Kulolesibua 21 - Nouveau Testament en Kilega

Lingo Igulu Ito nu Kingo Kisi.

¹ Nu namonine ku lingo igulu nu kingo kisi: kubuno igulu itangi nu kisi kitangi biazimine; nu takuli kitatenge lingo.

² Nu namonine ku muino wa kizila, u Yelusalema muto, wagelaga muigulu kutuka ku Kalaga, wakulumizibue busoga anga mukikulu weikulumizizia iba.

³ Nu nungule kuiyuld inene liatukile ku kisumbi kia bukota liatendile bune, Unguililazi, kiziki kikuikalaga Kalaga kise ku bantu, nuwe akeikala nabo nubo bakaba bantu bage; nu Kalaga wenyene akaba nabo, nu akaba Kalaga wabo:

⁴ nuwe akanyonyona bisozi binsania ku meiso mabo; nu takukakubua lingo; aba takukalilua lingo, aba idilo, aba mbabazio lingo: kubuno bitondo bitangi biatingile.

⁵ Nu wozo wabezaga wikile ga kisumbi kia bukota, atendile bune, Unguililazi, nagalukia binsania. Nuwe atendile bune, Sanza: kubuno malagi mamano meli makukatizibua nu ma bulili.

⁶ Nuwe antendile bune, Masila kuba. Nne nili Alfa nu Omega, mutangi nu muzinda. Wozo uli na mpusia nka­munusia mazi ma kanua balongo ka kalamo buliabulia.

⁷ Nuwe ukakindaga akapiena binsania bibino; nunne nikaba Kalaga wage, nuwe akaba muana wane.

⁸ Tondo beli na boba, nu batakatizia, nu beli na misako mibi, nu beiti, nu bitazi, nu baganga, nu baku­mbamizi ba nkisi; nu boza bansania, kibombo kiabo kikeisua mu kiziba kia keiya kikuguluminaga na kibiliti; luluno u lukuo lua mabili.

Yelusalema Muto.

⁹ Umozi wa ku zezo migenzi mutuba kamo zabezaga na bituma mutuba kamo biyala na tubebe mutuba kamo tuzinda, avule, nu atendile bune, Vua kuno, nikulolesie mukikulu weisonga, mukikulu wa Muana wa Mukoko.

¹⁰ Nu anekile mu magalama Muuza Wasi­lilila ku muiduko munene wasakama, nu andolesizie muino wa kizila, wozo wa Yelusalema, wagelile gansi kutuka muigulu ku Kalaga,

¹¹ wabezaga na lutanuno lua Kalaga: nu kiengi kiago kiasusania kiengi kia ikozi lia bukunza bubibu, anga ikozi lia yasepe, lienga anga kiyolo:

¹² wabezaga na kitutu kinene nu kiasakama; wabezaga na nibi ikumi neibili, nu ku nibi migenzi ikumi neibili; nu meina masanzua meli ma bilongo ikumi na bibili bia bana ba Isalele:

¹³ nu kukutu­kaga kisongo kia busi kuabezaga nibi isatu; nu bungulu bua kisi, nibi isatu; nu ku bobungo, nibi isatu, nu kunsi, nibi isatu.

¹⁴ Nu kitutu kia wozo muino kiabezaga na bibanza ikumi nu bibili; nu ga bibio bibanza gabezaga meina ikumi na mabili ma basingua ba Muana wa Mukoko.

¹⁵ Nu wozo unatendaga nage abezaga na mukulu wa olo, buno alindike muino, nu nibi zago, nu bitutu biago.

¹⁶ Nu wozo muino wabezaga na ndenge inazi, nu bulazi buago buabezaga bugezie na bungulu: nu alindikile muino na mukulu kilometele tununu tubili nkama ibili nu makumi manazi. Bulazi buago nu bungulu buago nu kusakama kuago biabezaga bialingi­mana.

¹⁷ Alindikile kitutu kiago mabusu lukama makumi manazi nu manazi, anga kilindiko kia muntu, u kia mugenzi.

¹⁸ Nu bia bibobakile na kitutu biabezaga yasepe: nu muino wabezaga wa olo nsoga, wasusania kiyolo.

¹⁹ Nu bibanza bia bitutu bia muino wozo biakulumizibue na makozi ma bukunza bubibu nu kibanza kitangi kiabezaga yesepe; kia bibili kiabezaga safilo, kia bisatu kia­bezaga kalekedo, kia binazi kiabezaga emalode;

²⁰ nu kia bitano kiabezaga salodone, kia mutuba kiabezaga saladio; kia mutuba kamo kiabezaga kisolaite; kia kinana kiabezaga belulo; kia mubula kia­bezaga tupaze; kiekumi kiabezaga kilosopalase; kiekumi nu kimozi kiabezaga iyasinte; kiekumi nu bibili kiabezaga ametisito.

²¹ Nu nibi ikumi nu ibili zabezaga pelele ikumi nu ibili; nu luibi na luibi na luabezaga na pelele imozi: nu nzila za muino zabezaga za olo nsoga anga kiyolo kienga nunse.

²² Nu nsiamonine ku numba za kukumbamina mugo: kubuno Mukota Kalaga uli na Magala, nu Muana wa Mukoko u beli numba za kukumbamina.

²³ Nu mu muino wozo tamukuiyaninua kisongo kia busi aba muezi kusana mugo; kubuno lutanuno lua Kalaga ulukukelima mugo, nu Muana wa Mukoko u kasuku mugo.

²⁴ Nu babilongo bakatabanga mu kiengi kiago: nu bakota ba kisi bekuvua mugo na lutanuno luabo.

²⁵ Nu nibi zago tazikegalagua mu musi nunse (kubuno mugo tamukeidaga busi):

²⁶ nu bekavua na lutanuno nu luanzo lua babilongo mugo:

²⁷ nu tamukeingila kanse keli na nsese nunsania, aba muntu ukukitaga buagi nu ukuekaga buza: tondo umpanga beli na meina mu mukanda wa kalamo wa Muana wa Mukoko bakingila mugo.