³⁹ Mu nkungu zezo, Malia azanzukile nu asasizie kuenda ku kisi kia miduko, mu muino wa Yuda;

⁴⁰ nu eingide mu numba za Zakalia nu asekeide Elizabeta.

⁴¹ Nu gongule Elizabeta ku muse­kelo wa Malia, muana eikulunguide munda; nu Elizabeta eiyazizi­bue na Muuza Wasililila;

⁴² nu alalukile neiyuki inene, nu atendile bune, Wakitua mponga kutinga bango bakikulu banyobe, nu muana wobe wakitua mponga.

⁴³ Buni buambela bubuno, buno nina wa Mukota wane anvuile?

⁴⁴ Kubuno ganungua ku muse­kelo wobe, nu muana eikulungula munda zane na mbogimbogi;

⁴⁵ nu mbogimbogi ku wozo wakatizizie; kubuno bubo buabuidue na Mukota buzindilile.

⁴⁶ Nu Malia atendile bune, Mutima wane ukuganuna Mukota,

Malia Ekuganuna Kalaga.

⁴⁷ Nu muuza wane wasila kubogaboga ku Kalaga Monia wane.

⁴⁸ Kubuno alolile lukita lua mukiti wage: Kutukila lelo bibuti binsania bikamana buno, wakitua mponga.

⁴⁹ Kubuno wozo uli na magala ankitila bunene; Nu izina liage lili liasililila.

⁵⁰ Nu kiombo kiage kili ku bibuti na bibuti kubabo Bakumukua boba.

⁵¹ Akitile magala na kuboko kuage; Akegezie bekuikotia mu makengelo ma mitima zabo.

⁵² Atikizie bangati ga bisumbi biabo bia buangato, Nu kusakika basigulila.

⁵³ Embukia babo bakuaga na nzala busoga; Nu enzia bagumi tabeli na kampa.

⁵⁴ Akasizie mukiti wage, Isalele,

⁵⁵ Buno akuile Abalahama kiombo nu kikanga kiage ku nkiko zitanakuzinda. (Anga buatendile ku batateisue).

⁵⁶ Nu Malia eikeide nage miezi isatu, nu asubizie ku numba zage.

Kubutua kua Yoana Mubatizi.

⁵⁷ Gakukile nkungu za kubuta kua Elizabeta abutile muana wamulume.

⁵⁸ Gongule beida bage nu kikanga kiage buno Mukota amukuila kiombo nunse, babogilebogile nage.

⁵⁹ Gakukile bindi kinana, bavule kumonesia wozo muana; nu batundaga kumuinika izina lieisi, Zakalia.

⁶⁰ Nu nina atendile bune, Tabubo; tondo akuinikua Yoana.

⁶¹ Bamutendile bune, Takuli muntu umozi mu kikanga kienyu ukumanagua izina lilino.

⁶² Nu batendile isi na maboko buno, bamenye buamumane.

⁶³ Nu atundile lubabu lua kusanza nu asanzile buno, izina liage lili Yoana. Nu bansania bangamine.

⁶⁴ Nu kazanga kongo kanua kage kakandukile nu lulami luage luakandukile, nu alingile kutenda, aganuine Kalaga.

⁶⁵ Nu bansania babezaga beikala buigi nabo bakule boba: nu misagu zezo zakukile ku kisi kinsania kia miduko za Yudaya.

⁶⁶ Nu bansania babunguleko babubikile mu mitima zabo, batendile bune, Wozo Muana abe buni? Kubuno kuboko kua Mukota kuabezaga nage.

⁶⁷ Nu isi, Zakalia iyeide na Muuza Wasililila, nu alenganizie bune,

⁶⁸ Aganunue Mukota Kalaga wa Isalele; Kubuno avuila bantu bage; Nu kubakulula,

⁶⁹ Nu atuzanzulila iyega lia lonio. Mu numba za Davidi mukambi wage.

⁷⁰ (Anga buatendile ku tunua tua balengania babezaga waka­lazi),

⁷¹ Lonio luatutikia mu maboko ma beiti beitu nu ku maboko ma bansania batusomba;

⁷² Buno akuile batateisue kiombo. Nu kukengela idagano liage liasililila.

⁷³ Nu kilumbilo kialumbide tateisue Abalahama,

⁷⁴ Akatukasa ndi tona mu maboko ma beiti beitu nti tuamu­kitila kuteli boba.

⁷⁵ Mu kusililila nu mukuisanana kueli bindi binsania mu kalamo keitu.

⁷⁶ Nu uwe muana, wamanue mulengania wa Wozo Uli Mui­gulu nunse: Kubuno walinge kuenda luabusio lua Mukota kukunga nzila zage;

⁷⁷ Kukasa bumenyinino bua lonio ku bantu bage. Mu kusigililua kua misako za buagi buabo.

⁷⁸ Ku kiombo kia Kalaga weitu, Mu kiengi kiatukile kuigulu nu kutusanina.

⁷⁹ Kusanina bansania beli mu kapilo nu mukilimelime kia lukuo; Nu kusondelezia magulu meitu mu nzila za bubobelelo.

⁸⁰ Nu wozo muana akulile, eitide na magala mu muuza, nu abezaga mu kalula aba mu busi bualolesizibue ku balsalele.