Kulolesibua 3 - Nouveau Testament en Kilega

Iyuki Liasanzilagua Ekelezia lia Sadi.

¹ Nu ku mugenzi wa ekelezi lia ku Sadi sanza bubuno: Ubukutenda wozo uli na zezo Miuza mutuba kamo za Kalaga nu nkeninkeni mutuba kamo: Nizi makitilo mobe, nu bekutenda buno uli mulami, tondo wakule.

² Kesia ntende, nu kokomezia bibio biasigala bise buigi na kukua: kubuno nsiamonine makitilo mobe masililila ku Kalaga wane.

³ Bubo, kengela buwakasilue nu bugungule; kokomezia bubo, nu iyanie. Bubo ndi ntuakesia ntende, nkavua anga muibi, nu ntukamenya nkungu zinkakuvuila.

⁴ Tondo kuli bantu bamozi ku Sadi batabigizie nsulu zabo: nu nkatabanga nabo mu nsulu zenga; kubuno zabatananina.

⁵ Wozo ukakindaga akavualikibua zezo nsulu zenga; nunne nsikazimia izina liage mu mukanda wa kalamo nunse, nu nkeitabizia izina liage ku Tatane, nu ku migenzi zage.

⁶ Wozo uli na matuzi makunguilila, onguilile bukutenda Muuza Wasililila ku maekelezia.

Iyuki Liasanzilagua Ekelezia lia Filadelefia.

⁷ Nu ku mugenzi wa ekelezia lia ku Filadelefia sanza bubuno: Ubukutenda wozo wasililila, wozo uli bulili, nu uli na mutandilua wa Davidi, we ndi eigula takuli uneigala, nu ndi eigala, takuli uneigula:

⁸ nizi makitilo mobe (unguilila, nakuigulila luibi, nu takuli ungo unaluigala), ntuli na magala meingi, nu walangile idagi liane, nu ntuananine izina liane.

⁹ Unguilila, nkukukasa ba mu numba za musanganano za Satana, bekuitenda buno, beli baYuda, nu tabelibo, tondo bekueka buza; unguilila, nabalusie buno bavue kukukumbamina, nu bakamenyinina buno nakutunda.

¹⁰ Kubuno walangile idagi liane lia komanizia, nkakonia ku nkungu za kulindikua kuavue ku kisi kinsania, kulindika babo beli ga kisi.

¹¹ Nasasie kuvua: kokomezia nunse kuguli nakio, ungo muntu anavua kuku­nyaga nkumbu zobe za bukota.

¹² Wozo ukakindaga, nkamubika iyango mu numba za kukumbamina za Kalaga wane, nu ntakatuka mumo lingo; nu nkamusanza izina lia Kalaga wane ku mubili wage, nu izina lia muino wa Kalaga wane, wa Yelusalema muto, ukagela gansi kutuka muigulu ku Kalaga wane, nu lingo izina liane.

¹³ Wozo uli na matuzi makunguilila, onguilile bukutenda Muuza Wasililila ku maekelezia.

Iyuki Liasanzilagua Ekelezia lia Laodikia.

¹⁴ Nu ku mugenzi wa ekelezia lia ku Laodikia sanza bubuno: Ubukutenda wozo uli Amena, mulongeki mukatizia nu wa bulili, mutangi wa bibumbua bia Kalaga:

¹⁵ nizi makitilo mobe, buno ntuli mpego aba ntuli keiya: natundaga buno ube mpego aba ube keiya.

¹⁶ Tondo kubuno watamba, nu ntuli mpego aba ntuli keiya, nkakusala mu kanua kane.

¹⁷ Kubuno ukutenda bune, nne nili mugumi, nu neigumizie, nu nsikuiyanina kampa; nu ntuizi buno uwe uli musosu nu uli na tungonongono nu uli muzambi nu uli kiuku nu uli mundulu:

¹⁸ Nkukuana buno unkunze olo zasuguidue na keiya, buno ugume; nu nsulu zenga zakuvuala, buno ntukangue; nu muti wakubonga ku meiso mobe, buno umone.

¹⁹ Bansania bankutundaga, nkubazugilaga, nu nkubasungulaga: ba na koma­nizia, nu wiyanie.

²⁰ Unguilila, nemana ku luibi, nu nkukoko­mona: ndi muntu ekungua kuiyuki liane nu kuigula luibi, nti neingile kueli, nu nalie nage, nuwe alie nanne.

²¹ Wozo ukakindaga, akeikalaga nanne ga kisumbi kiane kia bukota, anga bunakindile, nu neikeide na Tatane ga kisumbi kiage kia bukota.

²² Wozo uli na matuzi makunguilila, onguilila bukutenda Muuza Wasililila ku maekelezia.