Kulolesibua 5 - Nouveau Testament en Kilega

Mukanda wa Tumenyikilo Mutuba Kamo.

¹ Nu namonine ku kuboko kua seidume kua wozo weikalaga ga kisumbi kia bukota, mukanda wasanzilue munda nu gantata gago, wakandua bubibu na tumenyikilo mutuba kamo.

² Nu namonine ku mugenzi mubibu ekulaluka neiyuki inene bune, Nazi watananina kukandula mukanda wono nu kutikia tumenyikilo tutuno?

³ Nu takuabezaga umozi, aba muigulu, aba ku kisi, aba munsi, wavuamine kugukandula, aba kugulola.

⁴ Nalilile bubibu, kubuno takuamonekile umozi watananina kukandula mukanda, aba kugulola:

⁵ nu umozi wa babo bakulu ambuide bune, Ntunalila; lola Kimbue, kili kia kikanga kia Yuda, Kibuti kia Davidi, akindile buno akandule mukanda nu tumenyikilo mutuba kamo.

⁶ Nu namonine munkatini mua kisumbi kia bukota nu bibumbua bili na kalamo, nu munkatini mua babo bakulu, Muana wa Mukoko emana, abezaga anga wasesua, uli na mega mutuba kamo, nu meiso mutuba kamo, umamo Miuza za Kalaga mutuba kamo, masingilue ku kisi kinsania.

⁷ Nu avule, nu atolile mukanda wabezaga ku ku­boko kua seidume kua wozo wabezaga wikala ga kisumbi kia bukota.

⁸ Nu gakatile mukanda, bibumbua binazi bili na kalamo nu bakulu makumi mabili na banazi baguide bukukumania ku Muana wa Mukoko, na muntu na muntu abezaga na zenze, nu bituma bia olo bizazibue na bulago umasego ma basuagibua.

⁹ Nu bekuimbaga lungo luimbo luto bune, Watananina kukata mukanda nu kutikia tumenyikilo tutuno: kubuno wasesilue, nu wakunzide Kalaga bantu ba babilongo bansania, nu ba mitendezi insania, nu ba bikanga bansania ku mikila zobe,

¹⁰ nu wababikide bukota bua basankoga ku Kalaga weitu, nu bakangata kisi.

¹¹ Nu namonine, nu nungule kuiyuki lia migenzi mingi zikutimba kisumbi kia bukota nu bibumbua bili na kalamo nu bakulu; nu buingi buabo buabezaga tununu ikumi mambizi tununu ikumi, nu tununu mambizi tununu;

¹² batendaga neiyuki inene bune, Watananina Muana wa Mukoko wasesilue ekukasua bua­ngato, nu bugumi, nu menge, nu magala, nu luanzo, nu lutanuno, nu mbogimbogi.

¹³ Nungule ku bibumbua binsania bili muigulu, nu bili ga kisi, nu bili munsi, nu bili mu bitatenge, nu binsania bili mubio, biatendaga bune, Mbogimbogi, nu luanzo, nu lutanuno, nu buangato, bibe kuguli ukuikalaga ga kisumbi kia bukota, nu ku Muana wa Mukoko, aba ku nkiko na nkiko zitanakuzinda.

¹⁴ Nu bibumbua binazi bili na kalamo biatendile bune, Amena. Nu bakulu baguide gansi nu bamukumbamine.