Kulolesibua 8 - Nouveau Testament en Kilega

Kamenyikilo ka Mutuba Kamo.

¹ Nu gakanduidue kamenyikilo ka mutuba kamo, mukobi wabede muigulu kindi kia nkungu imozi.

² Nu namonine ku migenzi mutuba kamo zemana lisa na Kalaga; nu bakasilue mionze mutuba kamo.

³ Nu ungo mugenzi wavule wemanine ku kayulo, abezaga na nyungu za olo zakugisia bulago; nu bamukasile bulago buingi, buno asambike na masego ma basuagibua bansania ga kayulo ka olo kabezaga lisa na kisumbi kia bukota.

⁴ Nu muki wa bubo bulago, witumukile na masego ma basuagibua witumukile ku Kalaga watu­kaga ku maboko ma mugenzi.

⁵ Nu mugenzi wakatile nyungu zakugisia bulago; nu azizazizie na keiya ka kayulo, nu azisile ga kisi: nu kuabede mikulumino, nu moki, nu mikenzi, nu kisi kiatengile­tengile.

⁶ Nu zezo migenzi mutuba kamo babezaga na mionze mutuba kamo beibikile kayikayika kuzida.

⁷ Nu wakulinga eidile monze, nu kuabeide mbula za lubula nu keiya, biatopulua na mikila, nu bisilue ga kisi: nu kindi kimozi kia bisatu kia kisi kiagide, nu kindi kimozi kia bisatu kia miti kiagide, nu bisugu binsania bibisi biagide.

⁸ Nu mugenzi weibili eidile monze, nu kuabeide kimozi kiasu­sania anga muiduko munene waguluminaga keiya wisilue mu kita­tenge: nu kindi kimozi kia bisatu kia kitatenge kiabeide mikila;

⁹ nu kindi kimozi kia bisatu kia bibumbua biabezaga mu kitatenge biabezaga na kalamo, biakule; nu kindi kimozi kia bisatu kia mato kiabigile.

¹⁰ Nu mugenzi weisatu widile monze, nu muigulu muakolokile lukenikeni lukukelima anga kasuku, nu luakolokeide ga kindi kimozi kia bisatu kia nuzi, nu ga tunua balongo tua mazi;

¹¹ nu izina lia lulo lukenikeni liamanagua Apisintu: nu kindi kimozi kia bisatu kia mazi kiabeide lubaba; nu bantu beingi bakule ku kitondo kia mazi, kubuno mabede lubaba.

¹² Nu mugenzi weinazi weidile monze, nu kindi kimozi kia bisatu kia kisongo kia busi, nu kindi kimozi kia bisatu kia muezi, nu kindi kimozi kia bisatu kia nkeninkeni; kiabeide kapilo, buno musi tagusanie kindi kimozi kia bisatu kiago, nu kindi nukio.

¹³ Nu namonine nu nungule ku ndiu imozi, zalengaga muigulu, zatendile neiyuki inene bune, Kabebe, kabebe, kabebe, ku babo beli ga kisi, ku kabamba ka moki ma monze wa migenzi isatu zeide.